வெளிச்சத்திற்கு வாங்க 64

 

வெளிச்சத்திற்கு வாங்க

-   64 –

பகுத்தறிவு பால்வாடியில் சேர்ந்த சிலர்,  இரவல் அறிவை திரட்டி கொண்டு,  ரொம்ப பெரிய கஷ்டமான கேள்வியைக் கேட்டு விட்டது போல நினைத்துக் கொண்டு நம்மிடம் சிறு பிள்ளை தனமாக கேட்பார்கள்.. ஒரு புறம் அவர்களை பார்த்தால் சிரிப்பு வரும். இன்னொரு புறம் அவர்கள் அறியாமையை நினைத்து பாவமாக இருக்கும். இதனை “புல்லறிவாண்மை” என வள்ளுவம் சொல்லும்.

சரி அப்படி என்ன வருத்தப்படும்படி கேட்பாங்க என நினைக்கறீங்க, அதை சொல்லாமல் போனால் எப்படி? அதை சொல்வதற்கு தானே இந்த வார பதிவு.

என்னது “பாற்கடலை கடைய அமுதம் வருமா?” என்ன சார் புரூடா விடறீங்க... அந்த கடலை கடைய மேரு மலை தான் மத்தாக இருந்ததாம். பாம்பு தான் கயிறாம். இம்மாம் பெரிய கடலில், அந்த மலையை ஒரு தம்மாத் துண்டு ஆமை முதுகிலே தாங்கிச்சாம். இதுவரைக்கும் அப்படி ஒரு ஆமையை டிஸ்கவரி சானலில் கூட பார்க்கவில்லையடா சாமி...என்று நம்மை சும்மா விடமாட்டார்கள்.

முழு கதையையும் சொல்லிவிட்டு, மேலும் நம்மை கிண்டல் செய்து விட்டது போல சந்தோஷம் அடைவார்கள்.

அப்படி தேவர்களும் அசுரர்களும் கடலை கடைய விஷம் வந்துச்சாம் அதை  சிவன் வாங்கி குடிச்சாராம் தன் புருஷன் சாக கூடாதுன்னு தொண்டையிலே கையை வைச்சு நிற்க வைத்து விட்டாராம். விஷத்த குடித்தால் சாமி சாகுமா? என்னங்கப்பா ரீல் சுத்தறீங்க, அப்படி செத்தால் அது சாமியா? இப்படி ஒரு கதையை ஹோலிவுட் படத்துல கூட இதுவரை யாரும் சொன்னதில்லை.. இதெல்லாம் நம்பிக்கிட்டு நீங்களும் சாமி கும்பிட்டுகிட்டு, சோதிடம் அது இதுன்னு சொல்லிக்கிட்டு  என்று நம்மை வீண் வம்புக்கு இழுப்பார்கள்.

சில விஷயங்களை அடிப்படையில் புரிந்து கொள்ளுங்கள். பழைய காலத்தில், நமக்கு விஷயங்களை புரிய வைப்பதற்காக கதை போல செய்திகளை சொல்லி நம் மனதில் பதிய வைப்பார்கள். முன்பெல்லாம் பாட்டிமார்கள் குழந்தைகளுக்கு கதை சொல்லி தூங்க வைப்பார்கள். இப்போ அந்த பாட்டிமார்கள் எல்லாம் முதியோர் இல்லத்தில் இருப்பதால், குழந்தைகளுக்கு நல்ல விஷயத்தை சொல்லித் தர யாரும் இல்லை. இருக்கிற  பாட்டிமார்களும் கையில் ரிமோட் உடன் 50 சென்டிமீட்டர் பெட்டிக்கு முன்னாடி உட்கார்ந்து விடுவதால் அவர்களும் சிந்தனையை வளர்த்துக் கொள்வதில்லை., நம்மை யாரும் கவனிக்க மாட்டேன் என்கிறார்களே என குழந்தைகளும் 6 இன்ச்பெட்டியை கையில் பிடித்துக் கொண்டு உலகத்தை சுற்றி வருகிறது. அதனால் குழந்தைகளையும் சிந்தனையை வளர்த்துக் கொள்ள விடுவதில்லை.

நமது கலாச்சாரத்தில் சொல்லப்படுற எல்லாம் மிகப்பெரிய தத்துவங்களை  உள்ளடக்கி சொல்ல வந்த உருவகங்கள். குழந்தைகள் கூட visualise செய்து பார்க்கும் படி சொல்லி தருவார்கள். இது போல கூகிளால் கூட சொல்லி தர முடியாது. இவைகளை அப்படியே எடுத்துக்கொண்டு வாதிடுவது அறிவுடைமை ஆகாது என்பது அறிவுள்ளவர்களுக்கு தெரியும். . இந்த நடைமுறை நண்பர்கள் மத்தியிலும் கூட குழூக்குறி போல இருக்கும் என்பதை புரிந்து கொண்டால் இது புரியும். Encoding செய்யப்பட்ட இந்த உருவகங்களை Decoding செய்தால் மட்டுமே அதன். பொருள் விளங்கும்.

உங்களுக்காக இப்போது இந்த கதையை Decode செய்து பார்க்கலாம் வாங்க.

