நலம் தரும் திருத்தலம்

“நலம் தரும் திருத்தலம்....”

“சார். எப்படி இருக்கீங்க.?”.

என்று முன்பெல்லாம் ஒருவரை ஒருவர் சந்திக்கும் போது கேட்டுக் கொள்வதும், பிறர் நலனில் அக்கறை கொள்வதும் வழக்கமாக இருந்தது.

இப்போதெல்லாம் “என்ன சார் .. சர்க்கரை எவ்வளவு இருக்கு?” என்று கேட்டுக் கொள்ளும் நிலையில் சர்க்கரை வியாதி வெகு வேகமாக பரவி வருகிறது.

முன்பெல்லாம் பெரிவயவர்களின் காலில் விழுந்து ஆசிகள் பெறுவது ஒரு பழக்கமாக இருந்தது.. அன்றைய பெரியவர்கள் “தீர்க்காயுசுமான் பவ” என்றும் நோய் நொடி இல்லாமல் ஆரோக்கியமாக வாழ வேண்டும் என்று ஆசி தருவார்கள்.

இப்போது யாரும் வயதில் சிறியவர்கள் யாரும் அப்படி விழுவதும் இல்லை. அந்த நிலைக்கு பெரியவர்களின் ஒழுக்கமும் குறைந்து விட்டது. தப்பி தவறி காலில் விழும் சிலரை கூட அந்த பெரியவர்கள் “நிறைய சம்பாதித்து பெரிய பதவிக்கு வர வேண்டும்” என ஆசி தருகிறார்கள். அவர்களுக்கு ஆரோக்கியத்தை விட பணம் தான் முக்கியமாக போய் விட்டது.
இந்த சர்க்கரை வியாதி, வயது வித்தியாசம் இல்லாமல் பலரையும் சுண்டி இழுப்பதற்கு காரணம் உடல் உழைப்பு இல்லை என்பதால் தான் மருத்துவர்களும் நடை பயிற்சி யோக பயிற்சி என சொல்கிறார்கள்.

சோறு சாப்பிடுவதாலோ, சப்பாத்தி சாப்பிடுவதாலோ ஒரு மாற்றமும் ஏற்படபோவதில்லை என்று தெரிந்தும், ஒருவருக்கு தரும் மாத்திரை அல்லது மருத்துவ முறை இதற்கு தீர்வு இல்லை என தெரிந்தும், மருத்துவர்கள் மாத்த்திரை தருகிறார்கள். நோயாளிகள் கேட்க மாட்டார்கள் என்று தெரிந்தும் இனிப்பு சேர்க்காதீர்கள் என்று ஆலோசனை சொல்லி அனுப்புகிறார்கள்.காசு கொடுத்து
இத்தனை மாத்திரை சாப்பிடுவது பெருமை என நினைத்துக் கொண்டு, நோயுடன் அதன் பக்க விளைவுகளையும் விலைக்கு வாங்கி விடுகிறார்கள் இந்த சர்க்கரை நோயாளிகள், தாங்க முடியாத நிலை வரும் போது தான் இந்த பணத்தால் எதுவும் முடியாது. பணம் இருந்தால் போதுமா அதை அனுபவிக்க சௌபாக்கியம் வேண்டாமா என்று யோசிக்க தொடங்கி நிற்கிறார்கள்.

மருத்துவ ஜோதிட ரீதியாக யாருக்கு எப்போ சர்க்கரை வியாதி வரும் என சொல்ல முடியும் என்றாலும், இந்த வாரம் சர்க்கரை வியாதிக்கு சில குறிப்புகளையும் வழிபாட்டு தலங்களையும், பரிந்துரை செய்கிறோம்.சரி பார்த்துக் கொள்ளவும்.

சர்க்கரை நோய்க்கு தீர்வு குரு பகவான் தான் என்றால் வியப்பாக இருக்கும். தேவ குருவை குறிக்கும் வண்ணம் மஞ்சள். அதனால் சர்க்கரை நோய் உள்ளவர்கள், மருத்துவர்கள் தரும் மருந்துகள் மற்றும் ஆலோசனைகளுடன், மஞ்சள் நிறத்தை அதிகம் பயன்படுத்தி வந்தால் சர்க்கரை அளவு கட்டுக்குள் இருக்கும்.

