பலன் தருமா பரிகாரங்கள்

பலன் தருமா பரிகாரம்...?

இது வரை தொடர்ந்து மக்கள் ஆதரவு பெற்ற வாரம் ஒரு பரிகார தொடர் இந்த வாரத்துடன் நிறைவு பெறுகிறது. ஆனாலும் இந்த வாரம் பரிகாரம் ஏன் செய்ய வேண்டும் என்பதற்க்கான சில சிந்தனைகளை சொன்னால் இந்த பரிகார தொடரின் நோக்கமும் செயலும் எளிதாக மனதில் பதியும்.

நம்முடைய செயல்கள் அனைத்தும் கர்ம வினைகளாக விளையும். அது நல் வினைகளாகவும் இருக்கலாம். தீ வினைகளாகவும் இருக்கலாம். இந்த வினைக்குவியலின் செயல்பாடுகள்,  செயல்பாட்டிற்கு வரும் போது தான் நாம் அடைகின்ற இன்பமோ அல்லது துன்பமோ அமையும். அந்த வினைகளை அனுபவிக்கும் போதே இன்னும் சில வினைகளையும் செய்கிறோம். அதன் வினைப்பயன் வரும் காலங்களில் விளையும்.

எல்லோராலும் நாம் செய்த அத்தனை வினைகளையும் எடுத்த இந்த ஒரு பிறவியிலேயே அனுபவித்து தீர்க்க முடியாது. (அவ்வளவு வினைகள் செய்து இருக்கிறோம். செய்து வருகிறோம்)

பிறர்க்கு இன்னா முற்பகல் செய்யின் தமக்கு இன்னா

பிற்பகல் தாமே வரும்

 

என்பது தானே திருக்குறள். ஆனாலும் எந்த வினைகள் முதலில் வரும் எது பின்னால் வரும் என எப்படி தெரிந்து கொள்வது என்ற ஆவல் நம்மில் எல்லோருக்கும் உண்டு தானே. அதை வெளிகாட்டும் கருவி தான் பிறப்பு ஜாதகம்.

இந்த ஜாதக குறிப்புகளில் இருந்து எந்த வினை பயன் எப்போ நடக்கும் என்பதை தெரிந்து கொள்ள முடியும். இந்த வினைப்பயனை தருபவர் இறைவன். அந்த வினைப்பயனுக்கான ஆணையை செயல்படுத்தும் அலுவலராக இந்த கிரகங்கள் செயல்படும்.

அதனால் தான் ஜாதக குறிப்புகளை கொண்டு எந்த வினை எப்போ நிகழும் என்று திறமை பெற்ற சோதிடர்களால் சொல்ல முடியும். ⁠⁠⁠அந்த கிரகங்கள் நகர்வதை கொண்டே நமக்கு எந்த வினை முதலில் வரும்.. எந்த வினை பிறகு வரும் என அறிய முடியும்..

 

நம்முடைய வினைகளை பார்க்க வேண்டுமானால் ஒரு பெரிய பூகோள மூட்டையே இருக்கும்...  அதனால் அதில் இருந்து எந்த வினை முதலில் வரும் என தெரியவேண்டாமா அதற்க்கு தான் சோதிடம் பார்க்க வேண்டும்..

அதெல்லாம் சரி தான் ஐயா. நாம் ஏன் பரிகாரம் செய்யணும். அப்படி பரிகாரம் செய்தால் எப்படி இந்த வினை பயனில் இருந்து விடுதலை பெற முடியும் என்பது தான் உங்கள் கேள்வியாக இருக்கும் இல்லையா?

இறைவன் திருக்கருணை நிறைந்தவர். இது விதிக்கப்பட்டது இதை அனுபவித்து தான் தீர்க்க வேண்டும். என்று சொல்வது இறைவன் கருணை இல்லாதவன் என்று சொல்வது போல் ஆகி விடும். உயிர்களின் இயல்பே தவறு செய்வது தான். அந்த தவறுக்குக் வருந்தி திருந்தினால் எந்த உயிருக்கும் கருணை நிறைந்த இறைவன் நல் வழி காட்டுவான். இதனை திருக்குறள்

ஏற்றென்று இரங்குவ செய்யற்க செய்வானேல்

மற்றன்ன செய்யாமை நன்று

 

இப்படி சொல்லும் போது நம்மால் மறுக்க முடியுமா? கடவுள் கொள்கையில் மாற்று கருத்து உள்ளவர்கள் கூட இதை மறுக்க மாட்டார்கள்.

அதனால் தான் நாம் அதனை “பரிகாரம்” என்று நமக்கு தெரிந்த மொழியில் சொல்லிக் கொண்டு செய்த வினைகளுக்கு வருத்தம் தெரிவித்து வழிபாடு செய்கிறோம். கர்ம வினைகளை அனுபவிக்க வேண்டிய ஆணை போடுபவன் இறைவன்; அதனை செயல்படுத்துபவர் கிரகங்கள்.

எனவே தான் யார் ஆணையிட்டார்களோ அவர்களிடமே போய் செய்த வினைகளுக்கு வருத்தம் தெரிவித்து ஆணையை மறு பரிசீலனை செய்ய வேண்டுதல் வைக்கிறோம். அது தான் பரிகாரம்.