பாற்கடல் - குண்டலினி சக்தி

மேரு மலை - முதுகுத்தண்டு

வாசுகி பாம்பு - மூச்சுக்காற்று

தேவர்-அசுரர் – இடகலை நாடி, பிங்கலை நாடி

ஆமை - ஐம்புலன்களையும் அடக்கி ஆளும் தன்மை

தொண்டைக்குழி – விசுக்தி சக்கரம்

விஷ்ணு - வாழ்வு

ஆலகாலவிஷம் - கபம்

அமுதம் - மரணமில்லா பெருவாழ்வு

திருமகள் - செல்வம், நிறைவு

சந்திரன் - சித்தத் தெளிவு

காமதேனு, கற்பக விருட்சம் - நினைத்தது கைகூடும் ஆற்றல்

ஐராவதம் - தேக பலம்

தன்வந்திரி - ஆரோக்கியம்

நமக்கு புரியும்படி சொல்ல வேண்டும் என்றால், "முதுத்தண்டின் இரு பக்கமும் செல்லும் இடகலை - பிங்கலை நாடி வழியே மூச்சுக்காற்று எப்போதும் ஓடிக்கொண்டிருக்கிறது

ஆமைபோல் ஐம்புலன்களையும் அடக்கி அதை ஆதாரமாகக் கொண்டு யோக பயிற்சியினால் நாடி சுத்தி செய்து இடகலை பிங்கலை வழியே மூச்சுக்காற்றை இழுத்து விடும் போது  நித்ய பெருவாழ்விற்கான பத்தாம் வாசல் திறக்கும். அங்கே அமுதம் சுரக்கும். அதை உண்டவர்கள் மரணமில்லா பெருவாழ்வு அடைவர் என்ற இந்த ஆழமான கருத்து அடங்கிய சிந்தனையை ஒரு உருவக கதையில் visual communication எதுவும் படிக்காமல் விளக்கி தந்து இருக்கிறார்கள் என்றால், முன்னோர்களின் அறிவை வியந்து  பாராட்ட வேண்டுமே தவிர கருப்பு சட்டை போட்டுக் கொண்டு, கண்டதை சொல்ல கூடாது.

பாற்கடலை கடையும்போது லட்சுமி, தன்வந்திரி, சந்திரன், கற்பக விருட்சம், காமதேனு, ஐராவதம் முதலியன வந்தது என்பது யோக சித்தி பெற்ற ஒருவருக்கு முறையே செல்வம் (நிறைவு), ஆரோக்கியம், சித்தத் தெளிவு, நினைத்தது கைகூடும் ஆற்றல், தேக பலம் கிடைக்கும் என்பதற்காக சொல்ல வந்த உருவகங்கள்.

இப்படி யோக பயிற்சியின் போது அதிகமான கபமே முதலில் வெளிப்படும், அதனால் தான் யோக பயிற்ச்சியில் கரிசாலை நெய் தடவ செய்வார்கள் என்பது யோகம் பயில்பவர்களுக்கு தெரியும். “கரிசாலை நெய்யா? அப்படின்னா...?” என கேட்காதீர்கள். அதை இன்னொரு வாய்ப்பில் சிந்திக்க வைத்துக் கொள்வோம். இந்த கபமே விஷம் என யோக சாஸ்திரத்தில் சொல்லி வைத்து இருப்பதை சுலபமாக புரிந்து கொள்ள இப்படி கதை போல சொல்லி தந்து இருப்பார்கள்.

இதே போல தான் சோதிடத்திலும், சந்திரனுக்கு 27 (நட்சத்திரங்களும்) மனைவிமார்கள். வளர்ந்து தேய வேண்டும் என தான் பெற்ற சாபத்தால், சந்திரன் நேரடியாக பலனை தர மாட்டார், குரு பத்தினி தாரை வழியாக பலனை தருவார் என சொல்லி தந்து இருப்பார்கள். அதனால் தான் சந்திராஷ்டமம் பார்க்க தேவையில்லை தாரா பலனே முக்கியம் என்பது போல சில வாரத்துக்கு முன்பு சொல்லி இருந்தோம்.

சனிக்கு கால் ஊனம், வைத்தீஸ்வரன் கோவிலில் செவ்வாய் சாப விமோச்சனம் பெற்றது, அசுர குருவான சுக்கிரன் கண் பார்வை இழந்தது என நிறைய கதைகளை சொல்லி கிரக இயல்புகளை  புரிய வைத்து இருப்பார்கள்.

கதைகளை அப்படியே எடுத்துக் கொள்ளாமல் கருத்துக்களை எடுத்துக் கொண்டு சிந்தித்தால், இவைகள் கட்டுக் கதையோ புரூடாவோ இல்லை, கருத்தை சொல்ல வந்த பொக்கிஷம் என்பது புரியும். சொல்லி தந்த கதைகளை சிந்தித்து புரிந்து கொண்டால், சித்தம் தெளிவாகும். இருளில் இருந்து வெளிச்சத்திற்கு வர முடியும் என்பதை புரிந்து கொள்ளுங்கள்.

நல்லதே நினைப்போம். நல்லதே நடக்கும்.

 

வெளிச்சத்திற்கு வாங்க 63

 

வெளிச்சத்திற்கு வாங்க

-   63 –

“நான் ஒன்னும் பெரிசா சொல்லவில்லை சார். casual ஆக இப்படி சொன்னதற்கு அவர் இப்படி வழக்கு போட்டு...” அல்லது “இப்படி அவமான படுத்தி விட்டார் பாருங்க சார்” என்று அலுவலகத்திலோ, குடும்பத்திலோ, அல்லது வெளிவட்டார பழக்கத்திலோ சொல்லி புலம்புபவர்களை பார்த்து இருக்கிறீர்களா?