மஞ்சள் நிறத்தை உணவிலும் உடையிலும் தன்னை சுற்றி உள்ள பகுதியிலும் இருக்கும்படி பயன்படுத்தி கொள்ளலாம். மஞ்சள்  துண்டை போட்டுக் கொள்ளலாம். மஞ்சள்  நிறத்தில் உள்ள ஆவாரம்பூ தேநீர் (TEA) சாப்பிடலாம். இரவில் பால் குடிக்கும் போது, துளி மஞ்சள் தூள்  போட்டு சாப்பிடலாம். ஆம்லா ஜூஸ் உடன் மஞ்சள் தூள் கலந்து குடிக்கலாம். இந்த சோதிட ஆலோசனையுடன், தேக பயிற்சி, யோக பயிற்சி என மருத்துவர் ஆலோசனைப்படி செய்யலாம்.
இதெல்லாம் சரி. உடலும், மனமும், செல்வ வளமும் நிறைந்து இருக்க நிலைத்து நிற்க வழிபாடு செய்ய வேண்டாமா? அதற்கு தான் இந்த வாரம் இந்த திருத்தலத்தை பரிந்துரை செய்கிறேன்.

சர்வ தோஷ நிவர்த்தி தரும் தலம் என்று போற்றப்படும் திருத்தலம் திருவாரூர். இந்த திருத்தலத்தில் நிறைய சன்னதிகள் உள்ளன. அதை ஒவ்வொன்றாக சொல்ல ஒரு வார பதிவு போதாது. அவ்வளவு விஷயங்கள் உள்ள கோவில் இந்த திருவாரூர் திருக்கோயில். ஆழித்தேர் இந்த கோவிலின் சிறப்பு. இது ஆசியாவிலேயே மிகப்பெரிய தேர் என்றால் கற்பனை செய்து தான் பாருங்களேன். சுமார் 120 அடி உயரம் உள்ள நீண்டு நெடிது நிற்கும் ராஜ கோபுரம், சுயம்பு மூர்த்தியாக விளங்கும் தியாகராஜர், 80 விமானங்கள், 12 மதில்கள், 13 மண்டபங்கள், 15 தீர்த்தங்கள், 3 நந்தவனம், 3 பெரிய பிரகாரம், 365 லிங்கங்கள், 86 விநாயகர் சிலைகள், 1000 கல் தூண், மரகதலிங்கம், 51 சக்தி பீடத்தில் ஒன்று, சுமார் 33 ஏக்கர் பரப்பளவு கொண்ட திருக்கோயில், என பெருமைகளை சொல்லிக் கொண்டே போகலாம்.
தண்ணீரில் விளக்கேற்றிய பெருமை, சிவ பெருமான் தெரு வீதிகளில் நடந்து சென்ற அற்புதம், திருவடி பதிந்த திருத்தலம், மிகப்பெரிய கமலாலய திருக்குளம், பிறக்க முக்தி தரும் திருத்தலம், சுந்தரர் தங்கம் பெற்ற இடம், இறைவன் 364 திருவிளையாடல் நிகழ்த்திய தலம், சிவபாதம் அமைந்த இடம், அஷ்ட துர்க்கை, முருகன் தலையை தடவி கொடுத்தபடி அம்பாள், வீணை இல்லாத சரஸ்வதி, மற்ற திருக்கோவிலில் உள்ளது போல அமர்ந்த கோலத்தில் இல்லாமல், நின்ற கோலத்தில் நந்தி, என இந்த கோவில் 350 க்கும் மேற்பட்ட பாடல் பெற்ற திருத்தலம், நித்திய பிரதோஷம் நடைபெறும் கோவில் என பெருமைகளை சொல்ல ஒரு தொடரே எழுதலாம்.

எடுத்துக் கொண்ட சிந்தனைக்கு ஏற்ப, சர்க்கரை வியாதியால் சிரமப்படுபவர்கள், பெற்றோர்களுக்கு சர்க்கரை நோய் இருந்தது எனக்கும் வர கூடாது என்று நினைப்பவர்கள் என அனைவரும் இந்த திருத்தல வழிபாடு செய்ய வேண்டும்.

சோதிடத்தில் ஆறாம் பாவகத்தை ருண ரோக சத்ரு ஸ்தானத்தை என சொல்லுவார்கள். அதே சிந்தனையில் இங்குள்ள ருண விமோச்சன லிங்க தேவரை ஞாயிறு, திங்கள் கிழமைகளில் , முறையாக வழிபாடு செய்ய நோய் கட்டுப்பாட்டில் வருவதுடன் நல்ல குணமும் கிடைக்கும் என்பதை உறுதியாக சொல்லலாம். குறிப்பாக அமாவாசை தினத்தில் தொடர் வழிபாடு, என சொல்வது வழக்கம்.

