வெளிச்சத்திற்கு வாங்க 24

“வெளிச்சத்திற்கு வாங்க...”

-   24 -

நம்ம வீட்டில் கூட பார்த்திருப்போம். சிலருக்கு நைட் ஷிப்ட் வேலையாக இருக்கும். அது சாப்ட்வேர், , BPO, KPO போன்ற ஐடி துறை சார்ந்தவர்களாக இருப்பார்கள்.

இவர்களுக்கு பகல் எல்லாம் இரவு.. இரவெல்லாம் பகல். அந்த நாட்டில் உள்ளவர்களுக்காக இவர்கள் தங்களை அப்படி மாற்றி கொண்டு தங்கள் வேலையை செய்ய வேண்டியது உள்ளது.. வயிற்றை கழுவ வேண்டுமே என்பதை விட கை நிறைய சம்பளம் கிடைக்கிறதே என்ற ஆசையும் தான் கரணம்.

அதெல்லாம் சரி. இப்படி இயற்கைக்கு மாறாக இந்திய இளைஞர்கள் இருப்பது ஆரோக்கியமான ஒன்று தானா என்பது சிலருக்கு கேள்வியாக இருக்கும்.

உண்மை தான் இயற்க்கைக்கு மாறாக இப்படி செய்வது சில உடலியலில் சில குறைபாடுகளை உருவாக்கும். அதை மருத்துவர்கள் சொல்லுவார்கள் என்றாலும் இதை சரி செய்ய ஏதாவது பிராயச்சித்தம் சொல்ல வேண்டாமா என்று கேட்க வருவது புரிகிறது.

சோதிட ரீதியாக கேது 12ம் இடத்தில் இருந்தாலும் 12ம் அதிபதியுடன் தொடர்பு கொண்டு இருந்தாலும் அவர்களுக்கு நைட் ஷிப்ட் வேலை இருக்கும். அல்லது பகல் எல்லாம் தூங்கி விட்டு இரவில் செல் போனை தடவிக் கொண்டு இருப்பார்கள்.

இது போல நைட் ஷிப்ட் வேலை செய்பவர்களுக்கு தேக பலம் குறையும். நோய் எதிர்ப்பு சக்தியை கூட்ட மருந்து என கூட விற்பனை செய்யலாம். ஆண்மை குறைவு ஏற்படும் என ஐடி வளாகத்தில் இனி  சில லேகியம் கூட விற்க தொடங்கி விடுவார்கள். இது சரியா தவறா என்று சொல்வதை விட...

நம்மிடம் இருக்கும் ஒரு மூலிகை ரகசியத்தை இளைய பட்டாளத்திற்கு சொல்லி விட்டால் பத்து ரூபாயில் கிடைக்கும் ஒரு பலனை பல நூறு கொடுத்து ஆன்லைனில் வாங்க வேண்டுமா என்று யோசிக்க தொடங்கி விடுவார்கள் இல்லையா. 

இந்த நட்சத்திரத்திற்கு இன்ன மரம் என்று சொல்வது போல இந்த மரத்திற்கு எந்த நட்சத்திரமும் கிடையாது. .ஏன் என்றால் ஒன்பது கிரகமும் குடி கொண்டு இருக்கும் ஒரே மரம் இது தான்..

வேர், இலை, தண்டு, பட்டை, பூ, பிசின், காய், என அனைத்தும் பலன் தரும் பொக்கிஷம் தான் இந்த மரம்..

அட என்னங்க  ஐயா, இத்தனை பில்ட் அப் கொடுக்கறீங்க... அது என்ன மரம் தான் என்று சொல்லிவிடுங்களேன் என்று கேட்க வரும் உங்கள் ஆர்வம் புரிகிறது.. உங்களுக்கு சொல்லாமலா..

அது தான் முருங்கை மரம்.. அட.. முருங்கை காய் என்று சொல்றீங்க புரிகிறது.. அதுக்கு தான் அத்தனை பில்ட் அப்..

சொல்லும் நோய்களுக்கு எல்லாம் தோஷம் இல்லை–ஐயம் அறும்

பல் உயிருக்கும் தாது மிகும். பத்தியமாம் – வில்லார்

பெருங்கைக்க மென்று திக்கும் பெண்ணே! நறிய

முருங்கைக்காய் தன்னை மொழி.

என்பது தமிழ் கூறும் பாடல். எல்லா நோய்க்கும் மருந்து இந்த முருங்கை என்று தமிழ் சொன்ன பிறகு இதை இளசுகள் ஒதுக்கி தள்ளலாமா?