“என்ன தான் இருந்தாலும் உங்களுக்கு இந்த வாய்க்கொழுப்பு ஆகாதுங்க.. வாயை வைச்சுக்கிட்டு சும்மா இருந்தா தானே... அதான் இப்போ வாங்கி கட்டிகறீங்க” என்று நாம் பட்ட அவமானத்திற்கு சர்டிபிகேட் கொடுத்து நம்மை இன்னமும் அவமான படுத்தும் குடும்ப உறுப்பினர்கள், அல்லது நட்பு வட்டங்களும் இருக்க தான் செய்யும்.

அது சரி, அவமானம் என்றால் என்ன? தன் நிலையை மற்றவர்கள் முன் குறைத்து பேசுவது அதுவும் மற்றவர்கள் அறியும்படி பொது வெளியில் பேசுவது. இதனை defame செய்தல் என சொல்லுவார்கள்.

என்ன தான் அவமானத்தை எல்லாம் துடைத்து போட்டு விட்டும் போகும் நபராக இருந்தாலும் உணர்ச்சி வச படாமல் இருக்க முடியுமா என்ன? அதுவும் கொஞ்சம் sensitive ஆசாமியாக இருந்தால் உடனே கோபம் கொப்பளிக்க, “சமூக வலையில் நான் அவன் இல்லை” என்று காட்டி விடுவார்கள். இல்லை என்றால் நான் அப்படி சொல்லவில்லை என்று எதிர்வாதம் செய்வார்கள். இன்னும் சிலர், “நீ மட்டும் என்னவாம்?” என்று பதிலுக்கு எதிராளிகளை அவமானபடுத்தி விட்டு, தான் சந்தோஷம் அடைவார்கள்.

இதனால் தான் திருவள்ளுவரும்,

யாகாவார் ஆயினும் “நா” காக்க காவாக்கால்

சோகாப்பர் சொல்லிழுக்குப்பட்டு.

 

என சொல்லி இருக்கிறார். எத்தனை பேர் சொன்னாலும், எத்தனை தடவை சொன்னாலும், என்னால் பாருங்க, “இந்த வார்த்தையை மட்டும்  சொல்லிட்டால் எனக்கு கொப்பளித்து கொண்டு வரும் பாருங்க...” என்று உணர்ச்சி கொப்பளிக்க நம்ம கிட்ட வருவாங்க.

நம்ம இப்படி உணரச்சி கொப்பளிக்கும் ஆசாமி என்று தெரிந்தே சிலர் நம்மை இப்படி வேண்டும் என்று இது போல உணர்ச்சிகளை தூண்டி விட்டு அவமான படுத்தியதாக சந்தோச படுவார்கள். இவர்கள் இப்படி தான் என அமைதியாக எந்த reaction கூட கொடுக்காமல் இருந்தால், இத்தனை சொல்லியும் இவர்களுக்கு இது இல்லை ஒரு reaction கூட தரவில்லை என்று சொல்லி, நம்ம வாயை கிளறி விட்டு, நம்ம கையாலேயே நம்ம கன்னத்தில் அறைந்து விட்டு நான் நல்லவன் என்று பொது வெளியில் காட்டி விட்டு அமைதியாக சென்று விடுவார்கள்.

அட ஆமாங்க ஐயா. என்று உங்களுக்கு யாரையாவது பார்த்தால் அப்படி தோன்றுகிறதா? அது சரி, அதுக்கும் சோதிடத்திற்கும் சேர்த்து என்ன சொல்ல போறீங்க என்று யோசிக்கிறீங்க புரிகிறது.

முதலில் சில விஷயங்களை சொல்கிறேன் குறித்துக் கொண்டு அது சரியாக உள்ளதா சொல்லுங்கள்.

எந்த ஒரு பாவகத்திற்கும் அதன் 7ம் பாவகம் நிவர்த்தி பாவகம்.. எந்த ஒரு பாவகத்திற்கும் அதன் 3ம் பாவகம் செயல்பாட்டை குறிக்கும். நம்மை காயப்படுத்தி அல்லது அவமானபடுத்தும் நபர் யாராக இருந்தாலும் அவர்கள் எதிரி ஸ்தானமாக சொல்லும் 6ம் இடம். இவைகளை குறித்துக் கொண்டு இனி சொல்ல வரும் சிந்தனையை கொஞ்சம் கோர்த்து பாருங்கள்.

மனக்காயத்தை ஏற்படுத்துபவர் 6ம் இடம் இல்லையா.. அந்த 6 ம் பாவகம், செயல்பாட்டிற்கு வர வேண்டும் என்றால், 6ல் இருந்து 3ம் இடத்தை பார்க்க வேண்டும் இல்லையா. 6ம் பாவகத்திற்கு 3 ம் இடம் 8ம் பாவகம் சரி தானே. இந்த 8ம் இடத்தை அவமானத்தை ஏற்படுத்துவதை குறித்துக் காட்டும்.

அட ஆமாங்க ஐயா. இது தெரிந்துமா நம்மால்  இதை தவிர்க்க முடியவில்லை.  இது போன்ற சிக்கலான சூழலில் இருந்து தப்பிக்க வழி எதுவும் உள்ளதா என்று கேட்க வருகிறீர்கள் புரிகிறது.

எப்போதெல்லாம் பூட்டு தயாரிக்க படுகிறதோ, கூடவே சாவியும் தயாரிக்கப்படும் என்ற அடிப்படை சிந்தனையை மனதில் பதிய வைத்துக் கொள்ளுங்கள். எல்லா பிரச்சனைகளுக்கும் தீர்வு உண்டு. என்ன தீர்வு. எப்போ, எப்படி நடக்கும் என்பதை சொல்வது தான் உங்கள் நம்பிக்கைக்குரிய சோதிடர் சொல்லும் நல்வாக்கு என்ற சிந்தனையை எடுத்துக் கொண்டு தொடர்ந்து சிந்திக்க வாருங்கள்.