யார் ஆணையினை போட்டார்களோ அவர்களால் மட்டும் தான் ஆணையை மாற்ற முடியும். இது இன்றும் நடைமுறை வாழ்க்கையில் உள்ளதை நாம் அனுபவத்தில் அறிய முடியும். அதனால் தான் ஆணை இட்ட ஆண்டவனிடம் நாம் செய்யும் வழிபாடு அல்லது பரிகாரம் மூலம் அந்த ஆணை மாற்ற படலாம். அதனால் தான் அதனை செயல்படுத்தும் நவ கிரகங்கள் அவர்கள் வைத்திருக்கும் ஆணை என்ன என்பதை சோதிடர்கள் ஜாதகம் வழி அறிந்து கொண்டு ஆணையிட்டவரிடம் முறையீடு செய்ய ஆலோசனை சொல்கிறார் (அது தான் பரிகாரம்).

வருந்தி முறையீடு செய்வதால் அந்த ஆணை மாற்ற படும் போது பரிகாரத்தினால் பயன் கிடைக்கிறது என நம் மொழியில் சொல்லி புரிந்து கொள்ள முடிகிறது. செய்த வினைகளுக்கு கழுவாய் இல்லை என்றால் இறைவனை கருணை அற்றவன் என்று சொல்லும் பாவத்திற்கு நாம் ஆட்படுவோம்.

“அல்லல் என் செய்யும் அருவினை என் செய்யும்”

என்பது அப்பர் வாக்கு.

“அவை நல்ல நல்ல அடியார் அவர்க்கு மிகவே”

என்பது சம்பந்தர் வாக்கு

“நாள் என் செய்யும் வினை தான் என் செய்யும்”

என்பது கந்தர் அலங்காரம்.

 

இப்படி பெரியவர்கள் சொல்லும் போது எல்லா பிரச்சனைக்கும் தீர்வு உண்டு என்பதை உணர முடிகிறதா? அதை நாம் முறைப்படி செய்கிறோமா என்பதில் தான் நம் அறிவு செயல்படுகிறது. அதனால் பரிகாரங்களுக்கு கட்டாயம் பலன் உண்டு. நாம் சொல்லும் பரிகார முறை தொடரின் முதல் பகுதியில் சொன்னது போல ஒழுக்க முறை, தமிழ் பாடல், விருட்ச ஸ்பரிசம், உணவு பழக்கம், ஆலய தரிசனம், இது தவிர சில சடங்குகள் என்ற வகையில் இருக்கும்.

ஞானம் பெற்ற சோதிடர்கள் ஒவ்வொரு நிலைக்கும் தனி தனியாக பிரித்து சொல்லும் பரிகாரங்களை   நம்பிக்கையுடன் செய்தால் பரிகாரம் நிச்சயம் பலன் தரும். அதனால் தான் அவைகளை பலன் தரும் பரிகாரம் என்று இது வரை வாரம் ஒரு பரிகாரம் என்ற தொடரில் வாசகர்களின் நல்லாதரவுடன் பார்த்தோம்.

அதனால் பரிகாரங்களை பரிகாசம் செய்யாமல் சொன்னபடி சொன்னதை செய்தால் பலன் உண்டு என்பதை உணர்ந்து கொள்ளுங்கள்.

நல்லதே நடக்கும். நலம் பெற வேண்டுகிறோம். நல்வாழ்த்துக்கள்.

பலன் தரும் பரிகாரம் - வழக்கில்லா வாழ்க்கைக்கு வழி

 

வழக்கில்லா வாழ்க்கைக்கு வழி

சிலருக்கு இப்படி தான் வாழ்க்கை இருக்கும். எப்போதும் ஏதாவது வழக்கு இருக்கும். சிலருக்கு ஆயுள் முழுதும் ஏதாவது ஒரு வழக்கு இருக்கும். இப்படி தினம் தினம் வழக்குகளுடன் வாழ்க்கை நடத்துவார்கள்.. இன்னும் சிலரோ, ஒரு வழக்கு ஏதாவது வழக்கு வந்தாலே.. தினமும் தூக்கம் கெட்டு, மன அழுத்தத்தில் இருப்பார்.

இன்னமும் சிலரோ தேவையில்லாமல் வழக்கு போட்டு மற்றவர்களை வம்புக்கு இழுப்பார்கள். எப்படியோ வழக்கு வந்து விட்டாலும் அதில் வெற்றியே பெற்றாக வேண்டும் என்று நினைப்பவர்களும் உண்டு.

நமக்கு என்ன என யாராலும் வழக்கு வந்தால் சும்மா இருக்க முடியுமா? அது பொய் வழக்காக இருந்தாலும் அதை தள்ளியோ காலம் தாழ்த்தவோ முடியாது. சரி.. யாருக்கு எல்லாம் இந்த வழக்கு வரும். என்றும் அதை சமாளிக்க பரிகார குறிப்பும் என்ன என்பதை பார்க்கலாம்.

