வெளிச்சத்திற்கு வாங்க

 

“வெளிச்சத்திற்கு வாங்க...”

-   6 -

 

 

“எப்படியோ இருட்டில் இருந்த எங்களை இப்படி வெளிச்சத்திற்கு கொண்டு வந்துட்டீங்க ஐயா” என்று குறுஞ்செய்தி அனுப்பி வாழ்த்து சொல்லும் அன்பு உள்ளங்களுக்கு நன்றிகள்..

 

நாம் என்ன தான் செய்தாலும், சில சமயம் நமக்கு கெட்ட பெயர் (அவப்பெயர்) வந்து விடுகிறது. அது குடும்பத்தில் இருக்கலாம், அல்லது அலுவலகத்தில் இருக்கலாம், அல்லது நண்பர்கள் மத்தியில் கூட இருக்கலாம்.

 

இது எல்லாத்திற்கும் காரணம் என்னன்னு நினைக்கறீங்க.. வாக்கு தான்.  அதாங்க பேச்சு.. சாதரணமாக எதேட்சையாக சொல்லி இருப்போம்.. அதை தவறாக எடுத்துக் கொண்டு நம்மை சண்டையில் மாட்டி விடும் அளவுக்கு கொண்டு போகும்.

 

முதல்ல இந்த வாக்கு எப்படி தோன்றுகிறது என்பதை நாம் புரிந்து கொண்டால், மற்றது சுலபமாகும். என்ன பேசணும், எப்படி பேசணும், எப்போ பேசணும், யாரிடம் பேச வேண்டும். ஏன் பேசணும், என்ற ஐந்து படி நிலைகளை வைத்து பேச பழகி விட்டால் தவறு தவறாக கூட வராது..

 

என்னங்க பேச கூட சொல்லி தரனுமான்னு கேட்கறீங்க புரிகிறது. இப்போ “அதுக்கு கூட தனியா வகுப்பு எடுத்துக் கிட்டு தானுங்க இருக்கோம்”, என்று சொல்பவர்களும் உண்டு

 

வாக்கு எப்படி அமைகிறது என்பதை தெரிந்து கொள்ளுங்கள். இது புதிய சிந்தனையாக கூட இருக்கும். வாக்கு என்பது காதினால் கேட்கும் ஒசையன்று, அவ்வோசை வழியே எழுந்து பொருள் உணர்வை உண்டாக்குகின்ற ஆற்றல் வாக்கு. சொற்கள் பொருட்களை பற்றுக் கோடாக கொண்டு தான் இயங்கும். இது வெளிப்படும்போது பேச்சாக அமையும்.

 

சொல் உலகத்தில், வாக்கு ஐந்து நிலைப்படும், அவை, சூக்குமை வாக்கு, பைசந்தி வாக்கு, மத்திமை வாக்கு, சூக்கும வைகரி மற்றும் தூல வைகரி என்று சாத்திரத்தில் சொல்லுவார்கள்.

 

அட ஒரு சொல்லை சொல்ல இத்தனை யோசனையா என்று சிந்திக்கிறீர்கள். புரிகிறது. உண்மை தான் திருக்குறளில் கூட

“சொல்லுக சொல்லில் பயனுடைய சொல்லற்க

சொல்லில் பயன் இலாச் சொல்.”

 

 என்று ஒரு குறளில் சொல் என்ற சொல்லை ஐந்து முறை பயன்படுத்தி இருப்பார் என்றால் ஆச்சரியமாக உள்ளது அல்லவா..!

 

அதனால் தான் ஞானிகள் அதிகம் பேசாமல் மௌனமாக இருப்பார்கள். நம்மில் பலர் மௌன விரதம் கூட வாரத்தில் சில நாட்கள் என கையால் எழுதி காண்பித்து விரதம் இருப்பார்கள்...

 

“மோனம் என்பது ஞான வரம்பு” என்று ஒளவைப் பாட்டியும் சொல்லி இருக்கிறார். பாட்டி சொல்லை தட்டலாமா?

 

சாதாரணமாக சொல்லக் கூடிய ஒரு சொல், மற்றவர்களுக்கு அது தவறாக பதிந்து, உறவுகளே பிரிவுகளாகி விடும் நிலையும் வந்து இருப்பதை அவரவர் அனுபவத்தில் உணர்ந்து இருக்கலாம். சில தம்பதிகளின் மணமுறிவுக்கு கூட இது காரணமாக இருக்கலாம்.

 

சரி அப்போ எப்படி பேசுவது என்று கேட்க போறீங்க புரிகிறது. இத்தனை வயதுக்கு பிறகு எப்படி பேசுவது என சொல்லி கொடுக்க முடியுமா? அல்லது தெரிந்தோ தெரியாமலோ இப்படி பழகிய பிறகு நம்மை மாற்றிக் கொள்ளத்தான் முடியுமா?