8ம் பாவகம் அவமானத்தை குறிக்கும் என்றால் அதற்கு நிவர்த்தி 7ம் இடம் இல்லையா. அந்த நிவர்த்தி பாவகம்(எட்டில் இருந்து 7 இடங்களை எண்ணி பாருங்கள்)  2ம் இடத்தை காட்டும் சரி தானே. இந்த 2 ம் இடம் தான் தான் வாக்கு ஸ்தானம் என்பது நம்மில் பலருக்கு தெரிந்து இருக்கும்.

ஆக, அவமானத்தை குறிக்கும் 8ம் பாவகத்திற்கு நிவர்த்தி பாவகமான 2ம் இடத்தை குறிக்கும் வாக்கு அல்லது பேச்சை கவனமாக அல்லது பொறுமையாக கையாண்டால் 8ம் பாவகத்தால் ஏற்படும் அவமானம் அல்லது பழி உணர்ச்சி குறையும் என்பது சோதிட ரீதியாக சொல்லும் விளக்கம்.

இதை தான் நம் முன்னோர்கள் எப்போதும், அன்பாக, அமைதியாக பேசுங்கள். அடுத்தவர்களை மதித்து பேசும் அன்பான பேச்சு ஒன்றே, நம்மை அவமானத்தில் இருந்து காப்பாற்ற நிவர்த்தியாக அமையும். என இந்த இரண்டாவது பாவகத்தை அவமானத்தில் இருந்து காப்பாற்றி கொள்ள குறிப்பாக சொல்லி இருப்பார்கள்.

“நா” காக்க என வள்ளுவமும் இந்த சிந்தனையை சொல்கிறது என்று சொல்வதை நாம் அறியும் போது, இந்த இயல்பான் செயல்பாட்டில் சோதிட பின்ன்புலம் இருக்கிறது என்பதை புரிந்து கொள்ள முடிகிறது அல்லவா..

சாலையில் சிக்னலில் நிற்கும் போது, யாராவது வண்டியில் தெரியாமல் மோதி விட்டால், “என்ன அண்ணே... என் மேல கோபமா? அவசரமாக போகனுமா.. சரி போங்க” என்பது போல அன்பான வார்த்தைகளை சொல்லி விட்டுக் கொடுத்து, அவரை ஆசுவாசபடுத்தி அனுப்பி வையுங்கள். கனமான வார்த்தைகளை சொல்லி விட்டால், அவர் தரும் கடுமையான வார்த்தைகள் நம்மை அவமான படுத்தி விடும் மன அமைதியை கெடுத்து விடும் என்பதை புரிந்து கொள்ளுங்கள்.

இது சாலையில் மட்டுமல்ல, குடும்பத்தில், அலுவலகத்தில், நண்பர்கள் வட்டத்தில் என ஒவ்வொரு இடத்திலும் இந்த அன்பான அணுகுமுறையை கையாள்வது இரு தரப்புக்கும் நல்லது என்பதை புரிந்து கொண்டு அன்பை விதைப்போம்.

நல்லதே நினைப்போம். நல்லதே நடக்கும்.

 

வெளிச்சத்திற்கு வாங்க 62

 வெளிச்சத்திற்கு வாங்க

-   62 –

சத்தியத்திற்கு கட்டுப்படும் நாக பாம்பு, உருவத்தில் தடித்த கட்டுவிரியன், கண்ணை கவரும் தோற்றத்தில் இருக்கும் கண்ணாடி விரியன், அளவில் சிறிய சுருட்டை விரியன் என்ற நான்கு வகை பாம்புகள் தான் விஷ தன்மை கொண்டவை என்பதை வனவியலாளர்கள் சொல்லுவார்கள். பாம்புகள் அடித்தாரை கடிக்காது, விதித்தாரை தான் கடிக்கும் என்று சொல்லுவார்கள். என்ன தான் இருந்தாலும் பாம்பு என்றால் பயம் இருக்க தானே செய்யும்.

ஒரு ஜாதகத்தில் நாக தோஷம் இருப்பவர்களுக்கு,  அற்ப ஆயுள், வம்ச நாசம், தீராத வியாதி, தரித்திரம், நோய் தொல்லைகள்  என ஏற்பட வாய்ப்புண்டு. என்பதை சென்ற வாரம் பார்த்தோம்.

மனித வாழ்வில் மிக முக்கிய அம்சமான திருமண விஷயத்திலும், குழந்தை பாக்யம் அருள்வதிலும் தோஷத்தை ஏற்படுத்துவது இந்த ராகு கேதுதான். நாக தோஷம், சர்ப்ப சாபம், என பல வகைகளில் தோஷங்களை ஏற்படுத்துவதில் ராகு-கேதுவுக்கு நிகர் யாரும் இல்லை எனலாம். குழந்தை பிறக்கும்போது கழுத்தில் மாலை போட்டுக்கொண்டு பிறப்பது, கொடி சுற்றிக்கொண்டு பிறப்பது எல்லாம் ராகு-கேதுவின் செயல்பாடுகள் என்றால் வியப்பாக தான் இருக்கும்.

சர்ப்ப ஷாந்திக்கான   வழிபாட்டு முறைகள் திருத்தலங்கள் மாவட்டம் தோறும் இருக்கிறது. காளஹஸ்தியும் திரு நாகேச்வரமும் மட்டும் அல்ல என்பதை முதலில் தெரிந்து கொள்ளுங்கள். எந்த வகையான தோஷம் இருக்கிறது என்பதை உங்கள் நம்பிக்கைக்குரிய சோதிடரிடம் இருந்து கேட்டு தெரிந்து கொண்டு, அதற்குரிய திருத்தல வழிபாட்டு முறை இவைகளை மேற்கொண்டால் பலன் உறுதியாக கிடைக்கும்.