6, 8, 12க்குரியவர்கள் 10-ல் இருந்தால் வம்பு-வழக்குகள் வரும். 2க்குரியவன் குரு, புதன், சுக்ரனோடு ஒன்றுசேர்ந்து மறைவிடங்களில் இருந்தால், பொருள் மற்றும் பணம் பற்றிய வழக்குகள் இருக்கும்.

ராகுவும், சூரியனும் 7-ல் இருந்தால், பெண்கள் வழி வழக்குகள் வரலாம். சந்திரனோடு சர்ப்ப கிரகம் சேர்ந்தால், வழக்குகளால் விரயமாகும் நிலை ஏற்படும்.

லக்னாதிபதி பலமில்லாது லக்னத்தில் பாபியும் இருந்து விட்டால் அவ்வளவு தான் வழக்குகளால் உடல் நல குறைபாடும்  தேவையில்லாத கவலையும் உருவாகும். 

3 மற்றும் 4-ம் வீட்டுக்குரியவன் பலமிழந்தால், அந்த கிரகத்தின் தசை வரும் போது, உடன்பிறந்தோருடன் சொத்து விஷயமாக பிரச்னைகளும் பிரிவுகளும் ஏற்படும்.

6-ம் குரியவன் பலம் இழந்து தசை நடத்தும் போது... (அறி)முகம் தெரியாதவர்கள் மூலம் வழக்கு மற்றும் சொத்துக்கள் இழப்பும் இப்படி இருக்கலாம். 

10-க்கு உரியவன் பலவீனமானால் அந்த தசை நடக்கும் போது எல்லைப் பிரச்னை தொடர்பான வழக்குகளும் இழப்புகளும் வரலாம்.

12-ம் வீட்டுக்குரியவன் பலமிழந்து தசை நடந்தால் அது சமயம் வழக்குகளுக்கு பயந்து வெளிதேசத்துக்குச் செல்ல நேரிடும். அதன் தொடர்பாக சொத்துக்கள் பறிபோகவும் வாய்ப்பு உண்டு.

12 ம் அதிபதி பலம் இழந்து 9-ம் அதிபதி பன்னிரண்டில் அமர்ந்தாலும் கடன்பட்டு வழக்கை நடத்திச் செல்ல வேண்டி இருக்கும்.

      இப்படி வழக்கு வந்து விட்டதே என வருந்த வேண்டாம். ஒவ்வொரு விதமான வழக்கிற்கும் ஒவ்வொரு விதமான பரிகாரம் உண்டு. என்றாலும் எல்லோரும் எளிமையாக புரிந்து கொண்டு மாற்று வழி தேடினால் வெற்றியே கிடைக்கும்.

      மதுரையை அடுத்த சோழவந்தான் பகுதியில் உள்ளது திருவேடகம் என்ற ஊர். இங்கு ஏலவார்குழலி உடனுறை ஏடகநாதர் திருக்கோயிலில் அதிகாலை அபிஷேகம் செய்து புதிய வஸ்த்திரம் சார்த்தி வாழிபாடு செய்ய வேண்டும்.தொடர்ந்து (1+16) 17-வாரங்கள் தொடர்ந்து செய்து வந்த பின் மதுரையை சுற்றி நான்கு திசைகளிலும் உள்ள திருக்கோயில் வழிபாடு செய்து வந்த பின் வழக்கில் திருப்பம் ஏற்படும். எந்த நிகழ்வால் வழக்கு வந்தாலும் இந்த பரிகாரம் செய்யலாம்.

இதே போல் முறைப்படி வேல் அர்ச்சனை தொடர்ந்து செய்து வர வழக்குகள் சாதகமாகவும் விரைவாகவும் முடியும். சிலருக்கு  சித்தர் சாமதிகளுக்கும் அதிஷ்ட்டானங்களுக்கும் சென்று பிரார்த்தனை செய்தாலும் அமைதியும் தீர்வும் கிடைக்கும்.

               பெண்களால் வந்த வழக்கு என்றால் கண்ணாடி பயிற்சி செய்யலாம். இப்படி ஒவ்வொரு வித வழக்கிற்கும் சரியான பரிகாரம் தேர்வு செய்து நம்பிக்கையுடன் செய்து வந்தால் பயன் கிடைக்கும்.

எல்லோருக்கும் வசதியாக திருஞானசம்பந்தர் தன் திருக்கரத்தால் எழுதி அமைத்த

வாழ்க அந்தணர் வானவர் ஆனினம்
வீழ்க தண்புனல் வேந்தனும் ஓங்குக
ஆழ்க தீயது எல்லாம்அரன் நாமமே
சூழ்க வையகமும் துயர் தீர்கவே.

என்ற இந்த திருப்பாசுரத்தை தினமும் படனம் செய்து வந்தால் மனதில் மாற்றம் மற்றும் அமைதி வரும்.

உங்கள் நம்பிக்கைக்குரிய சோதிடரை அணுகி ஜாதகத்தை ஆய்வு செய்து வாழ்கின் நிலை அறிந்து தீர்வு பெற்று வாழ இறைவனை வேண்டுகிறோம்.

நல்லது சொல்லி உள்ளது நல்லதே நடக்கும். நல்வாழ்த்துக்கள்.

