முதுமையே வா.. - வயது மூப்பு அடைந்தவர்களுக்கு...!!

வயது மூப்பு அடைந்தவர்களுக்கு .. ..

     நீங்கள் சொல்வதெல்லாம் சரி தாணுங்க அய்யா. ஆனால் பாருங்க இதெல்லாம் வயதான பிறகு, முதுமை வாட்டும் போது, இப்போதான் புரிகிறது. நாங்கள் இளையவராக இருக்கும் போது செய்த தவறுகள் தான் என்பது அப்போது எங்களுக்கு புரியவில்லை. அல்லது எங்களுக்கு புரியும்படி எங்களை வளர்த்தவர்கள் சொல்லி தரவில்லை. குழந்தை தானே கொஞ்சம் நேராம் தூங்கட்டும் என விட்டு விடுவார்கள். அல்லது சொல்லிக் கொடுத்ததை நாங்கள் கேட்கவில்லை.  

இதற்கு கழுவாயே இல்லையா என்று என்று மனம் வருந்தி கேட்பவர்களும் இருக்கிறார்கள். அவர்களுக்கு ஆறுதலாக எதுவும் சொல்லாமல் இருக்க முடியுமா..?

பாலனாய்க் கழிந்த நாளும் பனிமலர்க் கோதை மார்தம்
மேலனாய்க் கழிந்த நாளும் மெலிவொடு மூப்பு வந்து
கோலனாய்க் கழிந்தநாளும் குறிக்கோள்  இலாதுகெட்டேன்

சேலுலாம் பழனவேலித் திருக்கொண்டீச் சரத்துளானே.

என்று அப்பர் தேவாரத்தில், (பாலனாய்)சிறு வயதினாராக இருக்கும் போது, குறிக்கோள் இல்லாது கெட்டேன் என திருகொண்டீச்சரததில் பாடுவது போல அப்போது வாழ்க்கை முறையை ஒழுங்கு செய்யவில்லை நல்ல பழக்கத்தை கை கொள்ளவில்லை என்றால் அதற்குரிய பலனை இப்போது அனுபவித்து தானே ஆக வேண்டும்.

     தெரியாமல் நெருப்பில் கை வைத்தாலும் அது சுட தானே செய்யும். இப்போ இது புரிகிறது. ஆனால் அப்போது அது புரியவில்லை என்றால் உங்கள் மனதில் வந்த திருத்தம் உங்களை மாற்றும் ஆனாலும் அதனால் வரும் வருத்தங்களும் சிரமங்களும் நம்மை சீர் செய்ய வேண்டும் என்றால், இப்போதும் நம்மை மாற்றிக் கொண்டால் திருத்தம் வரும்.

     இன்றைய சூழலில், பல முதியவர்கள் மனதளவில் வருந்துகிறார்களே தவிர தங்களை மாற்றிக் கொள்ள தயாராகவில்லை என்பது தான் எதார்த்தம். இளையவர்கள் எங்களை கவனிக்கவில்லை என்று ஒரு பெரிய குற்றச் சாற்றை தூக்கி அடுத்த தலைமுறை மீது வைக்கிறார்கள். நீங்கள் சரியாக இருந்து இருந்தால் அவர்கள் ஏன் அப்படி இருக்க போகிறார்கள் என்று இன்னொரு கோணத்தில் சிந்தித்து பார்த்தால் தவறுகள் எங்கே இருந்து வருகிறது என்பது புரியும்.

     எல்லா முதியவர்களும் அப்படி அல்ல. அதே போல எல்லா இளையவர்களும் இப்படி இல்லை. விதிவிலக்கு எல்லாம் விதியாக எடுத்துக் கொள்ளாமல் பொது நிலையில் இருந்து சிந்திக்கலாம். இளையவராக இருக்கும் போது முறையான ஒழுக்க முறையும் வாழ்க்கை முறையையும் கடைப்பிடிக்காததால், இப்போது சிரம படுகிறோம் என்று வருந்தும் முதியவர்கள் தங்களை இப்போதாவது மாற்றிக் கொள்ள வேண்டும்.

