வெளிச்சத்திற்கு வாங்க

 

“வெளிச்சத்திற்கு வாங்க...”

-   5 -

 

 

“எங்கேயோ என்னமோ நடப்பது நம்மை எப்படிங்க ஐயா பாதிக்கும்?” என்று சிலர் பொதுவாக கேட்பது வழக்கம் தான்.

 

ஆனால் பாருங்க.. எங்கேயோ இடி சத்தம் கேட்கிறது. அது நமக்கு காதில் கேட்கிறது சில சமயம் பயமாக கூட இருக்கிறதே...

 

பக்கத்து வீட்டில் தீ பிடித்தால் நமக்கு கூட பயமாக தானே இருக்கிறது. கொரானா காலத்தில் பக்கத்து வீட்டில் தட்டி கட்டி நோட்டீஸ் ஒட்டி விட்டால் பயம் நமக்கு இல்லாமலா இருந்தது என்று யோசித்து பாருங்கள்.

 

அப்படின்னா இந்த கிரக பெயர்ச்சி கூட அப்படியா என்று சொல்ல வருகிறீர்கள் புரிகிறது.. இதில் கூடுதலாக சில செய்திகள் உள்ளது அதை சரியாக புரிந்து கொள்ளுங்கள். அதாவது அதிசார பெயர்ச்சி, ஒரு ராசி கட்டத்திற்கு குறிப்பிட்ட கால அளவுக்கு முன்பாகவே செல்வது, இயல்பு பெயர்ச்சி, இது சரியான கால அளவில் இடம் பெயர்வது, வக்கிர பெயர்ச்சி, இது ஒரு ராசி கட்டத்திற்கு பின்னோக்கி செல்வது.. இப்படி தான் இந்த ஆண்டு சனி அடுத்த சில மாதங்களில், அதிசார பெயர்சியாக பயணிக்கிறது..

 

ஒன்பது கோள்களில் தலைமை கோளாக சொல்லப்படும் சூரியன், மாதத்திற்கு ஒரு ராசியில் இருந்து அடுத்த ராசிக்கு பயணப்படுவதை தான் மாத பிறப்பு என்று சொல்கிறோம்.. சங்கராந்தி என்று பண்டைய வழக்கத்தில் சொல்லுவார்கள். மகர ராசியில் பிரவேசிக்கும் நாளை தான் மகர சங்கராந்தி அல்லது தைப் பொங்கல் என்று சொல்லுவார்கள்..

 

மேஷ ராசியில் சூரியன் பிரவேசிப்பதை தான் சித்திரை என்றும் தமிழ் வருட பிறப்பு, என்றும் கொண்டாடுகிறோம்.

 

இந்த கிரக பெயர்ச்சியில் இந்த வாரம் முக்கியமாக சொல்ல வருவது என்ன என்றால், ஆனியும், பங்குனியும் தான் .. அட அதில் என்ன விசேஷம் என்று கேட்கறீங்களா?

நாம் வாழ ஒரு இடம் தேவை. அது வாடகை வீடாக இருந்தால் தான் என்ன? கல்லை கொண்டு கட்டி வாழும் சொந்த வீடாக இருந்தால் தான் என்ன?

 

இப்போ எங்கே சார் கல்லை கொண்டு கட்டிடம், எல்லாம் ரெடிமேட் வீட்டிற்கு மாறியாச்சு (prefabricated house) என்று சொல்ல வருகிறீர்கள் சரி தான் கால சூழலுக்கு ஏற்ப நாமும் மாறிக் கொள்ள வேண்டியது தான்.

 

வாழும் இந்த வீடு மாறுவதை இந்த வாரம் சிந்திக்கலாம்.

 

“ஆனி” அடியிடேல், “குனி” குடிபுகல்  என்பது சோதிட பழமொழி. இதில் சொல்ல வருவது என்ன என்றால், ஆனி மாதம் கடைக்கால் தோண்ட கூடாது கட்டிட வேலை தொடங்க கூடாது.

 

பங்குனி மாதம், கிரக பிரவேசம் போன்ற புதுமனை புகுதல் அல்லது வாடகை வீடாக இருந்தால் இடம் மாறுதல்  கூடாது என்பது தான். இதெல்லாம் பழமொழி, அதை தூக்கி ஓரமாக வையுங்கள் என்று யாராவது சொன்னால்... அவர்களுக்கு தான் இந்த வார சிந்தனை.

 

அடிப்படையில் இரண்டு சோதிட விஷயத்தை தெரிந்து கொள்வோம். ஒன்று கோணம். இது 1-5-9 என்பது நமக்கு தெரிந்து இருக்கும். இதில் அறம் பொருள், இன்பம் வீடு என்று நான்கு கோணங்களை கருத்தில் கொண்டு சிந்திக்க வேண்டும்.,

 

மற்றது கேந்திரம் இது 1-4-7-10 என்பதை நாம் அறிந்து இருப்போம். கேந்திரம் என்பது இடம்.  இது ஆக்கல்(1-4-7-10), காத்தல்(2-5-8-11) அழித்தல்(3-6-9-12) என்ற கருத்தில் கொண்டு சிந்திக்க வேண்டும்.