பலன் தரும் பரிகாரம் - பிள்ளை வரும் பெற்றுத் தரும் பனை

 

பிள்ளை வரம் பெற்று தரும் பனை

இப்போதெல்லாம் பிள்ளைகள் திருமண காலத்தை தள்ளி வைத்து விடுகிறார்கள். வாழ்க்கையில் ஒரு நல்ல நிலையில் செட்டில் ஆகிய பிறகு தான் திருமணம் என இவர்களே தள்ளி வைத்து விடுகிறார்கள். சிலருக்கு பல் வேறு சூழலின் காரணமாக அதுவே தள்ளி போகிறது.

சரி... எப்படியோ திருமணம் ஆகிவிட்டது என்றதும், திருமணம் ஆன உடன் பிள்ளை மணி வயிறு வாய்க்க பெற வேண்டும் என பெற்றோர்கள் நினைப்பார்கள். இதிலும் சில தம்பதிகள் இருவரும் வேலை பார்க்கும் சூழல் நேரம் இவைகளை அனுசரித்து அது தள்ளி வைக்கப்படுகிறது அல்லது தள்ளி போகிறது.

இப்படி இந்த சூழல் நடப்பதற்கு எல்லாமே ஜாதக அமைப்பு தான் காரணம் என்றாலும் உரிய பலன் கிடைக்க வேண்டும் என நினைப்பது நியாயமான ஆசை தானே. அவர்களுக்காக தான் இந்த வார பரிகாரம். இதில் மணிவயிறு வைப்பதற்கான பரிகாரம் மட்டும் பகிர்ந்து கொள்ளலாம். கரு தங்குவதற்கு ஆரோக்கியமான பிரசவத்திற்கு என ஒவ்வொரு நிலைக்கும் ஒரு வித பரிகார அமைப்பு உண்டு அதனை வரும் வாரங்களில் பகிர்ந்து கொள்ளலாம்.

முன்பெல்லாம் குடும்பத்தில் நிறைய உறுப்பினர்கள் இருப்பார்கள். அது நாம் இருவர். நமக்கு இருவர் என்ற நிலை மாறி “நாமே இருவர் நமக்கு போதுமே ஒருவர்” என்ற நிலைக்கு கால சூழல் நம்மை மாற்றி விட்டது. சகோதரன் – சகோதரி என்ற உறவே வரும் காலங்களில் இல்லாமல் போயிடுமோ என்று சிந்திக்கும் நிலைக்கு நாம் தள்ளப்பட்டு இருக்கிறோம்.

பொதுவாக பிள்ளை பேறு அமையாமல் தள்ளி போவதற்கு சர்ப்ப தோஷம் பித்ரு தோஷம் பிராமண தோஷம் அல்லது பிரேத தோஷம் இவைகளுள் ஒன்று ஏதாவது ஒரு வகையில் தொடர்பு பெற்று இருக்கும். இதற்க்குக் முன்பெல்லாம் ராமேஸ்வரத்தில் நாக பிரதிஷ்டை செய்வார்கள். இப்போது அவை அநேகமாக செய்வதில்லை. இவைகளுக்கு தனியான பரிகாரம் செய்வதுடன் மணி வயிறு வாய்க்க குறிப்பாக சொல்லும் பரிகாரங்களை கட்டாயம் செய்ய வேண்டும். அப்போது தான் சாதகமான சூழல் அமையும். அதற்கு முன் ஜாதக ரீதியாக சில குறிப்புகளை தெரிந்து கொள்ளுவோம்.

5மிடத்தில் சர்ப்ப கிரகங்கள் இருந்தாலும் பகை கிரகத்துடன் தொடர்பு கொண்டாலும் இந்த பேறு அமைவதில் தடை ஏற்படும். 5க்கு உரியவன் 3இல் இருந்தாலும் 10க்கு உரியவன் 8இல் இருந்தாலும் தோஷம் தான். 5க்கு உரியவன் 12இல் இருந்தால் அடிக்கடி கரு சிதைவு ஏற்படும்.

தாம்பத்ய உறவு காலம் சேர்க்கை என பல நிலையில் இருந்து சொல்ல வேண்டும். இதில் பல நுணுக்கமான செய்திகள் உள்ளது. அதனால் தான் முன்பெல்லாம் திருமண முகூர்த்தத்திற்கு நேரம் குரிப்பார்களோ இல்லையோ, சாந்தி முகூர்த்தத்திற்கு நேரம் குறிப்பார்கள். இப்போது இது இருக்கிறதா என்பது தெரியவில்லை. இவை எல்லாம் இப்போ வெறும் சடங்காக போய்விட்டது. அன்று இரவு பயணம் செய்ய கையில் விமான டிக்கெட் உடன் திருமணம் செய்து கொள்ளும் தம்பதிகளை நான் பார்த்திருக்கிறேன்.

இந்த புத்திர பாக்கியமே ஏற்படாமல் தடை உள்ளவர்கள், பனையை தல விருட்சமாக கொண்ட தலங்களை பூஜித்து வழிபடலாம். பூர்வ புண்ணிய ஸ்தானமாக சொல்லப்படும் 5ம் இடத்தை குறிப்பது போலவே பனையை தல விருட்சமாக கொண்ட திருத்தலங்கள் ஐந்து மட்டுமே என  தேவார தலங்கள்  குறிப்பிடுகின்றன.

