வெளிச்சத்திற்கு வாங்க 8

 

“வெளிச்சத்திற்கு வாங்க...”

-   8 -

 

தங்கம் ... தங்கமே தங்கம்...

 

அட ஆமாங்க தங்கம் பாருங்க ... விலை கூடிக்கிட்டே போகுது... தங்கத்திற்கு காரகம் வகிக்கும் குருவும் மீனத்திற்கு பெயர்ச்சியாகியாச்சு. அப்போ இன்னும் தங்கம் விலை கூடுமான்னு யோசிக்கிறீங்க புரிகிறது.

 

தங்க நகைகள் வாங்குவது முதலீடா இல்லையா என்று சொல்ல போவதில்லை. இப்போ அநேகமாக காதல் கல்யாணம் என்றாகிவிட்டது எனபதால்`என்பதால் கல்யாணத்திற்கு தங்கம் வாங்கி சேமிப்பது என்பது மக்களிடையே குறைந்தும் போச்சு.

 

அப்படின்னா...

 

கமாடிட்டி மார்கெட்டில் கோல்ட் அல்லது மினி கோல்ட் வாங்க ஆலோசனை சொல்ல போறீங்களா என்று பார்க்கறீங்க..

 

கழிவுகள் எல்லாம் போய் கடைசியில் தங்குவது தானே தங்கம். அப்போ அது செல்வ வளம் தரும் பொருள் தானே.. தங்கத்திற்கு காரகம் குரு அல்லவா. அதனால் தான் தங்கத்தை இடுப்புக்கு கீழே போட கூடாது என்று சொல்லுவார்கள்.

 

குருவை மதிக்காத சிலர், அல்லது, அறியாமையின் காரணமாக காலில் கொலுசு, மெட்டி என தங்கத்தில் போட்டு தங்கள் பெருமையை அடித்துக் கொள்வதாக நினைத்துக் கொண்டு வறுமையை விலைக்கு வாங்குகின்றனர்.

 

“கால் பொன் ஆனாலும் மா பொன்” என்பது கிராமத்து பக்கம் சொல்லும் சொல்லடை தான். இத்தனை செல்வ வளம் மிக்க ஒரு வஸ்துவை இடுப்புக்கு கீழே காலில் போட்டு அவமரியாதை செய்யலாமா? கூடாது.

அதனால் தான் இன்றைய இளைய செல்லங்களுக்கு இதன் மூலமாக சொல்லி அவர்களை நல்வழி படுத்துவோம். தங்கத்தை எப்போதும், இடுப்புக்கு கீழே போட கூடாது.

 

சரி அப்படி போட்டால் என்ன ஆகும் என்பதை இன்னொரு சந்தர்ப்பத்தில் சிந்திக்கலாம். இப்போ தங்கத்தின் உயர்வு நிலையை பற்றி மட்டும் சிந்திப்போம்.

 

அது சரி இப்போ எதுக்கு தங்கத்தை பத்தி சொல்றீங்க..  என்று யோசிக்கிறீர்கள் புரிகிறது.

 

தங்கம் வாங்கும் நாள் என்றால் இன்றைய நாளில் மக்களுக்கு நினைவில் வருவது அக்ஷய திருதியை தானே. அது இந்த வருடம் மே மாதம் 3ம் தேதி வருகிறதே.

 

அட.. ஆமாம்..!! என்று பஞ்சாங்கத்தை பார்த்து விட்டு,  உங்கள் மனதில் அலை பாயும் எண்ணங்களை அறிகிறோம்.

 

ஒலி கிரகமான சூரியனும் சந்திரனும் உச்சத்தில் இருக்கும் நாள் தான் அக்ஷய திருதியை. குறிப்பாக இந்த அக்ஷய திருதியை ரோகினி நட்சத்திரத்தில் வந்தால் அதன் சிறப்பும் அது தரும் செல்வ வளமும் சொல்ல ஒரு குட்டி பட்டியலே போடலாம்.

 

இந்த ஆண்டு மே மாதம் 3ம் தேதி வரும் அக்ஷய திருதியை அமிர்த யோகத்தில் ரோகினி நட்சத்திரத்தில் வருகிறது. அதனால் வழிபாடு செய்யக் கூடிய இந்த புனித நாளில்....., (நாம் தங்கம் வாங்கித்தான் ஆக வேண்டுமா என்று கேட்க போறீங்க...)

 

ஆடி மாதம், செவ்வாய் கிழமை என சில குறிப்பிட்ட நாட்களில் தங்கம் வாங்க மாட்டார்கள். ஆடித்தள்ளுபடி, செவ்வாய் கிழமை சிறப்பு தள்ளுபடி என்றால் மக்கள் முதல் வரிசையில் நிற்காமல் இருப்பதில்லை. அதனால் வரும் சிக்கலும் சிரமும் வந்த பிறகு தானே தெரியும்.

 

“சுண்டைக்காய் கால் பணம்.... சுமை கூலி முக்கால் பணம்” என்பது போல, சில நூறு அல்லது ஆயிரங்களை சேமிக்க பல லட்சங்களை இழக்கலாமா?

