வெளிச்சத்திற்கு வாங்க 22

 

“வெளிச்சத்திற்கு வாங்க...”

-   22 -

சார்...

நான் கணக்கில கொஞ்சம் வீக்... என்று சொல்லும் நபரா நீங்கள்.

பட்டனை தட்டினால் சோதிட கட்டம் வந்து விடுகிறது அப்புறம் எதுக்கு சார் கணக்கு எல்லாம். எல்லாம் கண் கட்டி வித்தை போல அஷ்ட வர்க்கம் தச வர்க்கம் என ஒன்னு விடாமல் நொடியில் கிடைக்கிறதே என்று சொல்றீங்க புரிகிறது..

முன்பே சொன்னது போல தான் வாழ்க்கையோடு ஒன்றி பிணைந்தது தான் சோதிடம். இது சோதிடம் என்று தெரியாமல் நாம் அதை பயன்பாட்டில் வைத்து இருக்கிறோம் என்பது தான் உண்மை என்பதை நாம் உணரும் போது தான் இதன் உண்மை விளங்கும்.

சரி.. இதை இப்படி சொல்லி காட்டுகிறேன் சரியாக உள்ளதா சொல்லுங்கள்..

இன்றைய நாளில் நமக்கு அடிப்படை மின்சார கணக்கு தெரிந்து இருக்க வேண்டிய அவசியம் வந்து விட்டது.. தமிழகத்தில், மின் கட்டணம் உயர போகிறதோ இல்லையோ.. எப்படியாவது மின் கட்டணத்தை குறைக்க வேண்டும் என்ற முயற்சியில், சோலார் போடலாமா என்று அவரவர்கள் யோசிக்க தொடங்கி விட்டார்கள்.

பெட்ரோல் விலையை பார்த்து பயந்து பேட்டரி வண்டிக்கு மாறுவது போல என்று நீங்க சொல்ல வருவது காதில் விழுகிறது.. நாம் அந்த பிரச்னைக்கு போக வேண்டாம்.

இந்த சோலார் கணக்கு என்று தொடங்கியதும், volt, amps, waat என கணக்கு பண்ணி, எத்தனை வாட் சோலார் பேணல் போட வேண்டும் என்று கணக்கு போட தொடங்கினால், வோல்ட் ஆம்ப்ஸ், வாட் இதெல்லாம் என்ன என்று சொல்ல வேண்டும். அதை இன்னொரு சமயத்தில் வாய்ப்பு கிடைக்கும்போது சிந்திப்போம். இல்லை என்றால், எலெக்ட்ரிக்கல் தெரியாதவர்கள் நம்மை ஒரு மாதிரி பார்க்க தொடங்கி விடுவார்கள்.

அதனால் சுலபமாக புரிந்து கொள்ள சின்ன விஷயத்தை எடுத்துக் கொள்வோம். ஒரு பிளக் வயரை பாருங்கள். அதில் இரண்டு வயர் நிச்சயம் இருக்கும். ஒரு கருப்பு வயர் இருக்கும். இன்னொன்று சிவப்பு வயர் இருக்கும். கருப்பு வயர் தான் நெகடிவ் என்று சொல்லுவாங்க, சிவப்பு வயர் தான்பாசிடிவ் என்று சொல்லுவாங்க.. இந்த இரண்டும் இருந்தால் தான் பல்பு ஒளிரும், அல்லது மின்சாதன பொருள் வேலை செய்யும்

அட ஆமாங்க...! என்று சொல்லியபடியே சோதிடத்தை கூட எடுத்துக் கொள்ளுங்கள்.. கருப்பு தான் சனி, சிவப்பு தான் செவ்வாய் என்பதை அதன் நிறத்தில் இருந்தே புரிந்து கொள்ள முடியும் இல்லையா.

இப்போ கருப்பு, சிவப்பு (நீங்க வேற எதையாவது நினைக்க போறீங்க.)  அதாவது நெகடிவ் மற்றும் பாசிடிவ் இரண்டையும் ஒரே இடத்தில் கொடுத்து பாருங்கள். உடனே fuse போயிடும் அல்லது வெடித்து விடும் இல்லையா..

ஒரு ஜாதகத்தில், சனியும் செவ்வாயும் சேர்ந்தால் விபத்து ஏற்படும் இல்லையா. (சனி மேல் கோச்சார செவ்வாய் என்று சொன்னால் தெளிவாக புரியும்) இவ்வளவு தான் சோதிட சிந்தனை என்றால் இயல்பு நிலையில் ஒரு சோதிட குறிப்பை எத்தனை சுலபமாக வைத்து இருக்கிறார்கள் என்பதை புரிந்து கொள்ள முடிகிறது அல்லவா. இது போன்ற சோதிட குறிப்புகளை மனதில் பதித்து விட்டால் ஜாதகத்தை பார்த்தவுடன் அல்லது கோச்சாரத்தில் உள்ள கிரக நிலைகளை பார்த்தவுடன் இதை சொல்ல முடியும் அல்லவா.