இதில் காஞ்சிபுரத்தை அடுத்த செய்யாறு அருகில் உள்ள வேதபுரீஸ்வரர் ஆலய தரிசனம் செய்ய வேண்டும். இங்கு நாக லிங்க அபிஷேகம் செய்ய வேண்டும். 11தலை உள்ள இந்த சர்ப்பத்திற்கு சனிக்கிழமை அன்று ராகுகாலத்தில் சர்ப்ப ஷாந்தி செய்து இங்குள்ள சுவாமிக்கும் அம்பாளுக்கும் புதிய வஸ்திரம் வாங்கி சார்த்த வேண்டும். மகா மண்டபத்தில் இருந்து ஒரு சேர தல விருட்சத்தை தரிசனம் செய்து திரும்ப வேண்டும். அப்போது தான் பலன் கிட்டும். இம்மரத்து பழத்தை சாப்பிட்டால் மணி வயிறு வைக்க பெறுவார்கள். இதனை வெளிநாட்டு தமிழ் அன்பர்களும் விரும்பி வேண்டி கேட்டு பெற்று செல்கிறார்கள்.

பல திருக்கோயில்களில் சூரிய ஒலி வருடத்தில் சில நாட்கள் மட்டும் சுவாமியின் திருமேனியில் பதியும் என்பதை நம்மில் பலரும் அறிவோம். ஆனால் இங்கு மட்டும் தான் தினமும் திருமேனியில் சூரிய ஒளி பதியும். பல அதிசயங்களை கொண்ட இத் திருத்தலம் உறுதியான பலனை தரக்கூடிய உத்தமமான திருத்தலம்.

இத்தனை தூரம் செல்ல வேண்டுமா? எங்களுக்கு லீவு கிடைப்பதே கஷ்டம். என்று தனக்குள்ளே பேசிக் கொள்பவர்கள், “வேற்குழவி வேட்கை”யை ராகம் பிசகாமல் தாலாட்டாக முறையாக பாடினால் குடும்ப வாரிசு வீட்டில் தவழும்.

பேய் அடையா பிரிவு எய்தும்  “பிள்ளையினோடு” உள்ளம் நினைவு 

ஆயினவே “வரம் பெறுவர்” ஐயுற வேண்டாம் ஒன்றும்
வேயனதோள் உமைபங்கன் வெண்காட்டு முக்குளநீர்
தோய் வினையார்  அவர் தம்மைத்  தோயாவாம்  தீவினையே.

 

என்ற திருஞான சம்பந்தர் அருளிய திருவெண் காட்டு பதிகத்தை தினமும் பக்தியோடு படனம் செய்து வரவேண்டும். இத்துடன் வெள்ளிக்கிழமை தோறும் பாலகர்களுக்கு சுத்தமான பசும்பால் குடிக்க கொடுக்க வேண்டும்.

எந்த கிரகத்தினால் பாதிப்பு என்பதை அவரவர்கள் ஜாதகம் கொண்டு அறிந்து தினமும் சாப்பிடும் உணவு முறையில் கணவன் மனைவி இருவரும் சில மாற்றங்களை செய்து கொண்டுவிட்டால், சாதகமான சூழல் ஏற்பட்டு அவர்களுக்கு சந்தான பாக்கியம் கிடைக்கும்.

உங்கள் நம்பிக்கைக்குரிய சோதிடரை அணுகி ஜாதகத்தை ஆய்வு செய்து உரிய பரிகாரங்களை செய்யுங்கள். விரும்பியதை பெற்று மகிழ்ச்சியுடன் வளமுடன் வாழ இறைவன் திருமுன் வேண்டுகிறோம்.

நல்லது சொல்லி உள்ளது நல்லதே நடக்கும். நல்வாழ்த்துக்கள்.

பலன் தரும் பரிகாரம் - விரும்பிய பாடத்தில் வெற்றி பெற..

 

விரும்பிய பாடத்தில் வெற்றி பெற...

‘பரீட்சை முடிந்தது’ என நிம்மதியாக இருக்க முடியவில்லை. கோடைகால கல்வி ஒரு பக்கம். அடுத்து விரும்பிய மேல் படிப்பு கிடைக்கவேண்டும் என்பது இன்னொரு பக்கம்.. அதை விட முக்கியம் நாம் கேட்கும் அந்த கல்லூரியில் இடம் கிடைக்க வேண்டும். இப்படி பல சூழலை சந்திக்க வேண்டியிருக்கும்.

முன்பெல்லாம் படிப்பு பட்டம் அதற்க்கு தான் முக்கியத்துவம் இன்றைய நாளில் படிக்கும் கல்லூரிக்கும் முக்கியத்துவம் உண்டு. காரணம் கேம்பஸ் இன்டர்வியூவில் சிலருக்கு நல்ல வேலை கிடைத்து விடுகிறது. வேலை தேட வேண்டிய அவசியம் இல்லாமல் போய்விடுகிறது.