இருப்பினும், உங்கள் நம்பிக்கைக்குரிய சோதிடர் ஆலோசனைப்படி இங்கே, முறையாக வழிபாடு இயற்றி நோயில் இருந்து விடுதலை பெறலாம். என உறுதியாக நம்புங்கள்.

இந்த திருக்கோவிலில் மேற்கு பகுதியில் உள்ள அனுமாரை எண்ணி மாலை சார்த்தி வழிபட தொலைந்த பொருட்கள் கிடைக்கும் என்ற நம்பிக்கை இன்றளவும் உள்ளது. 

அம்பாள் சன்னதி கமலாம்பாள் என்ற திருநாமத்துடன் கலைமகள், மலைமகள், அலைமகள் என்ற முப்பெருந்தேவியின் அம்சமாக, தலையில் சந்திரனை சூடிய படி, தனியாக உள்ளது. இங்குள்ள நவக்கிரங்கள் ஒரே வரிசையில் தியாகராஜர் அருளை பெற வரும் பக்தர்களுக்கு நல்லனவே செய்ய காத்திருப்பது போல நின்ற கோலத்தில் இருக்கும். நவக்கிரக தோஷம் எள்ளவும் வராது என்பதால் தான் இந்த திருத்தலத்தை சர்வ தோஷ நிவாரண ஸ்தலம் என்று சொல்கிறார்கள். நவக்கிரக சன்னதியில் விநாயகர் அமர்ந்து அருள் பாலிப்பதால், “திருநள்ளாறு சென்றாலும் திருவாரூர் செல்ல வேண்டும்” என்ற சொல்லடை இன்றளவும் உள்ளது. 

இந்த கோவிலின் நந்தவன அழகு ரம்மியமான சூழலுக்கு நம்மை அழைத்து செல்லும்.

இந்த கோவிலை முறையாக வழிபாட்டு சுற்றி பார்க்க ஒரு நாள் ஆகும் அத்தனை பெருமைகளை கொண்ட இந்த திருக்கோவில் தினமும் காலை 5 மணி முதல் திறந்து இருக்கும். 

இந்த திருக்கோவிலை மனதால் எண்ணி, அன்பர்கள் வாழ்நாளில் ஒரு முறையேனும் இங்கு வந்து தியாகராஜனை வழிபட்டு வாழ்வில் எல்லா நலனும் பெற வேண்டுகிறோம். 

நல்லதே நினைப்போம். நல்லதே நடக்கும்.. 

- விசு அய்யர்

நலம் தரும் திருத்தலம்

“நலம் தரும் திருத்தலம்....” 

இன்றைய காலத்து பிள்ளைகளுக்கு பல மணி நேரம் உட்கார்ந்து கொண்டு, இருந்த இடத்தை விட்டு, கொஞ்சம் கூட நகராமல், கம்ப்யூட்டர் முன்னாடி உட்கார்ந்து, பக்கம் பக்கமாக சாப்ட்வேர் எழுத முடியும். சில மணி நேரம் விடாமல் மொபைலை தேய்க்க முடியும். அவர்களின் “அவருடன்”, மணிக்கணக்காக அலைபேசியில் பேச முடியும். 

ஆனால் பாருங்கள், காலையில் சீக்கிரம் எழுந்திருக்க சொல்லுங்க! அது முடியாதுங்க. சோம்பேறி தனமா? அல்லது இவர்களாகவே தங்கள் வாழ்க்கை முறையை இவர்கள் மாற்றிக் கொண்டார்களா? என்பது தெரியவில்லை. 

தூங்கி எழுந்ததும் கைகளை அந்த பக்கம் இந்த பக்கம் நகர்த்தி விட்டு உட்கார்ந்தால், சூடாக, காபி வந்து இருக்க வேண்டும் என நினைக்கிறார்கள். இது சரியா? தவறா? என்ற வாதத்திற்கு நாம் போக போவதில்லை. 

அரை நிமிட நேரம் கூட இறைவனை தியானம் செய்ய முடியவில்லையே என்று அருணகிரிநாதர் “சரண கமலாலயத்தை அரை நிமிட நேர மட்டில் தவ முறையில் தியானம் வைக்க அறியாத” என்று அருளி இருக்கும் போது, நம்மால் எப்படி என்று யோசிக்கிறீர்கள் புரிகிறது. 

காலம் தாழ்த்தல் (procrastination) கூடாது என உளவியலார் சொல்லி அறிவுறுத்திய போதும், நம்மால் இதை தவிர்க்க முடியவில்லையே என்ற வருத்தம் இல்லாமல் இல்லை. வாய்ப்புகளை தவற விட்ட பிறகு தான் சிலருக்கு அப்பவே இதை செய்து இருந்தால், என்ற ஞானம் பிறக்கும். சிலருக்கு கோபம் கூட வரும். 

