வெளிச்சத்திற்கு வாங்க 23

 

“வெளிச்சத்திற்கு வாங்க...”

-   23 -

அது ஒரு இரவு நேரம்.

அவசர அவசரமாக சாப்பிட்டு விட்டு அவள் கிளம்பினாள். அவள் தங்கி இருந்த அறை இரண்டாவது மாடியில்..

யாரோ பின்னால் இருந்து follow-up செய்வது போல உணர்ந்ததால், அவள் லிப்ட் பயன்படுத்தாமல் மாடிப்படி வழியாக ஏறி செல்ல முடிவு செய்து, படிக்கட்டில் கால் வைக்க தொடங்கினாள்.

அவள் நினைத்தது போலவே ஒரு உருவம்.. கறுப்பு நிறத்தில் ஜீன்ஸ் பேன்ட், வெள்ளை நிறத்தில் டீ ஷர்ட்... அந்த டீ ஷர்ட்டில் நீல நிறத்தில் ஆங்கிலத்தில் ஏதோ எழுதி இருக்கிறது.. இருட்டில் என்ன எழுதி உள்ளது என சரியாக தெரியவில்லை.

அவள் உயரமான செருப்பு அணிந்து இருந்ததால், அவள் ஒவ்வொரு படிக்கட்டிலும் கால் வைக்கும் போதும், “டொக்....”  “டொக்” என்ற சப்தம்.. அது காலனியின் சப்தம் தான். அந்த சப்தத்தின் எதிரொலி போல் இன்னொரு “டொக்..”, “டொக்...”

நிச்சயம் அது அந்த ஜீன்ஸ் போட்ட உருவத்தின் shoe சப்தம் தான்.. அவள் பயந்து அடித்து அவசரமாக ரூமுக்கு போய் கதவை தாழிட்டு கொண்டாள்.

சிறிது நேரத்தில்...மறுபடியும் ”டொக்...” “டொக்...” இது கதவை தட்டும் சப்தம்..

பயந்தபடியே கதவை திறக்கலாமா வேண்டாமா என்று யோசனையில், சிறிது நேரத்திற்கு பிறகு மெதுவாக கதவை திறந்த அவளுக்கு காத்திருந்தது ஒரு பெரிய அதிர்ச்சி.. அவ்வளவு தான்..

மறுநாள் காலையில் தலைப்பு செய்தி, பிரபலமான இவர் மரணம். அது கொலையா தற்கொலையா என விசாரணை நடந்து கொண்டு இருக்கிறது. பிரேத பரிசோதனைக்கு பிறகு தான் முழு விவரம் தெரியும் என்று சஸ்பென்ஸ் தருவது போல ஒரு செய்தி.

உங்களை கொஞ்சம் தட்டி எழுப்பிக் கொள்ளுங்கள்.. இது க்ரைம் கதை அல்ல... இது போல செய்திகள் பல இடங்களில் இருந்து நாம் விரும்பாவிட்டாலும் நம் வீட்டு தொலைக்காட்சி பெட்டியிலும் செய்தி தாள்களிலும் வந்து கொண்டு தான் இருக்கிறது.

அது சரியா தவறா என்று சொல்வது நம்ம வேலை இல்லை.. எந்த மரணத்தை பற்றி குறிப்பிட்டு சொல்வதும் நமது வேலை இல்லை.

ஒரு ஜாதகத்தை பார்த்து, எதிர்கால சம்பவங்களை சொல்கிறோம். திருமணம் தொழில் மற்றும் மருத்துவ சோதிடம் என பல நிலைகளில் சோதிடம் சொல்லப் படுகிறது என்பதை அறிகிறோம்.

ஆனால், தொடர்ந்து இது போல பல செய்திகள் வந்து கொண்டு இருப்பதால், துப்பறியும் துறையில் இந்த சோதிட குறிப்புகள் உதவியாக இருக்குமா? அது எப்படி என்று சொல்ல முடியுமா? என்று சிலருக்கு சிந்தனை வரலாம். அவர்கள் சிந்தனைக்கு பதில் தருவதற்கு தான் இந்த வார செய்தி.

ஆண்டாண்டு தோறும் அழுது புரண்டாலும் இறந்தவர் மீண்டு வர போவது இல்லை. பிறப்பு என்று ஒன்று இருக்கும் போது நிச்சயம் இறப்பு வந்தே தீரும். அது எப்போது எப்படி என்பது தான் மில்லியன் டாலர் கேள்வியாக இருக்கும்.

