வெளிச்சத்திற்கு வாங்க

 

“வெளிச்சத்திற்கு வாங்க...”

-   7 -

 

“வெளிச்சத்திற்கு வாங்க” என்ற இந்த தொடரில் அவ்வப்போது, திருக்குறளை மேற்கோள் காட்டுகிறீர்கள், ஒளவையார் பாடலை சுட்டி காட்டுகிறீர்கள். பண்டைத் தமிழை அடிக்கோடிட்டு கருத்து சொல்கிறீர்கள்..

 

தமிழுக்கும் சோதிடத்திற்கும் அப்படி ஏதாவது தொடர்பு இருக்குதான்னு தெரிந்து கொள்ள ஆவலாக இருக்கிறோம் என்று சிலர் கேட்கிறார்கள்.. அவர்களுக்காக தான் இந்த வார சிந்தனை.

 

“நன்றும் தீதும் பிறர் தர வாரா” என்ற பாடலை தந்தவர் கணியன். பூங்குன்றனார் என்பதை பலரும் தெரிந்து இருக்கலாம். இதில் கணியன் என்று சொல் சோதிடத்தை கணிப்பதால் அவரை கணியன் என்று சொல்வதாக சொல்லுவார்கள். டாக்டர் பெயருக்கு முன் Dr. என்று போட்டுக் கொள்வது போல, பொறியாளர் “Er” என போட்டுக் கொள்வது போல ஆடிட்டர் “CA.” என்று போட்டுக் கொள்வது போல, சோதிடர்களுக்கும் கவுரவமாக இருந்த அந்த காலத்தில், எதிர்காலத்தில் வருவதை முன்பே கணித்து சொல்வதால், “கணியன்” என்று பெயரடை (adjective) சேர்த்து சொல்லுவார்கள்.

 

இப்படி தமிழ் சோதிடர்களை தமிழ் போற்றி இருக்கிறதே, அப்போ தமிழை விட்டுவிடவா முடியும் என்று நினைக்கிறீர்கள். “தமிழ் இல்லாத பாரதம் தலை இல்லாத உருவம் போல” என்று சொல்லியா தெரியவேண்டும்.

 

அதெல்லாம் சரி, தமிழ் இலக்கியத்தில், அல்லது அற நூல்களில் சோதிடம் இருக்கிறதா என்று வாதம் செய்ய நினைப்பவர்களே தொடர்ந்து படியுங்கள், சில குறிப்புகளை தருகிறேன், குறித்துக் கொள்ளுங்கள்.

 

சைவத் திருமுறைகளில் பன்னிரெண்டாம் திருமுறையாக வைத்து போற்றப்படுவது சேக்கிழார் அருளிச் செய்த பெரியபுராணம்.அதில் பிள்ளை பாதி புராணம் பாதி என்று சொல்வது போல அதிகமான பகுதிகளைக் கொண்டது திருஞானசம்பந்தர் புராணம். அதில் சம்பந்தர் பெருமான் அவதாரத்தை சொல்ல வரும் பாடலை தருகிறேன், சுவைத்து தான் பாருங்களேன்.

 

" அருக்கன் முதல் கோள் அனைத்தும் அழகிய உச்சங்களிலே

பெருக்க வலியுடன்கிற்கப் பேணியா நல் ஓரை ழத் திருக்கிளரும்

ஆதிரைநாள் திசைவிளங்கப் பரசமயத்

தருக்கொழியச் சைவமுதல் வைதிகமும் தழைத்து ஓங்க.

 

இந்த பாடலில் அருக்கன்-சூரியன் முதல் அனைத்து கோள்களும் நல்ல பலனை தரக்கூடிய உச்சத்தில் இருக்க, திருவாதிரை நட்சத்திரத்தில், நல்ல ஓரையில் என்ற சோதிட குறிப்பை காண முடிகிறது அல்லவா..

 

சில மணி நேரம் கழித்து பிறந்தால், பிறக்கும் குழந்தை அரசு ஆள்வார் என்று சோதிட குறிப்பை கேட்டு கமலவதியார், கோட்செங்க சோழனை பெற்று எடுத்த செய்தியும் காண முடியுமே.

 

பழுதிலா மறை கண்ட நூல் பழு தின்றி உண்டது பாரின்மேல்

“மொழிவர் சோதிடம்” உன்னி இன்னது  முடிமென்பது முன்னமே
அழிவிலாதது கண்டனம் அவை  யன்றியுஞ் சில ஆகமங்களின்
எழுதியோர்படி என்று கொண்டு இரு நிதி எடுப்பதும் எண்ணிடே

 

மெய் கண்ட சாத்திரங்களுள் தலையாய சாத்திரமான சிவஞான சித்தியார் அருளிச் செய்த அருள் நந்தி சிவாச்சாரியார் அருளிச் செய்த நூலில் காணலாம்.

 

திருக்குறளில் சோதிட சிந்தனை உள்ளதா என்று தானே அடுத்து உங்களுக்கு கேட்க தோன்றும்.

 

புறம்குன்றி கண்டு அனையரேனும் அகம்குன்றி

மூக்கின் கரியார் உடைத்து.