அதெல்லாம் சரி. நாம வாங்கற மதிபெண்ணுக்கு இந்த துறை படிப்பு கிடைக்குமா? இந்த கல்லூரியில் கிடைக்குமா? அது கிடைக்க என்ன செய்ய வேண்டும்.அதை சொல்ல வருவது தான் இந்த வார பரிகாரம்.

‘படிப்பா?’, ‘அறிவா?’ என்ற இந்த போட்டியில் ஒன்றை ஒன்று வெற்றி பெற போட்டி போடுகிறது. நமக்கு சாதகமான சூழலை நாம் தான் அமைத்துக் கொள்ள வேண்டும்.

கல்விக்கு காரகத்துவம் தருபவர் புதன். இந்த கிரகம் எந்த வகையில் பலம் பெற்று இருக்கிறது யாருடன் இணைவு பெற்று இருக்கிறது என்பதை தெரிந்து கொண்டு நாம் படிக்கும் முயற்சியை முடிவு செய்ய வேண்டும். பட்ட படிப்புக்கு 4ம் இடத்தையும்,  9ம் இடத்தை மேற் படிப்புக்கும் வைத்து அறிந்து கொள்ளலாம். இத்துடன் 2,மற்றும் 5மிட பலம் அறிவதும் முக்கியம்.

படிக்க விரும்பும் பலருக்கும் பொதுவாக புத ஆதித்ய யோகம் இருக்கும். சந்திரனுக்கு கேந்திரத்தில் புதன்  - குரு இருந்தால் நாம் விரும்புகிற உயர்கல்வியை பெற்று அதில் சாதிக்க முடியும்.

ஐஏஎஸ், ஐபிஎஸ் போன்ற அரசு சம்பந்தமான உயர் அதிகார பதவியில் அமர்வதற்கு சூரியன்,  சந்திரன், செவ்வாய் போன்ற கிரகங்களின் பலம் அவசியம்.

கம்ப்யூட்டர் இன்ஜினியர் ஆவதற்கு லக்னாதிபதி பலம் இருப்பது சாதகமாகும். லக்னம்  4,9,10 ஆகிய இடங்களில் ராகு இருப்பது நலம் தரும்.

கணக்கு சம்பந்தமான படிப்புகள், ஆடிட்டிங் படிப்பு அக்கவுன்டன்சி போன்றவற்றில் தேர்ச்சி பெற லக்னாதிபதி மற்றும் சந்திரன் பலம் பெறவேண்டும்.

சட்ட படிப்புக்கு லக்னம், லக்னாதிபதி, 2-ம் இடம், 2-ம் அதிபதி, இவை பலம் பெற்று இருக்க வேண்டும்.

மருத்துவ படிப்புக்கு கேது லக்னத்துக்கு 4,9,10 ஆகிய இடங்களில் அமைவது நல்லது.

இன்ஜினியரிங் படிப்புக்கு ஜாதகத்தில் சனி, புதன், செவ்வாய் ஆகிய கிரகங்கள் ஒன்றுடன் ஒன்று சேர்ந்தோ, இணைவு அல்லது பார்வை பெற்றோ இருப்பது நல்லது.

 சமையல் கலை  – கேட்டரிங் தொடர்பான படிப்பதற்கு சூரியன், சந்திரன், செவ்வாய் சாதகமாக இருப்பது அவசியம்.

இன்றைய நாளில் படிப்புகள் பல விதமாக இருப்பதால் ஆழ்ந்து சிந்தித்து இன்றைய நடைமுறைக்கு ஏற்ப தேர்வு செய்து மாணவர்களை ஊக்குவிக்கும் முயற்சியை கைகொண்டால் படிப்பின் மீது மாணவர்களுக்கும் ஆர்வம் ஏற்படும். பெற்றோர்களுக்கும் அது சுமையாக இருக்காது.

பெற்றோர்களும் அவர்கள் விரும்பும் படிப்பை பிள்ளைகளின் விருப்பம் இன்றி படிக்க சொல்வதும் ஆரோக்கியமான சூழலை ஏற்படுத்தாது. இதனை அறிந்து கொண்டு, பெற்றோர், ஆசிரியர், மாணவர், உளவியல் மருத்துவர் மற்றும் சோதிடர்களின்  ஆலோசனையையும் பெறுதல் இன்றைய நாளில் அவசியமாகிறது.

மாணவர்கள் விரும்பிய கல்லூரியில் விரும்பிய பாடம் எடுத்து படிக்க பொன்அமராவதி சாலையில் உள்ள பிரான்மலையில் இருந்து அருள் பாலிக்கும் கொடுங்குன்ற நாதரை வெள்ளை வஸ்திரம் சார்த்தி வழிபாடு செய்யுங்கள். இந்த திருக்கோயில் மலை மீது உள்ளது. மாதோர்பாகனாய் இருக்கும் இந்த சிவனை “வேத சிவன்” என்றே அழைகின்றனர். இது பல அதிசயங்களை கொண்ட அற்புதமான திருத்தலம். வாழ்நாளில் அவசியம் ஒரு முறையாவது செல்ல வேண்டிய திருத்தலத்தில் இதுவும் ஒன்று.

