வெளிச்சத்திற்கு வாங்க 25

 

“வெளிச்சத்திற்கு வாங்க...”

-   25 -

எந்த ஒரு வழிபாட்டுக்கு முன்பும் கணபதி வழிபாடு செய்வது இந்துக்களில் பெரும்பாலருக்கும் வழக்கம்.. முழு முதற் கடவுள் கணேசன் என்பதால் விநாயகர் வழிபாடு அவசியம் என்பது பலருக்கு தெரிந்து இருக்கும்.

அவர் முதல் கடவுள் அவருக்கு தான் முதலில் பூஜை எல்லாம் சரி தான். ஆனால், அவரை எப்படிங்க முதற்கடவுள் என்று சொல்றாங்க என்று உங்களில் யாருக்காவது கேட்க தோன்றுகிறதா?

சின்ன குழந்தையாக இருக்கும் போது இப்படி கேள்வி கேட்டால், சும்மா துடுக்கு தனமாக கேட்க கூடாது பெரியவங்க சொன்னால் கேட்க வேண்டும் என்று சொல்லி நம்மை சிந்திக்க விடாமல் செய்து விடுவார்கள்.

இப்பவும் இன்றைய குழந்தைகள் இது போல கேள்வி கேட்பார்கள் அவர்களுக்கு நாம் பதில் சொல்ல விஷயங்களை தெரிந்து கொள்ள வேண்டுமே தவிர அவர்கள் சிந்தனையை தடுக்க கூடாது.

எந்த பூஜை செய்யும் முன்பும் விநாயகர் பூஜை செய்யவது ஏன் என்று தெரிந்து கொள்ள வேண்டாமா? புது மனை புகுதல், வீட்டை புதுப்பித்தல் அல்லது வேறு எந்த செயலுக்கு முன்பும் கணபதி ஹோமம் என சொல்லிக் கொண்டே போகலாம்..

உங்களுக்கு தெரியும் மனித வாழ்வுக்கு முக்கியம் நீர் தான். “நீரின்றி அமையாது உலகு” என்பது திருக்குறள். எல்லா உயிரினங்களுக்கும் முக்கியம் நீர் மட்டுமே என்றால் இதை மறுப்பவர்கள் யாரும் இருக்க மாட்டார்கள் இல்லையா? அறிவியல் கூட இந்த உலகம் 71% நீர்  29% நிலத்தால் அமைந்தது என்று தானே சொல்லுகிறது.

அது சரிங்க விநாயகருக்கும் நீருக்கும் என்ன சம்பந்தம் என்று கேட்க வருகிறீர்கள் புரிகிறது.  ஆகஸ்ட் மாதம் 12ம் தேதி உலக யானை தினமாக கொண்டாடப் படும் இந்தியாவில், யானை உருவம் கொண்ட தெய்வம் விநாயகர், யானைக்கு நீர் என்றால் பிடிக்கும். நீர் நிலைகளை கண்டால், யானை சிறு பிள்ளை தனமாக ஆட்டம் போட தொடங்கி விடும். நீண்ட தூரம் நீச்சல் அடிக்கும் பாலூட்டும் விலங்கு யானை தான்.  அதுவும் 6 கிலோமீட்டர் தொலைவில் உள்ள நீரை யானை அறிந்து கொள்ளும்.

அந்த அளவுக்கு அறிவு திறன் படைத்த யானை உருவம் கொண்ட பிள்ளையார் தான் நீர் மூலாதாரத்திற்கு தொடர்பு உடையவர் என்றால் ஆச்சரியமாக உள்ளதா?

நீர் தான் முதல் என்பதால் தான் பிள்ளையாருக்கு முதல் பூஜை என்று வைத்திருக்கும் நமது சான்றோர் அறிவுத்திறனை எண்ணி வியக்காமல் இருக்க முடியுமா என்ன? அறிவியலை ஆன்மிகத்தில் வைத்து அப்படியே பழக்க படுத்தி விட்டார்கள்.

ஆனால், இந்துக்கள் என சொல்லும் சிலருக்கு, விநாயகர் சதுர்த்தி விழா என்று தலையில் ஒரு ரிப்பனை கட்டிக் கொண்டு விநாயகரை தண்ணீரில் தூக்கி மூழ்கடிப்பது மட்டுமே தெரிந்து இருக்கும்.

எங்கெல்லாம் நீர் நிலைகள் உள்ளதோ அங்கெல்லாம் ஒரு விநாயகர் சிலை வைத்து விடுவார்கள். அரச மரத்து விநாயகர் என்று சொல்லும் நாம் அரச மரம் நீர் வளம் நிறைந்த செழிப்பான இடத்தில் தான் வளரும். அதனால் தான் ஆற்றங்கரை விநாயகர், அரச மரத்து  விநாயகர் என சிறப்பாக வழிபட படுகிறார்.