 

இந்த குறளில் எங்கே சார் சோதிடம் இருக்கிறது என்று இயல்பாக படிப்பவர்கள் கேட்கலாம். கொஞ்சம் ஆழ்ந்து சிந்தியுங்கள்.. மூக்கு என்பது குருவை குறிக்கும். கரி என்பது சனியை குறிக்கும்.  குருவில் சனி இருந்தால்... இதற்கு விளக்கம் சொல்லித்தான் ஆக வேண்டியது இல்லை.

 

மூக்கில் கரி குருவில் சனி என்பதாக சிந்தித்து பாருங்கள் சோதிட கருத்தை திருக்குறள் சொல்லி இருக்கிறது என்பது புரியும்.

 

இதே போல,

 

உடம்பாடு இலாதவர் வாழ்க்கை குடங்கருள்

பாம்போடு உடன் உறைந் தற்று

 

இந்த குறளில், குடம் என்பது கும்ப ராசியையும், பாம்பு என்பது சர்ப்ப் கிரகமான ராகுவையும் குறிக்கும். கும்ப ராசியில் ராகு வந்தால், பலன் எப்படி இருக்கும் என்பதையே குறளின் பொருளாக வைத்து சிந்தித்து பாருங்கள். சோதிட சிந்தனைகளை திருக்குறளில் உள்ளது என்பதை புரிந்து கொள்ள முடியும்.

 

இது உதாரணத்திற்காக சொல்லப்பட்டவைகள் தான் இது போல சோதிட சிந்தனைகளை சொல்லும் பல குறட்பாக்களை எடுத்து காட்ட முடியும்.

 

காய்சின வெய்யோன் சேயோன் முன்செலக் கதிர்கால் வெள்ளித்
தேசிகன் பின்பு சென்று நடக்குமிச் செயலான் முந்நீர்த
தூசின வுலகிற் பன்னீ ராண்டுவான் சுருங்கு மென்று
பேசின நூல்கள் மாரி பெய்விப்போற் சென்று கேண்மின் (1195)

 

என்ற திருவிளையாடல் புராணத்தை எடுத்துக் கொண்டால், சூரியனும், செவ்வாயும் முன்னே செல்ல சுக்கிரன் பின்னே தொடரும் போது, பன்னிரெண்டு ஆண்டுகள் மழை பெய்யாது என்ற சோதிட குறிப்பை சொல்கிறது என அறியும் போது வியப்பாக உள்ளது அல்லவா?

 

அலங்கன்மலி வானவரும் தானவரும் அலைகடலைக் கடையப்பூதம்

கலங்க எழுகடுவிடம் உண்டு இருண்டமணிகண்டத்தோன் கருதும்கோயில்

விலங்கல் அமர் புயன்மறந்து மீன் சனிபுக்கு ஊன்சலிக்கும்காலத்தானும்

கலங்கலிலா மனப்பெருவண் கையுடைய மெய்யர்வாழ் கழுமலமே.

 

என்பது திருஞானசம்பந்தர் அருளிய முதல் திருமுறை. மழை வேட்டல் பதிகம் என்று சைவ பெருமக்களால் உயர்வாக போற்றப் படும் இந்த பதிகத்தில் மகரத்தில் சனி புகும் காலத்தால் ஏற்படும் சிக்கலை கழுமலம் என்று சொல்லும் சீர்காழி பெருமானை வழிபாடு செய்ய  அது தீரும் என்பதாக சோதிட குறிப்பினை பதிய வைத்து உள்ளது வியப்பாக உள்ளது அல்லவா.

 

எங்கும் நல் நிமித்தம் செல்ல இரு நிலம் மகிழ்ச்சி கூர

பங்குனி நிறைந்த திங்கள் ஆதபன் பயிலும் நாளில்

வெம்குனி வரிவில் வாகை விசயனும் பிறந்தான் என்றி

பங்குனன் என்னும் நாமம் பகுதியால் படைத்திட்டானே

 

என்பது வில்லிபுத்தூர் ஆழ்வார் அருளிய பாரதம். இந்த பாடலில், பங்குனி மாதம் உத்திர நாளில், அர்ச்சுனன் பிறந்தான் என்று சோதிட குறிப்பை சேர்த்தே பதிவு செய்து இருப்பது நம்மை இன்னமும் வியக்க வைக்கிறது அல்லவா.

 

இப்படி தான் புராணங்கள் சங்க இலக்கியங்கள் என அனைத்திலும் ஆங்காங்கே சோதிட குறிப்புகள் இருக்கிறது. சோதிட கண் கொண்டு இந்த பாடல்களை படிக்கும் போது, நம்மை அறியாமலே வியப்பு உண்டாவதில் ஆச்சரியமில்லை.

 

அதனால், சோதிடம் முன் தோன்றி மூத்த குடி என்று சொல்லும் தமிழில் தான் உள்ளது என்பதை புரிந்து கொண்டு, தமிழை தொடாமல் சோதிடம் சொல்ல முடியாது என்ற நம்பிக்கையுடன் அணுகுங்கள்.

 

நல்லதே நடக்கும். நம்பிக்கையுடன் இருங்கள்.

 

 

விசு அய்யர்

அலைபேசி: 94 44 32 71 72

பழைய எண்.21 புதிய எண்.41 முதல் மாடி

சுந்தர மூர்த்தி விநாயகர் கோயில் தெரு,

திருஅல்லிக்கேணி, சீர் மிகு சென்னை 600 005.