 

இந்த கேந்திரத்தில் ஆக்கல் என்பது மேஷம்(1), கடகம்(4), துலாம்(7), மகரம்(10) ராசிகளையும்,

 

காத்தல் என்பது, ரிஷபம்(2), சிம்மம்(5), விருச்சிகம்(8), கும்பம்(11) ராசிகளையும்,

 

அழித்தல் என்பது, மிதுனம்(3), கன்னி (6), தனுசு(9), மீனம்(12) ராசிகளையும் குறிக்கும் என்று சிந்திக்க எடுத்துக் கொள்வோம்.

 

இதில் அழித்தல் என்ற வரிசையில் வரும் ராசிகளில் சூரியன் பிரவேசிக்கும் காலம், மிதுனம் – ஆனி , கன்னி-புரட்டாசி, தனுசு-மார்கழி, மீனம்-பங்குனி என்பதை இங்கே சொல்லாமலே புரிந்து கொள்ள முடியும் இல்லையா.

 

ஆக அழித்தல் தொழிலை குறிக்கும் ஆனி, புரட்டாசி, மார்கழி மற்றும் பங்குனி மாதங்களில் புதியதாக ஒன்றை தொடங்காமல் இருப்பது தான் நல்லது என்பதை தான் நமக்கு சொல்லி தந்து இருக்கிறார்கள் என்பதை புரிந்து கொண்டால் நன்மையே விளையும்.

 

ஒரு அழித்தல் நடக்க கூடிய இடங்களில் ஒன்றை ஆக்க நினைப்பது அறிவுள்ள செயல் அல்ல எனவே ஆனி, மற்றும் பங்குனி மாதங்களில் வீடு கட்ட கடைக்கால் போடுவதோ, கிரகபிரவேசம் செய்வதோ கூடாது என்பதை புரிந்து கொள்வது நல்லது அப்படி மீறி செய்தால், அது விருத்தி அடைவதற்கு பதிலாக அழிவுக்கு இட்டு செல்லும் என்பது  எதிர்மறையாக உள்ளதால் மறைமுகமாக குறிப்பால் இப்படி சொல்லி இருக்கிறார்கள் என்பதை புரிந்து கொள்ள வேண்டும்.

 

சோதிடத்தில் நான்காம் பாவகம் வீடு, மனை பற்றி குறிக்கும் பாவக காரகம், இதில்  காலப்புருஷ ராசியான மேஷத்திற்கு , நான்காம் பாவகம் கடகம். இந்த கடகத்திற்கு 12ம் வீடு மிதுனம் இல்லையா.

 

இதில் கடகம் ஆக்கல் தொழிலை குறிக்கும்  ராசி. மிதுனம் அழித்தல் தொழிலை குறிக்கும்  ராசி.

 

எந்த ஒரு பாவகத்திற்கும் அதன் 12ம் பாவகம் விரைய பாவகம் என்ற அடிப்படையில்,  ஆக்கல் ராசியான கடகத்திற்கு விரைய பாவகமாக  மிதுனம் என்ற  அழித்தல் ராசி அமைவதால், சூரியன்  மிதுன ராசிக்கு வரும் மாதம் ஆனி மாதத்தில் என்பதால்  வீடு கட்ட கடைக்கால் போட கூடாது. இதை  சொல்வதற்கு தான் ஆனி அடியிடேல் என்று சோதிட பழமொழியாக சொல்லி வைத்து இருக்கிறார்கள்.

 

இதே போல பங்குனி மாதத்திற்கும் என்பதை உங்கள் சிந்தனைக்கு விட்டு விடுகிறேன்.

 

ஒரு ஜாதகத்தில் குடும்பத்தில் கேது இருந்தால் அவர்கள் வீடு சந்துக்குள் இருக்கும் என்று சுலபமாக சொல்லி விடலாம். என்றாலும், வீடு என்பது வாழும் இடம் அது சிறப்பாக இருந்தால் மட்டுமே மன நிம்மதியுடன் மகிழ்ச்சி பொங்க வாழ முடியும். என்பதை புரிந்து கொள்ளுங்கள்.

 

கல்லும் மண்ணும் கலந்த கட்டிடத்தில் வாழ்வது இருப்பிடமாக இருக்கலாம், ஆனால் அன்பும், பாசமும் கலந்த இடம் தான் வாழ்விடம். அங்கே தான் மகிழ்ச்சியும், வளமும் பொங்கி பெருகும்.

 

உங்கள் நம்பிக்கைக்குரிய சோதிடர் உங்களுக்கான காலத்தையும், சுப காரியங்கள் செய்யும் நாளையும் குறித்து தருவார். உங்களை வெளிச்சத்திற்கு அழைத்து செல்வார்.

 

நம்பிக்கையுடன் இருங்கள். நல்லதே நடக்கும். (தொடரும்)