சம்பத்துக்கள் சேர அக்ஷய திருதியை அன்று தானம் செய்ய வேண்டும். சிலருக்கு பாருங்கள் செல்வ வளம் இருக்கும். ஆனால் அனுபவிக்க கூடிய சௌபாக்கியம் இருக்காது. “ஆயிரம் இருந்தும்... வசதிகள் இருந்தும்.... no peace of mind” என்பது போல இருப்பார்கள். இதை தான் சௌபாக்கியம் என்று சொல்லுவார்கள் ஜனன ஜாதகத்தில் 11ம் இடத்தை வைத்து இதை தெரிந்து கொள்ளலாம்.

 

சம்பத்துக்கள் சேரவும், சௌபாக்கியம் கூடவும் அக்ஷய திருதியை அன்று தானம் செய்ய வேண்டும். இவர்கள் தானம் செய்வதற்கு தான் தங்கமும் வெள்ளியும் அக்ஷய திருதியை அன்று வாங்க வேண்டுமே தவிர

தங்கத்தையும் வெள்ளியையும் வாங்கி பீரோவில் வைத்து பூட்டி வைக்க அல்லது பின்னாளில் விற்றுக் கொள்ள முதலீடாக என தங்கம் வாங்குவதற்கு வந்தது அல்ல இந்த புனிதமான அக்ஷய திருதியை என்பதை முதலில் புரிந்து கொள்ளுங்கள்.

 

நமக்கே இல்லீங்க  ஐயா, நாம் எங்கே தானம் செய்வது?!. தானம் செய்வது நல்லது தான் என்றாலும் சத் புருஷர்களை பார்ப்பது அரிதாக உள்ள இந்த கலியில் எங்கே தானம் செய்வது என்ற சிந்தனையும் நம் மனதில் வராமல் இல்லை.

 

சத் புருஷர்கள் இன்னமும் இருக்கத்தான் செய்கிறார்கள். அவர்கள் நம் பார்வைக்கு தென்படவில்லை என்றால், நமது தவ வலிமை குறைவு என்பது தான் பொருளே அன்றி சத் புருஷர்கள் இல்லை என்பது அல்ல பொருள் என்ற பாசிடிவ் கருத்தை மனதில் வரவைத்துக் கொள்ளுங்கள்.

 

சரி தங்கம் வெள்ளி வாங்க வசதி இல்லை. அல்லது தானமாக தருவதற்கு வசதியோ, மனமோ, வீட்டில் திட்டுவார்களே என்ற பயமோ இருந்தால் என்ன செய்வது.?

 

முடிந்தவரை நீர் பொருளை தானம் செய்யுங்கள், பானகம், நீர் மோர் அல்லது வெறும் தண்ணீர் இப்படி எதையும் தானமாக தரலாம். இதை சத் புருஷர்களுக்கு தான் என்று இல்லை யாருக்கும் தரலாம். அதில் பேதம் காட்ட வேண்டிய அவசியமில்லை.

 

நீர்மை பொருளுக்கு காரகம் சந்திரன். அக்ஷய திருதியை நாளில் சந்திரன் உச்சம் எனும் போது அதற்கான கழுவாய் இதுவாக தானே இருக்கும்.

சூரியன் உச்சமாக இருப்பதால், அவர்களை உபசரித்து அன்னம் பாலித்து பசியாற செய்ய வேண்டும். வசதி இல்லாதவர்கள் பானகம் நீர் மோர் கரைத்து தர வேண்டும் அதுவும் இல்லாதவர்கள் தண்ணீராவது (பண்டைய நாளில் தண்ணீர் பந்தல் வைப்பார்கள்) தர வேண்டும். உங்கள் அலுவலகத்தில் வீட்டு வாசலில் அதிக செலவு இல்லாமல் ஒரு பானையில் தண்ணீர் வைத்து தர முடியும் தானே.

 

அக்ஷய திருதியை, கோடை காலத்தில் வருவதால், இது போல சொல்லி இருக்கலாம் என்று கடவுள் நம்பிக்கை இல்லாதவர்கள் நினைத்துக் கொள்ளட்டும் பரவாயில்லை. ஆனால் இதை செய்யட்டும் என்பது தான் நமது எண்ணமும் விருப்பமும்.

 

எந்த ஒரு செயலை செய்வதற்கும் நமக்கு தேவை தண்ணீர் தான். அதனால் தான், மத சடங்குகளில் நீருக்கு முக்கியத்துவம் உண்டு.. “புண்ணியம் செயவாருக்கு பூ உண்டு நீர் உண்டு” என திருமந்திரம் சொல்கிறது. தண்ணீரை கையில் வைத்துக் கொண்டு அதை crystalise செய்தால், நமது உணர்வுகள் அதில் வெளிப்படும் என்பது ஆய்வாளர்கள் கருத்து.

 

அதனால், இந்த ஆண்டு, மே மாதம் 3ம் தேதி வரும் அக்ஷய திருதியை அன்று தங்கம் வெள்ளி வாங்க விரும்பினால் அதை தானம் செய்வதாக இருந்தால் அதற்கு மட்டும் வாங்கி கொள்ளுங்கள். உங்கள் உபயோகத்திற்கு தான் என்றால் உங்களுக்கு விருப்பமான மற்ற நாட்களில் வாங்கிக் கொள்ளுங்கள்.

 

யாராக இருந்தாலும், பானகம், நீர்மோர் அல்லது தண்ணீர் பந்தல் என எது உங்கள் வசதிக்கு முடியுமோ அதை செய்யுங்கள்.

 

நம்பிக்கையுடன் இருங்கள். நல்லதே நடக்கும்.! (தொடரும்)