பொதுவான நிலையில் ஒரு மரணம் ஏழு வகையில் வரலாம். அவை, 1) இயற்கையாக சம்பவிக்கும் மரணம் 2) கொலையால் வரும் மரணம் 3) தற்கொலையால் வரும் மரணம் 4) விபத்தில் சம்பவிக்கும் மரணம் 5) கூட்டு மரணம் (maas death) 6) அரசு தண்டனையால் மரணம் 7) மருத்துவ சிகிச்சையில் மரணம். இதை பொதுவாக மரணம் துர்மரணம் என்ற இரண்டில் அடக்கி விடலாம் என்றாலும் தனித்தனியாக சொல்வது தான் சோதிட குறிப்புகள்.

ஒரு மரணம் சந்தேகத்தின் பார்வையில் நடந்து விட்டால், இறந்த அந்த உடலை மருத்துவ ரீதியில், துப்பறியும் பார்வையில் உடல் கூறு ஆய்வு (போஸ்ட் மார்டம்) செய்வார்கள். அதில் தரும் ரிப்போர்ட் வைத்து மேல் விசாரணை செய்ய இது உதவியாக இருக்கும். நீதி மன்றத்தில் இது சாட்சியாகவும் பல சமயங்களில் செயல்படும்.

சோதிட பார்வையில் இதை சொல்ல வேண்டும் என்றால், குறிப்பாக சில சிந்தனைகளை மட்டும் உங்களுக்கு தருகிறேன் சரியாக உள்ளதா சொல்லுங்கள்.

பொதுவாக சோதிடத்தில், பிரேத தோஷம், பிரேத சாபம், பித்ரு சாபம், பித்ரு தோஷம், தனிஷ்டை என பல நிலையில் சொல்லுவார்கள்.

ஆனால் பாருங்கள், ஒரு மரணம் கொலையா ..? தற்கொலையா...? என்று சொல்வதற்கு நமக்கு கை கொடுக்கும் கிரகங்கள், சனி, ராகு, செவ்வாய் மற்றும் புதன்.

புதன் வந்தால் அது தற்கொலையாக இருக்கும். சனி ராகு செவ்வாய் வந்தால் அது கொலையாக இருக்கும். ராகுவுக்கு பதில் கேது வந்தால், கொலையை தற்கொலையாக திரித்து சொல்வார்கள் மற்றவர்களையும் அப்படியே நம்ப வைத்து விடுவார்கள். என்பதை புரிந்து கொள்ள வேண்டும்.

சரி இதை எப்படி ஜாதகத்தில் பொருத்தி பார்ப்பது என்று கேட்க வருகிறீர்கள் புரிகிறது. இறந்தவரின் ஒரு ஜாதகத்தை வைத்து இவர் எப்படி இறந்து இருப்பார் என்று சொல்வது போல “புண்ணிய சக்கரம்” போட்டு அடுத்த இந்த ஆவி என்னவாக இருக்கும் என்று சொல்லும் முறையும் நமது பழக்கத்தில் உண்டு என்பதையும் தெரிந்து கொள்ளுங்கள்.

சம்பவம் நடந்த அன்றைய கோச்சாரத்தையும் துணையாக கொண்டு ஒரு மரணம் கொலையா..? தற்கொலையா என்று சொல்லி விடலாம். சட்ட ரீதியாக நிரூபணம் செய்ய வேறு பல முறை இருந்தாலும், சோதிட பார்வையில் இதை இப்படி சிந்திக்கலாம்.

செவ்வாய், ராகு, சனி தொடர்பு இருந்தால், அது கொலை மரணமாக இருக்கும். இது போன்ற துப்பறியும் சோதிட முறையை அனுபவம் பெற்ற சோதிடரால் மட்டுமே சொல்ல முடியும். எனக்கு அப்படி இருக்கிறதே என்று யாரும் பயப்படவோ, சந்தேகமாக கேட்கவோ தேவையில்லை..

இது ஒரு குறிப்பு அவ்வளவு தான் இது போன்ற நிகழ்வுகளுக்கு அஷ்டமாதிபதி நிலை, 2 மற்றும் 7 ஆம் இடத்தின் நிலை கோச்சாரத்தில் அஷ்டமாதிபதியுடன் இணைவை பெற்ற கிரகங்கள் அது அமர்ந்த இடம் என பல நிலையில் வைத்து சிந்திக்க வேண்டும் என்பதை புரிந்து கொள்ளுங்கள்.

இதில் ராகுவுக்கு பதில் கேது வந்தால் கொலை தற்கொலையாக சித்தரித்து சொல்லப்படும் மக்களும் அதை நம்பி விடுவார்கள் எனபதையும் புரிந்து கொள்ளுங்கள்.

இது எல்லாம் சோதிட பார்வையில் சொல்ல வரும் செய்திகள் தான், இது சோதிட ஆர்வலர்களின் ஆய்வுக்கும் அறிவுக்கும் தரப்பட்ட சிந்தனை என்பதை கருத்தில் கொண்டு சிந்தியுங்கள்.

நல்லதே நினைப்போம். நல்லதே நடக்கும்.