இன்றைய கார்ப்பரேட் கலாச்சாரத்தில், எதையாவது செய்து “அந்த” இடத்தை அடைய வேண்டும். அது எந்த வழியாக இருந்தாலும் பரவாயில்லை என்று புதிய மரபுகள் வேறு நம்மை சுற்றி துரத்திக் கொண்டு இருக்கிறது. 

இதே சிந்தனையுடன் குடும்பத்திற்கு வந்தால், அங்கே நாம் நினைப்பதற்கு எதிராக எல்லாம் எதிர்பாராத விதமாக நடக்கும். விட்டுட்டு போகவும் முடியாமல், சேர்ந்து இருக்கவும் முடியாமல், பொறுமையுடன் பாரத்தை சுமந்து கொண்டு, மன அழுத்தத்தை அந்த பக்கம் இரத்த அழுத்தத்தை இந்த பக்கம் என பிடித்துக் கொண்டு, விழி பிதுங்கி நிற்பவர்களுக்கு தான் ஒரு ஆறுதல் தரும் தலத்தை பற்றிய குறிப்புகளை இந்த வாரம் சிந்திக்க கொண்டு வந்து உள்ளேன்.

யானை வழிபட்ட திருக்கோயில் உங்களுக்கு தெரிந்து இருக்கும். ஆம். திருவானைக்கா. குரங்கு வழிபட்ட தலம், அணில் வழிபட்டதலம், காகம் வழிபட்ட தலம் என உங்களுக்கு தெரிந்து இருக்கும். ஆம் அது, குரங்கணில் முட்டம். மயிலாக வழிபட்ட தலம், சென்னையில் உள்ள மயிலாப்பூர் இப்படி நிறைய சொல்ல முடியும். 

ஆனால் பாருங்கள் உருவத்தில் சிறிய உயிர். அது எங்கிருந்து வருகிறது என்று தெரியாது. எங்கே போகிறது என்று தெரியாது. எங்கே வாழ்கிறது என்று தெரியாது. ஆனால் ஒரு இனிப்பையோ, தின்பண்டத்தையோ தெரிந்தோ தெரியாமலோ போட்டு விட்டால் அடுத்த நொடியில் ஒரு கூட்டமாக வந்து நிற்கும். ஆம் அந்த உயிர், எறும்பு தான். 

சுறுசுறுப்பாக இருக்க உதாரணம் சொல்லும் அந்த எறும்பு வழிபட்ட திருத்தலம் இங்கே நம்ம தமிழ் நாட்டில் இருக்கிறது என்று சொன்னால் வியப்பாக இருக்கிறது அல்லவா..?

ஆம். இந்த திருத்தலத்து இறைவனுக்கு எறும்பீசர் என்பதே திருநாமம் ஆகும். இந்த கோவில் அமைந்த ஊருக்கு பெயர் எறும்பூர் தான். இறைவன் கொலு வீற்றிருக்கும் கோவிலை குறிப்பிடும் போது, “திரு” சேர்த்து சொல்ல வேண்டும் என்ற நியதிப்படி அது திரு எறும்பூர். அட போங்க அய்யா, இப்படி ஒரு ஊரா என்று உங்களுக்கு சிந்தனை வரலாம். 

திருச்சி மாவட்டத்தில் உள்ள திருவெறும்பூர் என்ற இந்த ஊரில்தான், எறும்பீசர் திருக்கோயில் இருக்கிறது. எத்தனை கோபம் கொண்ட மனிதராக இருந்தாலும் இந்த தலத்து இறைவனை முறையாக வழிபாடு செய்து வெளியே வந்தால், கோபம் இல்லாமல் போய்விடும் என்று சொல்வது போல அவர் நடத்தையில் மாற்றம் வருவதை காணலாம். 

அதற்காக ஒரு முறை போய்விட்டு வந்து ஆயுள் முழுவதும் மாறி விடுவார் என்று நீங்கள் நினைத்தால் உங்கள் கனவு, கானல் நீராக தான் இருக்கும்.

அப்பர் சுவாமிகள் அருளிச் செய்த திருக்குறுந்தொகை மற்றும் திருத்தாண்டகம் என இரு பதிகங்கள் பாடல் பெற்ற திருத்தலம் இது. 