இத்துடன், திருஞானசம்பந்தர் அருளிய

சுற்றமொடு பற்றவை துயக்கற அறுத்துக்      

குற்றம் இல் குணங்களொடு கூடும் அடியார்கள்

மற்றவரை வானவர் தம் வானுலகம்  ஏற்றக்  

கற்றவன் இருப்பது கருப்பறிய லூரே.

 

என்ற திருப்பதிகத்தை தினமும் அதிகாலையிலும் அந்தி சாயும் மாலையிலும் நேரம் ஒதுக்கி படனம் செய்ய வேண்டும். இன்றைய நாளில் கம்ப்யூட்டர் இன்டர்நெட், ஸ்மார்ட் போன் தொலைக்காட்சி என பல கவன சிதறல்கள் இருந்தாலும் இறைவழிபாட்டிற்கு என சில மணி நேரம் ஒதுக்குதல் நம்மை வளபடுத்திக் கொள்ள உதவும்.

திருமுறை படனம் மட்டுமாவது அவசியம் படிக்க வேண்டும். இன்றைய இளைய தலைமுறைகள் தமிழ் படிக்க சிரம படுவதால் இதனை transliteration செய்து படிக்கலாம். நடைமுறை டெக்னாலஜிக்கு தகுந்தார் போல ஆடியோவில் கேட்கலாம். ஆனால் வழிபாட்டை மட்டும் எப்போதும் விட கூடாது.

படிப்புக்கும் பரிகாரத்திற்கும் என்ன தொடர்பு என சில இளைய தலைமுறையினரும் சிந்திக்கலாம். இந்த பரிகாரம் செய்தால் நீங்கள் “ஓஹோ என மதிப்பெண் வாங்க முடியும்” என சொல்ல வில்லை. ஆனால் உங்கள் முயற்சிக்கு சாதகமான சூழலை ஏற்படுத்தி தரும்

அது தான் பரிகாரம். சாதகமான சூழலில் உங்கள் முயற்சி உண்மையாக இருக்கும் போது வெற்றி நிச்சயம் உங்கள் பக்கம் தானே. மூட்டு வலிக்கு வயிற்றிருக்கு ஏன் மாத்திரை சாப்பிடுகிறோம் என கேட்பதில்லை அல்லவா. பலன் தரும் பரிகாரங்கள் மூட நம்பிக்கை இல்லை. அதனால் அதனை செய்யாமல் தவிர்ப்பதும் ஆரோக்கியமானது இல்லை.

உங்கள் முயற்சி வெற்றி பெற உங்களுக்கு சாதகமான சூழல் அமைந்து விரும்பிய நிலை அடைந்திட  உங்கள் நம்பிக்கைக்குரிய சோதிடரை சந்தித்து அவர் சொல்லும் பலன் தரும் பரிகாரங்களை செய்து பயன் பெறுங்கள். நல்லது சொல்லி உள்ளது நல்லதே நடக்கும். நல்வாழ்த்துக்கள்.

பலன் தரும் பரிகாரம் - தடைகளுக்கான விடை

 

தடைகளுக்கான விடை ..?

எந்த ஒரு செயலுக்கும் முயற்சியும் சில பயிற்சியும் அவசியம் என்பதை யாரும் மறுக்க மாட்டார்கள். ஆனாலும் நம் முயற்சிகள் எல்லா சமயங்களிலும் வெற்றியை தருகிறதா என்றால் பலருக்கும் பதில் இல்லை என்பதாகவே இருக்கும்.

நம்மை சமாதனபடுத்த இதற்க்கு எத்தனை காரணங்களை நாம் சொன்னாலும் முயற்சிகள் வெற்றிக்கனியை தராத போது நமக்கு ஏற்படும் வருத்தத்தை யார் சமாதனம் சொன்னாலும் ஏற்றுக் கொள்ள மனம் வராது.

குறை பிரசவத்தில் பிள்ளையை பெற்றுக் கொண்ட தாயாகட்டும், பங்கு சந்தையில் பணம் போட்டு முதல் இழந்தவராகட்டும், இன்டர்வியூ வில் தோற்று போன வேலை தேடும் இளைஞர் ஆகட்டும், இப்படி யாராக இருந்தாலும் இந்த தடைகளை தவிர்க்க முடியுமா என்று ஏங்கி தவிப்பவர்களுக்காக தான் இந்த வார பரிகார ஆலோசனை.

தன்வலிமை, செயலின் வலிமை, பகைவரின் வலிமை துணையாக நிற்பவரின் வலிமை என எல்லாவற்றையும் ஆராய்ந்து செயலில் இறங்க வேண்டும் என்று வள்ளுவம் சொல்கிறது. இதை எல்லாம் ஆராய்ந்து பார்த்து செய்வதற்கு பொறுமையோ, அவசரமான இந்த உலகத்தில் நேரமோ, அதற்கான போதிய அறிவோ நமக்கு இல்லை.