நியூற்றல் என்று ஒன்று இருக்குமே அது என்ன என்று குறுக்கே கேட்க வருகிறீர்கள் புரிகிறது அது மஞ்சள் நிறத்தில் இருக்கும். அது தான் புதன்.

புதனுக்குரிய நிறம் மஞ்சள், செவ்வாய்க்கு உரிய நிறம் சிவப்பு, சனிக்கு உரிய நிறம் கருப்பு மற்றும் அடர் கருநீலம் என்பதை சொல்லித்தானா உங்களுக்கு தெரிய வேண்டும்.

சரிங்க ஐயா, இதெல்லாம் சரி. ஆனால், நமக்கு take home என்பது போல இந்த கணக்கை வைத்து ஏதாவது சொல்ல கூடாதா என்று யோசிக்கிறீர்கள் புரிகிறது. உங்களுக்காக தான் இந்த வார சிந்தனை.

ஒரு பேப்பரையும் பேனாவையும்  எடுத்துக் கொள்ளுங்கள். இப்போ எங்கே சார் அதெல்லாம் எல்லாம் தடவி பார்க்கிற செல்போன் தான் என்று சொல்பவராக நீங்கள் இருந்தால் அதில் கால்குலேட்டர் பக்கத்தை திறந்து கொள்ளுங்கள்.

உங்கள் பிறந்த தேதியை எழுதிக் கொள்ளுங்கள். உதாரணமாக 1990, இத்துடன், இந்த ஆண்டின் தொகையை கூட்டிக் கொள்ளுங்கள், (1+9+9+0=19) அந்த தொகையை பிறந்த ஆண்டுடன் கூட்டிக் கொள்ளுங்கள். அதாவது (1990+19=2009) இப்போ பிளாஷ் பேக் ஒட்டி பாருங்கள், அந்த ஆண்டு உங்கள் வாழ்க்கையில் திருப்பு முனையை தந்து இருக்கும்.

அட ஆமாங்க....! என்று சொல்ல வருகிறீர்களா கொஞ்சம் பொறுங்கள்..

இப்போ கிடைத்த இந்த தொகை அதாவது 2009 உடன் இந்த கூட்டு தொகையை கூட்டி கொள்ளுங்கள் (அதாவது 2009+11=2020) மறுபடியும் இந்த 2020 ஆம் ஆண்டு உங்கள் வாழ்க்கையில் திருப்பு முனை ஏற்பட்டு இருக்கும்.

இதே போல கூட்டிக் கொண்டே போனால் அடுத்த திருப்பு முனை உங்கள் வாழ்கையில் எப்போது என்று நீங்களே தெரிந்து கொள்ளலாம். இந்த கணக்கு எட்டு முறை வரை சரியாக வரும் என்ற குறிப்பையும் சேர்த்து தெரிந்து கொள்ளுங்கள்..

இந்த கணக்கு தெரிந்து கொண்டால் முதலில் சொன்ன சோலார் கணக்கை சுலபாக புரிந்து கொள்ள முடியும்.  அதாவது ஒரு மின்சாதனத்தின் வாட் என்பது  வோல்ட், மற்றும் ஆம்ப்ஸ் இதன் பெருக்கு தொகையே ஆகும். ஆக எத்தனை வாட் சோலார் பேணல் போடுவது என்ற கணக்கை தெரிந்து கொள்ள, எவ்வளவு லோடு நாம் பயன்படுத்த போகிறோம் என்பதை முதலில் தெரிந்து கொள்ள வேண்டும்.. அதாவது 200 வாட் பயன்பாட்டின் அளவு என்றால் 300 வாட் சோலார் பேணல் தேவை என்பதை புரிந்து கொள்ளுங்கள்.

இந்த சோலார் பேணல், நீல கலரில் (polycrystalline) வரும் அல்லது கருப்பு கலரில் (monocrystalline) வரும். இந்த இரண்டுமே கர்ம காரகனான சனியின் காரகத்துவ அமைப்பில் வரும். சூரியனும் சனியும் பகை என்பது நமக்கு தெரிந்த விஷயம் தான் இதை வைத்து சோலார் பேணல் கொண்டு எப்படி மின்சாரம் கிடைக்கிறது உபயோகிக்கும் பொருட்கள் எப்படி செயல்பாட்டில் வருகிறது என்ற சோதிட சிந்தனையை இணைத்து சிந்தித்து தான் பாருங்களேன்.. மற்றது உங்களுக்கே புரியும்.

நல்லதே நினைப்போம். நல்லதே நடக்கும்.