 

அப்படின்னா...?

 

உங்க ஜாதகத்தில் பாருங்க.. “ல” என்று போட்டு இருக்கும் இது லக்கினம். இது தான் முதல் இடம். இதற்கு அடுத்த ராசி கட்டம் தான் இரண்டாம் இடம். இந்த இரண்டாமிடம் தான் வாக்கு ஸ்தானம். இந்த வாக்கில் யார் இருக்கிறார்கள்? அல்லது இந்த வாக்குக்கு உரியவர் எந்த இடத்தில் யாருடன் இருக்கிறார் என்பதை வைத்து அவர் இயல்பாக எப்படி பேசுவார் என்பதை தெரிந்து கொள்ள முடியும்.

 

அவர் இயல்புக்கு மாறாக அப்படி பேசினால் அதை சீரியஸாக எடுத்துக் கொள்ள தேவையில்லை, அவரது இயல்பே அப்படி தான் என்பதை புரிந்து கொண்டு விட்டால், பிரிவும் இல்லை.. உறவும் நட்பும் நலமாகவே இருக்கும்.

 

ஒன்பது கிரகத்தில் இந்த வாக்கு ஸ்தானத்தில் ஒன்று அல்லது அதற்கு மேல் இருக்கும் அல்லது ஒன்றும் இல்லாமலும் இருக்கும். அங்கே இருக்கும், கிரகம் எந்த நட்சத்திரத்தின் காலில் நிற்கிறது என்பதை வைத்து இப்படி இந்த அடிப்படைகளை புரிந்து கொண்டால் ஜாதகர் என்ன பேசுவார். எப்போ பேசுவார், ஏன் பேசுவார், எப்படி பேசுவார், எதற்கு பேசுவார் என்பதை தெரிந்து கொள்ள முடியும்.

 

‘மனதில் உறுதி வேண்டும்’ என்று சொன்ன எட்டயபுரத்து எரிமலை, பாரதி, “வாக்கினிலே இனிமை வேண்டும்” என்றும் சொல்லி இருக்கிறாரே.

 

சரி, உதாரணமாக சில சொல்லவா...? (இது புரிந்தலுக்கு மட்டும் தான்) இரண்டாமிடத்தில் சனி இருந்தால், அவ்வளவு தான் போங்க.. என்று சொல்லும்படி இருக்கும்.

 

சூரியன் செவ்வாய் சம்பந்தத்துடன் இருந்தால், அவர்கள் பேச்சு கடுமையும், கொடுமையும் கொண்டதாக இருக்கும். அடுத்தவர்கள் மனம் கோண பேச இவர்களால் மட்டுமே முடியும் என்று சொல்லி விடலாம்.

 

இரண்டாமிடத்தில் புதன் இருந்தால், தேன் ஒழுக பேசினாலும் பேச்சில் பயனில்லை.

கேது இருந்தால், ஆரோக்கியமில்லை. தான் என்றாலும் கேது குரு நட்சத்திரத்தில் இருந்தால் அதன் சிறப்பின் அளவை சொல்லத்தான் வேண்டுமா? அது தெய்வ வாக்கு தான் போங்க..

 

இப்படி இந்த இடத்தில், நிற்கும் கிரகம், ஸ்தானாதிபதி, கிரகம் நின்ற நட்சத்திர சாரம் என்பதை வைத்து அவர் பேச்சு எங்கே தொடங்கி எங்கே முடியும் என்பதை தெரிந்து கொள்ள முடியும்.

 

இரண்டாமிடம் வாக்கு மட்டுமல்ல, தனம், குடும்பம், கல்வி, அதிர்ஷ்டம் என பல காரகத்துவம் பெற்ற பாவகம் என்றாலும் இந்த வாரம் வாக்கு பற்றி சிந்திக்க எடுத்துக் கொண்டோம்.

அடுத்த ஒரு வாய்ப்பில், மற்ற காரகங்களை சிந்திக்க எடுத்துக் கொள்ள திருவருள் துணை செய்யும். உங்கள் நம்பிக்கைக்குரிய சோதிடர் உங்களை நல்வழி படுத்துவார்

 

நம்பிக்கையுடன் இருங்கள். நல்லதே நடக்கும்.

 

 

விசு அய்யர்

அலைபேசி: 94 44 32 71 72

பழைய எண்.21 புதிய எண்.41 முதல் மாடி

சுந்தர மூர்த்தி விநாயகர் கோயில் தெரு,

திருஅல்லிக்கேணி, சீர் மிகு சென்னை 600 005.