இந்த திருத்தலத்தில் உள்ள ஸ்வாமிக்கு அபிஷேகம் கிடையாது. லிங்கம் எறும்புகள் வழிபட என புற்றாக இருப்பதால் நீர் ஊற்றி அபிஷேகம் செய்வதில்லை. எண்ணை காப்பு மட்டும் தான். எறும்புகள் வழிபட ஸ்வாமி குனிந்து கொடுத்ததால் லிங்கம் வட புறம் சாய்ந்து இருக்கும். தெற்கு நோக்கிய அம்பாள் சன்னதியும் சிரித்த முகத்துடன் நம்மை ஆற்றுப்படுத்த அருள்பாலிக்கின்றார்.

இந்த கோவில் கல்லை குடைந்து சுமார் 125 படிக்கற்களை கொண்டு கட்டப்பட்டுள்ளது. இரண்டு பிரகாரங்களை கொண்ட இந்த திருத்தலம் முழுவதும் கற்களால் கட்டப்பட்டு உள்ளது. கருவறை நுழைவாயில் இரண்டிலும் விநாயகர் திருவுருவ சிலை இருக்கிறது.

மலைக்கோயில் புராணப்படி இதற்கு பிப்பிலீச்வரர்  என குறிப்பிட பட்டுள்ளது. தென் திசை நோக்கிய அம்பாள் சன்னதி இவற்றுடன் கருவறைக்கு பின்புறம் முருகன் வள்ளி தெய்வயானையுடன் இருந்து அருள்பாலிக்கிறார்
சோதிட ரீதியாக பிதுர் சாபம் உள்ளவர்கள் (பிதுர் தோஷம் இல்லை), வீட்டில் மரண நிகழ்வின் போது, சடலத்தை வைத்துக் கொண்டு சண்டையிடுதல் அதனால் குடும்ப பகை வளர்த்தல் போன்ற மனதில் தீரா குடும்ப பகையை வைத்தல் போன்ற நிலையில் உள்ளவர்கள் இந்த கோவிலில் பரிகாரம் செய்யலாம்.

இந்த கோவிலில் உள்ள நவக்கிரகங்களில் தலைமை கிரகமான சூரியன் தனது இணைகள் எதிர் எதிரே இருக்கும்படி அமைந்து இருப்பது, குடும்ப பகை விலகி மனதில் அமைதி நிலவும் என்பதை குறிக்கும் படி அமைந்து இருக்கிறது.

கருவறைக்கு பின்புறம் உள்ள முருகன்சன்னதியின் கீழ் உள்ள, அறுகோண சக்கரத்தினை பூஜை செய்து முறையாக வழிபாடு செய்து வந்தால், உடல் சோர்வு, காலம் தாழ்த்துதல் போன்ற நிலையில் இருந்து நீங்கி, மன உற்சாகம் பெற்று தொடங்கிய காரியங்களில் வெற்றியே நிச்சயம் கிடைக்கும்.

உங்கள் நம்பிக்கைக்குரிய சோதிடர் ஆலோசனைப்படி அவர்கள் குறிப்பிட்டு சொல்லும் வழிபாட்டு முறைகளை நேர்த்தியாக செய்து பலன் பெற வேண்டுகிறோம்.

திரு எறும்பியூர் என்ற இந்த திருத்தலம் திருச்சி தஞ்சை சாலையில் உள்ளது. திருச்சி சத்திரம் பேருந்து நிலையத்தில் இருந்து பஸ் வசதிகள் உண்டு. சத்திரம் பேருந்து நிலையத்தில் இருந்து  சுமார் 15 கிலோமீட்டர் தொலைவில் உள்ள இந்த திருக்கோவில் திருவெறும்பூர் என்று நடைமுறை வழக்கத்தில் அழைக்கப்படுகிறது. அமைதியான சூழலில் கூட்டம் குறைவாகவே இருக்கும் இந்த திருக்கோயில் மலை ஏறி செல்லும்படி இருக்கும். மலையில் செல்ல சாலை வசதி இல்லை. நடந்து மலை ஏறி செல்ல முடியும். சிரமம் இருக்காது.

வாய்ப்பு கிடைக்கும் அன்பர்கள் அவசியம் ஒரு முறை இந்த திருத்தல பயணம் செய்து, பிதுர் சாபம் நீங்கவும், மனதில் உற்சாகம் பிறக்கவும் வாழ்வில் எல்லா நலனும் பெற்று வாழ வேண்டுகிறோம்..

நல்லதே நினைப்போம். நல்லதே நடக்கும்.

நாக பஞ்சமி பூஜை

நாக பஞ்சமி பூஜை 20-08-23

வழிபாடு