இது இல்லாமல் ஏதாவது ஒரு நாக வழிபாடு செய்தால், வழிபாட்டுக்கு பலன் கிடைக்கும், தோஷ நிவர்த்தி என்பது அதற்குரிய கால இடைவெளியில் தான் நடக்கும். அதன் பிறகு வழிபாட்டு முறைகளை குறை சொல்வது பயனற்றது என்பதை அறிவார்ந்தவர்கள் ஏற்றுக் கொள்வார்கள்.

பாம்புகளின் இயல்பான குணங்களை வைத்து இதை சிந்தித்தால் இது தெளிவாக புரியும். எப்போதும், பாம்புகள் முன் எச்சரிக்கை உள்ளவை தலையை நீட்டிக் கொண்டு வாலை உள்ளே இழுக்கும் திறன் படைத்தவை. பசித்தால் மட்டும் சாப்பிடும் பாம்பு, பாம்பையே சாப்பிடும் பாம்பு, கர்ப்பம் தரித்து பிள்ளை பெறும் பாம்பு முட்டை இட்டு சந்ததியை விருத்தி செய்யும் பாம்பு என பட்டியலிட்டு சொன்னால் ஒரு சில வாரம் போதாது.

இதே சிந்தனையில் நாக தோஷம், சர்ப்ப சாபம் என சொல்ல தொடங்கினால் தனியாக தொடரே எழுதலாம் என்றாலும், எனக்கு நாக தோஷம் இருக்கிறதா என்பதை எப்படி தெரிந்து கொள்வது என கேட்க நினைப்பவர்களுக்கு இந்த செய்தி.

தோல் சம்பந்தப்பட்ட வியாதி இருப்பவர்களுக்கு சர்ப்ப தோஷமோ சர்ப்ப சாபமோ இருக்கும் என்பதை ஜாதகத்தை பார்க்காமலே சொல்லி விடலாம். தோல் மருத்துவர் dermatologist என்று சொல்லும் தோல் மருத்துவ நிபுணர்களுக்கும் இந்த சர்ப்ப தோஷம் இருக்கும் என்று சொல்லி விடலாம்.

தமிழ் வழி வழிபாட்டு முறையில், சர்ப்ப தோஷம் இருப்பவர்கள் புகழேந்தி புலவர் எழுதிய நளவெண்பாவை படிக்க வேண்டும். ‘கார்கோடகன்’ முதலான நாக தோஷம் நீங்கும்.

பாம்பன் சுவாமிகள் அருளிய துவித நாக பந்தம் படிக்க தோஷங்களும் பாபங்களும் விலகும். இதே போல நாக தோஷ அமைப்பிற்கு ஏற்ப முன்னாக பந்தம், நான்னாக பந்தம், அஷ்ட நாக பந்தம் முதலியனவும். தோஷ பாதிப்பு ஏற்படாமல் இருக்க, தாந்திரிக முறை பரிகாரங்களும் உண்டு.

இதே போல, அஷ்ட புஷ்பங்களில் முதன்மையாக சொல்லும்,  எருக்கு வழிபாடு சர்ப்ப சாபத்தை போக்கும் என்பது நம்மில் பலருக்கு தெரிந்து இருக்க வாய்ப்பு இல்லை.

உணவு பழக்கத்தில், பால் பொருட்கள் (dairy foods) நீங்கிய உணவு எடுத்துக் கொள்வது சர்ப்ப தோஷத்திற்கு எளிமையான பரிகாரமாக இருக்கும். இது போல ஒவ்வொரு அசைவிலும் சில குறிப்புகள் உண்டு அதை உங்கள் நம்பிக்குரிய சோதிடர் உங்களுக்கு அடையாளம் காட்டி தருவார்.

இன்னும் குறிப்பாக சொல்ல வேண்டும் என்றால், நாக தோஷம் உள்ளவர்களுக்கு சனியினால் பாதிப்பு ஏற்பட்டால், அது அஷ்டம சனியாகவோ, ஜென்ம சனியாகவோ, ஏழரை சனியாகவோ, அல்லது சனி பெயர்ச்சியால் வரும் பாதிப்போ, அல்லது சனி திசை புத்தி இப்படி இருந்தாலோ, அது பலமாக மற்றவர்களை விட தாங்க முடியாத நிலையில் இருக்கும்.

அட என்னங்க அய்யா தமிழில் பாட்டு பாடினால் பாம்பு தோஷம் போயிடுமா என்று கிண்டல் அடிப்பவர்கள் குறித்துக் கொள்ளுங்கள். கொஞ்சம் நீரும் தமிழ் பாட்டும் போதும் மற்ற சடங்குகள் எல்லாம் பிறகு தான். இதற்கான குறிப்புகளை இந்த சிந்தனையை இன்னொரு வாய்ப்பில் சிந்திக்க வைத்துக் கொள்வோம்.

இராமேஸ்வரம், திருச்சி, ஈரோடு, கொடுமுடி, செம்மங்குடி, காரைக்குடி, பரமக்குடி, தூத்துக்குடி, மன்னார்குடி,  என மாவட்டம் தோறும் சர்ப்ப சாந்திக்கு தனியாக புத்தகம் போடும் அளவுக்கு திருத்தலங்கள் உள்ளது. வழிபாட்டு முறைகள் உள்ளது. அதனால், உங்கள் நம்பிக்கைக்குரிய சோதிடர் ஜாதகத்தில் உள்ள தோஷங்கள் அல்லது சாபங்களுக்கு ஏற்ப, அவர் தேர்வு செய்து சொல்லும் தலங்களையும், வழிபாட்டு முறைகளையும் அறிந்து அதன்படி செய்து நிவர்த்தி பெறுங்கள்.