     Counselling என்று சொல்லும் ஆலோசனைகள் இன்றைய நாளில் இது போன்ற முதியவர்களுக்கு தான் அவசியம் தரப்பட வேண்டும். நாங்கள் முதியவர்கள் எங்களை எல்லோரும் கவனிக்க வேண்டும் என்ற மனப்போக்கை மாற்றிக் கொள்ள வேண்டும். “பெரிசு” என்று இளையவர்கள் கேலி பேசுகிறார்கள் என்றோ, முதியவர்கள் என்று எங்களை ஒதுக்கி வைக்கிறார்கள் என்றோ அவர்கள் வருந்த தேவையில்லை.

     பிள்ளைகள் கவனிப்பதில்லை என்று சோகத்தை சொல்ல தேவையில்லை. வாயை கட்டுப் படுத்திக் கொள்ள பழக வேண்டும் அது சாப்பிடும் வாயை மட்டும் சொல்லவில்லை. பேசும் வாயையும் சேர்த்து தான் என்பதை புரிந்து கொள்ள வேண்டும்.

     கொஞ்சம் யோசித்து பாருங்கள். இன்றைய டிஜிட்டல் உலகில் லட்சங்களில் சம்பளம் கிடைத்தாலும் உங்கள் பிள்ளைகள் அல்லது கவனிப்பாளர்கள் என்று சொல்லும் இன்றைய இளையவர்களுக்கு எத்தனை மனப்போராட்டம் என்று உங்களுக்கு தெரியுமா? 8 மணி நேர வேலையை 2 மணி நேரத்தில் செய்ய வேண்டும். பாதுகாப்பு இல்லாத சாலையில் விபத்து இல்லாமல் போக வேண்டும். அவர்களுக்கும் குடும்பம் பிள்ளைகள் என இருக்கிறார்கள் இதற்கு இடையே முதியவர்களையும் கவனித்துக் கொள்ள வேண்டும். இத்துடன் corporate culture, பள்ளிக்கூட கட்டணம், குழந்தைகளின் எதிர்காலம், EMI என ஏக்கப்பட்டது பட்டியலிட பல பக்கம் போகும்.

     அந்த நிலையில் இருந்து சிந்தித்து பார்த்தால், பிரச்சனை முதியவர்களை விட மன அழுத்தம் இளையவர்களுக்கு அதிகம் உள்ளது. அதை புரிந்து கொண்டு முதியவர்கள் முடிந்தவரையில் என்று சொல்வதை விட அவர்கள் எதையும் எதிர்பார்க்காமல் வாழ பழக வேண்டும்.      உணவுகளில் உள்ள விருப்பத்தை குறைத்துக் கொள்ள பழக வேண்டும். எனக்கு காப்பி தான் வேண்டும். அல்லது முட்டை தான் வேண்டும் என்று ஒரே மன நிலையில் இல்லாமல் பசிக்கு ஏதாவது கிடைத்தால் போதும் என்று மனதை அடக்கி வாயை கட்டி வாழ பழக வேண்டும். முதியவர்கள், தங்களிடம் ஆலோசனை யாரும் கேட்காத வரையில் அவர்களுக்கு பிள்ளைகளாக இருந்தாலும் ஆலோசனையோ கருத்தோ சொல்ல தேவையில்லை. அவர்கள் செய்வது தவறு என்பது போல உங்களுக்கு தோன்றி னாலும் மன அழுத்தம் இருவருக்கும் வராமல் இருக்க முதியவர்கள் அமைதியாக இருக்க பழக வேண்டும்.       என்னங்க அய்யா இப்படி “பொசுக்கு” என்று சொல்லி விட்டீர்கள் என்று கேட்காதீர்கள் எதார்த்த நிலையில் முதியவர்கள் நிம்மதியாக வாழ இப்படி தான் வாழ பழக வேண்டும் அதற்கு தங்களை இப்போதாவது தயார் படுத்திக் கொள்ள வேண்டும். இல்லை என்றால் முதியவர்களுக்கு மட்டும் அல்ல அவர்களை பார்த்துக் கொள்பவர்களுக்கும் சிக்கல் தான். 

"முதுமையே வா "

புத்தகம் பற்றிய உங்கள் எண்ணக் கருத்துக்களை இங்கே பகிர்ந்து கொள்ளலாம்

GIVE FEEDBACK