விநாயகர் சதுர்த்தி என்றதுமே, நிவேதனத்திற்கு நாவல் பழமும், விளாம்பழமும்  முதலில் வந்து நிற்கும். பிள்ளையாருக்கு மாலை எருக்கும் பூ தான், சரி இதில் என்ன புதுசா தகவல் என்று யோசிக்கிறீர்கள் புரிகிறது.

நாவல் மரமும், விளா மரமும், நிலத்தடி நீர் எங்கே அதிகம் உள்ளதோ அங்கே தான் வளரும்.  இது போன்ற நீர் வளம் தேடும் மரங்களை சாஸ்திர நூல்கள் குறிப்பிட்டு காட்டுகின்றது. ஆக ஜலநாடி ஓடும் இடங்களில் எல்லா மரத்தடியிலும் பிள்ளையாரை வைத்து வழிபடும் நம்மவர்கள் நீரின் ஆதாரத்தை முதன்மை படுத்தவே இதனை செய்து இருக்கிறார்கள்.

சாஸ்திரப்படி, நாவல் மரம் இருக்கும் இடத்தில் இருந்து கிழக்கே நான்கு அடி தொலைவில் நிலத்தடி நீர் இருக்கும். நாவல் மரத்திற்கு பக்கத்தில் எறும்பு புற்று இருந்தால், மரத்திற்கு தெற்கே 12 அடி ஆழத்தில் நீர் வளம் பெருகும். இது போல ஒவ்வொரு மரத்திற்கும் ஒரு குறிப்பிட்ட விளக்கம் சொல்லி இருக்கிறது.

அப்போ அந்த எருக்கு என்று கேட்க வருகிறீர்கள் புரிகிறது. அது தான் இந்த வார சிந்தனை. எருக்கு நீர் இல்லாமலே 12 ஆண்டுகள் கூட வளரும். அதனால் தான் நீரை தன்னகத்தில் வைத்து இருக்கும் விநாயகருடன் ஒட்டி அது உறவாடுகிறது.

கங்கையை தலையில் கொண்ட சிவ பெருமானுக்கு எருக்கு தான் அஷ்ட புஷப்ங்களில் ஒன்றாக இன்றும் வழிபாடு செய்யபடுகிறது. நாம் அனைவருக்கும் தெரிந்த கோளறு பதிகத்தில்

பலபல வேடம் ஆகும் பரன் நாரி பாகன் பசுஏறும் எங்கள் பரமன்
சலமகளோடு “எருக்கு” முடிமேல் அணிந்து என் உளமே புகுந்த அதனால்
மலர்மிசையோனும் மாலும் மறையோடு தேவர் வரு காலம் ஆன பலவும்
அலைகடல் மேருநல்ல அவைநல்ல நல்ல அடியார் அவர்க்கு மிகவே.

என்ற பாடலில், “எருக்கை’ இறைவன் முடிமேல் அணிந்து இருப்பதாகவும் கங்கையை தலையில் கொண்ட இறைவன் என பதிக பாடலில் வருவதாலும், நீர் விரும்பும் தாவரங்களில் எருக்கும் உண்டு என்பதை புரிந்து கொள்ள வேண்டியது அவசியம்.

இந்த கோளறு பதிகம் முழுவதும் நீரின் முக்கியத்துவத்தை வைத்து தான் அமைந்துள்ளது என்பதை புரிந்து கொள்ளுங்கள். அதனால் தான் நவக்கிரக பிரச்சனை உள்ளவர்கள் இந்த கோளறு பதிகம் பாட வேண்டும் என்று சொல்லுவார்கள்.

கேது கிரகத்தினால் ஏற்படும் சிக்கலுக்கு பிள்ளையார் வழிபாடும் முக்கியமாக சொல்லப்படுகிறது.

வாய்ப்பு கிடைப்பவர்கள் கட்டாயமாக எருக்கு வளர்க்க வேண்டும். எருக்கு வளர்க்க கூடாது என்று சொல்லி நம்மை வேறு பக்கம் திசை திருப்பி வைத்து இருப்பார்கள் அவைகளுக்கு செவி கொடுக்காமல் எருக்கத்தம்புலியூர் என்பது தேவார பாடல் பெற்ற திருத்தலம், என்பதை புரிந்து கொண்டு நீர் வளத்தின் முக்கியத்துவத்தை புரிந்து கொள்ளுங்கள்.

எருக்கு, நமக்கு இருக்கு என அழுத்தமாக சொல்லுங்கள்.

மற்ற சடங்குகளில் கூட நீரை வைத்து தான் சடங்கு செய்கிறோம் என்பதால் பிள்ளையார் வழிபாட்டை புரிந்து கொண்டு நீர் வளம் காப்போம் நிறைவான வாழ்வை பெறுவோம்.

நல்லதே நினைப்போம். நல்லதே நடக்கும்.