பொதுவாக ஜாதாகத்தில் உள்ள எந்த பாவங்களையும், தோஷங்களையும், சாபங்களையும் பொறுத்துக் கொள்ளலாம். ஆனால் சர்ப்ப கிரகத்தினால் வரும் தோஷங்களையும் சாபங்களையும் பொறுத்துக் கொள்ள முடியாது என்பது தான் அவரவர் அனுபவமாக கடந்தகால நிகழ்வுகள் நமக்கு கற்று தந்த பாடமாக இருக்கும்.

சரிங்க ஐயா, ஒரு சர்ப்ப கிரகத்திற்கே இத்தனையா...? இது போல எல்லா கிரகத்திற்கும் தெரிந்து கொள்ள வேண்டும் என்ற ஆர்வமாக இருக்கிறது என்று சொல்பவர்களுக்கு ஒரு செய்தி. சர்ப்ப கிரகத்தை பற்றிய செய்திகள் இத்துடன் முடியவில்லை.. இது எல்லாம் ஒரு சிறு குறிப்பு அவ்வளவு தான். சர்ப்ப கிரகத்தின் நிலைப்பாட்டை கொண்டு நிறையா செய்திகள் சொல்ல முடியும்.

நீங்களே தெரிந்து கொள்ள சில குறிப்பு தருகிறேன். சரியாக உள்ளதா சொல்லுங்கள். சர்ப்ப கிரகங்கள் இருக்கும் இடத்தில் இருந்து, மூன்றாவது ஸ்தானத்தில் சூரியன் இருந்தால் ஆணாக இருந்தால் வழுக்கை (சொட்டை) தலையாக இருக்கும் பெண்ணாக இருந்தால் தலை சீவினாலே முடி கொட்டும். சாதாரணமாகவே முடி உடைந்து விழும் தன்மையதாக இருக்கும்.

சர்ப்ப கிரகங்கள் தனியாக இருந்தால், வாழ்க்கையில் ஆயிரம் இருந்தும் வசதிகள் இருந்தும், ஒரு இனம் புரியாத வெறுமை இருக்கும்.

சர்ப்ப கிரக அச்சில் குரு தனித்து இருந்தால் குடும்பத்தை விட்டு விலகி இருப்பார்.  இதில் சனி தனித்து இருந்தால், தொழில் முறையாக குடும்பத்தை விட்டு விலகி இருப்பார். இந்த ஜாதகர் தோஷ பரிகாரங்கள் செய்வாரா மாட்டாரா என்பதையே சர்ப்ப கிரக நிலைகள்  காட்டிக் கொடுத்து விடும். இப்படி நிறைய சொல்லிக்கொண்டே போகலாம்.

எந்த காரணத்தைக் கொண்டும் சர்ப்ப சாபம், நாக தோஷம், இவைகளை அப்புறம் பார்த்துக் கொள்ளலாம் என கவன குறைவாக கொள்ளாமல், முறையான வழிபாட்டு முறைகளை, பரிகார முறைகளை உங்கள் நம்பிக்கைக்குரிய சோதிடர் வழிகாட்டுதலின்படி செய்து, அப்படி செய்ய வாய்ப்பு இல்லாதவர்கள் தமிழ் பாடல்களை படித்து, பிரச்சனைகளை சந்திக்கும் முன்பாக தற்காப்பு செய்து கொள்வது நல்லது.

நல்லதே நினைப்போம். நல்லதே நடக்கும்.

 

-   

வெளிச்சத்திற்கு வாங்க 61

 

வெளிச்சத்திற்கு வாங்க

-   61 –

நாங்களும் செய்யாத முயற்சி இல்லை.  எல்லா மேட்ரிமோனிகளிலும் பதிவு செய்து இருக்கிறோம். எங்கள் ஜாதி சங்க இடங்களில் கூட பதிந்து வைத்து இருக்கிறோம். ஆனால் பாருங்க.. எங்க பிள்ளைக்கு பெண் கிடைக்கவில்லை. அல்லது பெண்ணிற்கு வரன் கிடைக்கவில்லை என்று வருந்தி புலம்புபவர்கள் இருக்க தான் செய்கிறார்கள்.

நாங்கள் ஜாதி விவரம் கூட பார்ப்பதில்லை. எந்த ஜாதி மதமானாலும் பரவாயில்லை என்று திறந்த மனதுடன் இருக்கிறோம். எங்கள் பிள்ளைகளுக்கு திருமணம் ஆகவில்லை. அல்லது இத்தனை ஆண்டுகளுக்கு பிறகும் குழந்தை பாக்கியம் கிடைக்கப் பெற வில்லை என்று சொல்பவர்கள் இப்பவும் இருக்க தான் செய்கிறார்கள்.

‘என்னமோ போங்க சார். நான் போறதுக்குள்ள இந்த பேர பிள்ளைகளுக்கு ஒரு கல்யாணத்தை கட்டி பார்க்கனும்னு நினைக்கிறேன்.- ஆனால் பாருங்க ஒன்றும் குதிரவில்லை’ என தனது ஆதங்கத்தை சொல்லி புலம்பும் பெரிசுகளும் இருக்க தான் செய்கிறது.