இதை தவிர்க்கத்தான் விநாயகரை வழிபட்டு செயலை தொடங்க வேண்டும் என்று சொல்லுவார்கள். ஆனாலும் இதையெல்லாம் நாகரீகம் என்ற போலியான வளர்ச்சியில் விரும்பியோ விரும்பாமலோ தள்ளி வைத்து விட்டோம். ஆனாலும் பிரச்சனை என்று வரும் போது ஏதாவது தீர்வு கிடைக்காதா என ஏங்குவதும் தவிர்க்க முடியாதது தான்.

சோதிட ரீதியாக சனி கேது தொடர்பு இருக்கும் போது தொழில் தடை ஏற்படும். சனி இருக்கும் இடத்தில் இருந்து 1259 ஆகிய இடங்களில் கேது இருந்தாலும் கோச்சாரத்தில் இருந்தாலும் சுழற்சி முறையில் இருந்தாலும் தொழிலில் தொய்வும் தடையும் ஏற்படும்.

10ம் இடம் பலமாக இருந்தால் தொழில் விருத்தி உண்டு. அதனால் தான் 10இல் ஒரு கிரகமாவது இருக்க வேண்டும் என்று சொல்லுவார்கள். 4 இல் கிரகம் இருந்தாலும் பரவாயில்லை அது 10மிடத்தை பார்க்கும் அதனாலும் தொழில் பலம் உண்டு.

சரி இந்த தடைகள் நீங்க அல்லது தொழில் தடை ஏற்படாமல் இருக்க என்ன செய்ய வேண்டும் என நினைப்பவர்கள்

ஆண்டுக்கு ஒரு முறையாவது ஆலய தரிசனம் செய்ய வேண்டும். தடைகளை களைந்து விடைகளை தரும் திருநெடுங்கள நாதரை தரிசித்து பூமாலை சார்த்தி வழிபாடு செய்ய வேண்டும்.

என்னுடைய தொழிலை நான் தான் பார்க்க வேண்டும் இதை விட்டுட்டு போக முடியலை சாமி என சொல்பவர்கள் தினமும் காலை மாலை இரு நேரமும் ஒரு சொம்பில் கங்கை நீரை வைத்து வணங்கி

மறை உடையாய்! தோல் உடையாய்! வார்சடை மேல் வளரும்

பிறை உடையாய்! பிஞ்ஞகனே!” என்று உனைப் பேசின் அல்லால்,

குறை உடையார் குற்றம் ஓராய்! கொள்கையினால் உயர்ந்த

நிறை உடையார் இடர் களையாய் நெடுங்களம் மேயவனே

 

என்ற இடர் களையும் பதிகம் தினமும் படனம் செய்ய வேண்டும். இத்துடன் தொழில் நடத்தும் இடங்களில் தன ஆகர்ஷன எந்திரம் செப்பு அல்லது வெள்ளி தகட்டில் வரைந்து திருவிளக்கு ஏற்றி பூஜித்து வர வேண்டும். இதற்க்கு வாய்ப்பு இல்லாதவர்கள் பண பெட்டியில் சஸ்த்திர பந்தம் வைத்து தொழில் நடத்தி வர தொழில் தடை இல்லாமல் நடை பெறும். இது வேல் வடிவில் இருக்கும் பாதுகாப்பு பந்தம் இதனை பையில் வைத்திருந்தாலே போதும். மாற்று மதத்தினர் கூட இதனை பயன் படுத்தி பலன் பெற்று உள்ளனர்.

ஜாதகத்தில் விதிக்கப்பட்ட தொழில் என்ன? நாம் செய்யும் தொழில் என்ன? என்பதை அறிந்து அதற்க்கு ஏற்ப தொழிலை தேர்வு செய்ய வேண்டும். அது கூட்டு தொழிலாகவோ அல்லது குடும்ப தொழிலாகவோ இருக்கலாம். அத்துடன் தடை வரும் காலத்திற்கு மனம் ஒன்றி உரிய பரிகாரம் செய்தால் தடைகளுக்கு எல்லாம் விடை கிடைக்கும்.

பரிகாரம் செய்தால் பலன் கிடைக்குமா என்ற ஐயம் வேண்டாம். பலன் தரும் பரிகாரங்கள் மட்டும் தான் மக்கள் பயன் பெற வாரம் ஒரு பரிகாரத்தில் இங்கு பகிர்ந்து கொள்கிறோம். நோய் வந்தால் மருந்து சாப்பிடுவது போல கிரக சூழலில் வரும் மாற்றங்கள் வரும் போது தடைகளை நீக்கி விடை காண பரிகாரம் அவசியம் என்பதை சிந்தித்து பார்த்தால் நீங்களே உணர்வீர்கள்.

உங்கள் ஜாதகத்தை கொண்டு உங்களுக்கான தொழில், தொழிலில் வரும் தடை, தடைக்கான விடை என நம்பிக்கைகுரிய சோதிடரை அணுகி பயன் பெறுங்கள். சொல்லப்படும் பரிகாரங்களை நம்பிக்கையோடு மனம் ஒன்றி செய்தால் பலன் நிச்சயம் உண்டு.

நல்லது சொல்லி உள்ளது நல்லதே நடக்கும். நல்வாழ்த்துக்கள்.