இந்த முருங்கை பூ ஒரு கிலோ என்ன விலை என்று ஆன்லைனில் தேடி பாருங்க..  மயக்கமே வந்து விடும்.. அந்த விலைக்கு விற்கும் இதன் அரிய ரகசியம் தெரிந்து கொள்ள வேண்டாமா?

 

சூரிய கிரகத்தின் காரகத்துவம் கொண்ட இந்த முருங்கை பூ, கண் பார்வைக்கு நல்லது. இரவில் கண் விழித்து இருப்பவர்கள் கணினி திரையை பார்ப்பவர்கள் நீல நிற ஒளி கற்றை பொருத்திய கண்ணாடியை அணிந்து இருப்பார்கள் இது விலை கூட தான்.. அந்த வேலையை இந்த முருங்கை பூ செய்கிறது.

என்ன தான் காதல் திருமணம் செய்து கொண்டாலும், உறவு என்ற நிலையில் ஈடுபாடு அல்லது ஆர்வம் இல்லை என்றால் என்ன பயன்? அதை நேர் செய்வது தான் இந்த முருங்கை பூ. அதனால் ஆன்லைனில் அந்த விலை விற்கிறார்களா? என்று வியப்பாக உங்களுக்கு இருக்கும்.

ஒரே இடத்தில் பல மணி நேரம் உட்கார்ந்து இருப்பதால் சிலர் சிறுநீர் கழிக்கும் உணர்வு வந்த பின்னும் வேலை முக்கியத்தில் இயற்கை உபாதைகளுக்கு முக்கியத்துவம் தர மாட்டார்கள். பின்னாளில் கிட்னி பிரச்சனை வரும். உலக அளவில் அதிக தேவை உள்ள ஒரே மனித உறுப்பு கிட்னி தான் என்பது நம்மில் பலருக்கும் தெரிந்து இருக்கும் அல்லவா... அவர்களுக்கும் நம்ம முருங்கை தான் முதலில் வந்து முதல் உதவி செய்யும்.

இரவில் அதிக நேரம் விழித்து இருந்தால், உடல் சூடாகும். தலைவலி, அஜீரணம், மலச்சிக்கல் என வரும் வரிசையாக சொல்லலாம்.. சுவரை விற்று சித்திரம் வாங்குவது போல தன்னை வருத்தி பணத்தை சேர்த்தால் அனுபவிப்பது யார்? (மருத்துவர்களும் மருத்துவ மனையும் தானே) இவர்களுக்கு தான் எளிமையாக கிடைக்கும் இந்த மூலிகை முருங்கை. ஒரு முருங்கைக்காய் போதும் என்றவுடன் அதெப்படி சார் ஒரு காய் என்று கேட்பார்கள்.

அவ்வளவு பெரிய சிக்கலுக்கு ஒரு கிராம் அளவு கூட இல்லாத ஒரு சின்ன மாத்திரை மருத்துவர் கொடுத்தால் பேசாமல் விழுங்கும் நம்மவர்கள் நம்மை கேட்பதற்கு காரணம் விளக்கம் நம்மிடம் உள்ளது என்பதால் தானே.

இன்ன இடம் என்று இல்லாமல் எல்லா இடத்திலும் வளரும் ஒரு மரம் இந்த முருங்கை. உங்கள் வீட்டில்  கொஞ்சம் இடம் இருந்தால் கூட போதும் ஒரு மரத்தை வைத்து விடுங்கள்.. பிளாட்டில் பதினெட்டாவது மாடியில் இருந்தால் கூட நடை பாதையில் ஒரு மரத்தை வைத்து விடுங்கள்.

 அதிகம் வேர் விடாத மரம். இந்த ஒரு மரம் இருந்தால், உடலுக்கு நோய் இல்லை என்பது மட்டும் அல்ல. ஒன்பது கிரகமும் நம் வீட்டில் சொல்வதை செய்யும். கிளையை உடைத்து வைத்தால் கூட வளரும் இந்த மரம் இனி உங்கள் வீட்டில் இருக்கட்டும்.

இலையை சூப் வைத்து குடிக்கலாம். செவ்வாய் காரகத்துவ பலம் கிடைக்கும். காயை குழம்பில் போட்டு சாப்பிடலாம் சனியின் காரகத்துவ பலம் கிடைக்கும். பூவில் சூரியனும் வேரில் புதனும், பட்டையில் வியாழனும், முருங்கை பிசினில் சுக்கிரனும், முருங்கை தேனில் சந்திரனும் என்று ஒன்பது கிரகமும் ஒன்றாக இருக்கும் ஒரு மரம் இந்த முருங்கை.. என்பதை தெரிந்து கொள்ளுங்கள்.

நல்லதே நினைப்போம். நல்லதே நடக்கும்.