சரி.. உண்மையிலேயே என்ன தான் பிரச்சனை?. ஏன் இவர்களுக்கு திருமணம் ஆகவில்லை? என்று கவுன்சிலிங் செய்தால் கூட பொதுவாக காரணத்தை சொல்லிவிட முடிவதில்லை என்பது தான் அனுபவ உண்மை. இவர்களுக்கு சோதிட ரீதியாக சில சிந்தனைகளை சொல்லலாம். அதை சொல்வதற்கு தான் இந்த வார சிந்தனை.

தோஷங்கள், சாபங்கள் என சோதிட ரீதியாக சொல்லும் சில வழி முறைகளில், சாங்கியம் செய்தல், பரிகாரம் செய்தல் போன்ற வழிபாட்டு முறைகள் இருந்தாலும் சோதிட ரீதியாக சில விவரங்களை தெரிந்து கொண்டால் நமக்கு சிந்தனை தெளிவாகும் இல்லையா.

இதில் சர்ப்ப தோஷம் அல்லது நாக தோஷம், சர்ப்ப சாபம் போன்றவை தான் மனம் கூடாத நிலைக்கு காரணமாக அமைந்து விடுகிறது. அதுவும் கால சர்ப்ப தோஷம் என்று வேறு சொல்லுவார்கள் என்று சொல்ல வருகிறீர்கள் புரிகிறது.

சோதிடத்தில், ராகு கேது என்ற கிரகங்களை சர்ப்பமாக உருவகித்து நமக்கு காட்டி இருப்பார்கள். நிழல் கிரகம், சாயா கிரகம் என்று அவரவர்கள் பழகி வளர்ந்த வழக்கப்படி அவைகளை சொல்லுவார்கள். ஒரு சிலர் இந்த நிழல் கிரகத்தை பொருட்டாகவே கருதாமல் மற்ற கிரகங்களை வைத்து பலன் சொல்லுவார்கள். வேறு சிலர், சர்ப்ப கிரகங்களை மட்டுமே வைத்துக் கொண்டு ஜாதகத்தை பார்த்து சோதிட பலன் சொல்லுவார்கள். இதில் அது சரியா அல்லது இது சரியா என்று சொல்வது நமக்கு நோக்கமில்லை,  எனினும் இந்த சிந்தனையில் சொல்ல வந்தது என்ன என்றால் இவை நமது நடைமுறை வாழ்க்கையில் எப்படி நம்மை ஆள்கின்றது என்பதை தெரிந்து கொள்வதற்கே அன்றி வேறு இல்லை.

திருமண தடை, சந்ததி விருத்தி அடையாமை, தொழில் முன்னேற்றம் இல்லாமை, வாழ்வில் வளர்ச்சி இல்லாமை, உழைப்புக்கு ஏற்ற ஊதியம் கிடைக்கப் பெறாமை, நம்முடைய முயற்சிக்கு இன்னொருவர் எதுவுமே செய்யாமல் பெயர் வாங்கி கொண்டு போவது என ஒவ்வொரு கட்டத்திலும் ஏற்படும் தடைக்கும் ஒவ்வொரு அசைவிற்கும் இந்த சர்ப்ப கிரக நிலைகளே முன்னிலை வகிக்கிறது.  

அதுவும் கடந்த ஆண்டு நடைபெற்ற சர்ப்ப கிரக பெயர்ச்சியில் தொடங்கி இன்று வரை அதிக துன்பங்களில் அனுபவங்களை பெற்றுக் கொண்டு இருப்பவர்கள் கடக ராசி/இலக்கின  அன்பர்கள் தான். இதை படித்துக் கொண்டு இருக்கும் கடக ராசி/இலக்கின அன்பர்கள், கண்களில் நீர் கசிய “ஆமாம்” என்று நிச்சயமாக சொல்லுவார்கள்.

அதிலும் கால சர்ப்ப தோஷம் என்று சொல்லுவார்கள் பாருங்கள் என்று தொடங்கினால் பலருக்கு தலையே சுற்றும். சரி எதுவாக வேண்டுமானாலும் இருக்கட்டும், இந்த சர்ப்ப தோஷம் அல்லது சர்ப்ப சாந்தி பற்றி சொல்லுங்கள் என்று நீங்கள் கேட்க வரும் உங்கள் ஆர்வம் புரிகிறது. அதற்காக தான் இந்த சிந்தனை.

சர்ப்ப தோஷம் என தொடங்கினால், பொதுவாக காளஹஸ்தி திருநாகேஸ்வரம் போன்ற திருத்தலங்களை சொல்லுவார்கள். சர்ப்ப கிரக நிலைகளை கொண்டு அதற்க்கான திருத்தல வழிபாட்டு முறையை செய்தால் அன்றி பூரண பலன் கிடைக்க வாய்ப்பு இல்லை என்பது தான் அவரவர் அனுபவ உண்மையாக இருக்கும்.

இதில் குறிப்பாக சில விஷயங்களை சொல்கிறோம் குறித்துக் கொள்ளுங்கள். ராகு கேது என்ற கிரகத்திற்குள் மற்ற கிரக அமைப்பு இருந்தால் சர்ப்ப  நிலைகளுக்கு ஏற்ப அதனை கால சர்ப்ப தோஷம் என்று சொல்லும் முறையும் உண்டு. அதிலும் ஆறு வகை தோஷம் உண்டு. பன்னிரண்டு வகை சாபம் உண்டு. அதிலும் கொடி பிடித்து செல்லும் கிரகம் ராகுவா? கேதுவா? என்பதை ஒட்டி சொல்லும் முறையும் உண்டு.

மற்ற கிரகங்கள் வலவோட்டாக (clockwise) செல்லும் போது, சர்ப்ப கிரகங்கள் மட்டும் எதிர் திசையில் (anticlockwise) செல்லும் என்பதை தெரிந்து கொள்ளும் போதே, இந்த கிரக பாதிப்புகளை நம்மால் புரிந்து கொள்ள முடியும் இல்லையா!

குடும்பத்தில் வளமும் அதிர்ஷ்டமும் பெருகிட, நீர்வளம், நீடித்த ஆயுள், நிறைந்த செல்வம் ஆகியவற்றைத் தரும் தெய்வ வழிபாடு நாக வழிபாடு தான். சிலருக்கு குல தெய்வமே நாகமாக இருக்கும். சிலர் குடும்ப சூழல் காரணமாக இதனை மறந்து வேறு ஒரு தெய்வத்தை வணங்கி கொண்டு இருப்பார்கள். இவர்களுக்கு சர்ப்ப சாபம் ஏற்பட்டு பல தடைகள் வந்து கொண்டு இருப்பதை அனுபவத்தில் அவரவர்கள் தெரிந்து இருப்பார்கள்.

முயற்சியில் தடை என்றால் அங்கே முதலில் வந்து நிற்பது இந்த சர்ப்பங்கள் தான் என்பதை புரிந்து கொள்ளுங்கள். கிராமத்து பக்கங்களில் ஒரு நல்ல காரியம் பேசும் போது, பாம்புகள் தென்பட்டால், அந்த செயலை இப்பவும் தொடர மாட்டார்கள் என்பது தான் அனுபவ உண்மை.

ஆனால் பாருங்கள், பாம்புகளால் விவசாய நிலம் வளம்பெறுகிறது. பாம்புகளை வழிபடுவதால் தங்கள் குடும்பத்தில் செல்வவளம் பெருகி நிலைக்கும் என்று மக்களிடையே நம்பிக்கை நிலவுகிறது. அந்த நம்பிக்கையின் அடிப்படையில்தான் கோவில், குளக்கரை அல்லது அரச மரத்தடி போன்ற இடங்களில் பாம்பு வடிவம் செதுக்கப் பட்ட கற்கள் நடப்பட்டு வழிபாடுகள் நடத்தப்படுகின்றன. நாகராஜாவை தெய்வமாக வழிபடும் வழக்கம் காலம்காலமாக தொடர்ந்து வந்துள்ளது.

பஞ்சமி திதி அன்று நாக வழிபாடு என்பதால் தான் விவசாய நிலங்களை பஞ்சமி திதி அன்று உழவு செய்ய கூடாது என்ற சம்பிரதாயமும் உண்டு. குறிப்பாக நாக பஞ்சமி அன்று குடும்ப வளர்ச்சி கருதி செய்யவே கூடாது  என்பது தான் இந்துக்களின் வழிபாட்டு முறை. ஆடிமாத வளர்பிறை பஞ்சமி தான் நாக பஞ்சமி என்பதை நம்மில் பலர் அறிந்து இருக்கலாம்.

பாயசம் வைத்து நைவேத்திய வழிபடும் முறையே நாக வழிபாட்டின் அடிப்படை என்பதில் தான் என்றால் ஆச்சரியமாக இருக்கும். இதிலும் அஷ்ட நாகங்களாகிய அனந்தன், வாசுகி, தட்சகன், கார்க்கோடகன், பிங்களன், சங்கன், பத்மன், மஹாபத்மன்  இவைகள் இன்னமும் பூமியில் வாழ்வதால், நாக வழிபாடு மக்கள் மத்தியில் பூஜிக்கும் தெய்வமாக கருதப்படுகிறது. இந்த நாக வழிபாடு மற்றும் சிந்தனைகள் சமணத்திலும் பௌத்தத்திலும், கிருத்துவத்திலும் கூட  உண்டு. சில குடும்பங்களில் நாகத்தை சொல்லி பெயர் வைத்து இருப்பார்கள். ‘நாக’ராஜன், ‘நாக’லட்சுமி, ‘நாக’நாதன், ‘நாக’சௌந்தரம், ‘நாக’சுப்பிரமனியன் என்பது போல.

காஞ்சிபுரத்தில் உள்ள முருக பெருமான் கோவிலில் நாக சுப்பிரமணிய சன்னதியே உண்டு என்றால் வியப்பாக தான் இருக்கும். இந்த திருக்கோவிலில் நவ கிரகங்கள் அனைத்தும் சூரியனுக்கு பின் புறத்தை காட்டியபடி, அதாவது நம்மை பார்த்தபடி இருக்கும். இது வேறு எந்த கோவிலிலும் இல்லாத ஒரு அம்சம் என்பதை இந்த சர்ப்ப கிரக சிந்தனையில் சேர்த்துக் கொள்வது அவசியம்.

அறிவியல் ரீதியாக சொல்ல வேண்டும் என்றால், சுமார் 3600க்கும் மேற்பட்ட பாம்புகள் உள்ள இந்த உலகில், முட்டையிட்டு மட்டுமல்ல, குட்டி போட்டும் இனப்பெருக்கம் செய்வது இந்த பாம்பு இனம் மட்டுமே என்பதை தெரிந்து கொள்ளுங்கள்.

பாம்புகளை பற்றி இவ்வளவு விஷயம் இருக்குதா? இதை எப்படி சோதிடத்தில்.... என்று யோசிக்கிறீர்கள், புரிகிறது. இதன் தொடர்ச்சியை அடுத்த வார சிந்தனையில் தொடர்வோம்.

நல்லதே நினைப்போம். நல்லதே நடக்கும்.