1.எதையும் எதிர்பாராமல் இருங்கள்

எதையும் எதிர்பாராமல் இருங்கள்

     மனிதமனம் எதையாவது...,  யாரிடமிருந்தாவது  பெற வேண்டும் என்ற எண்ணத்துடனே வாழ பழக்கப்பட்டு விட்டது. இது சரியா தவறா என்பதை விட இந்த சமூகமும் நம்மை அப்படி தான் தள்ளி விடுகிறது. 

சிறுபிள்ளைகளாக இருக்கும் போது, good boy/good girl என்ற பாராட்டு, வளர்ந்து பள்ளிக்கு போகும் போது ஆசிரியர்களிடம் இருந்து பாராட்டு, கல்லூரி படிப்பு முடித்து, வேலைக்கு போகும் போது, மற்ற ஊழியர்களுக்கு மத்தியில் நமக்கு கிடைக்க வேண்டிய அங்கீகாரம், திருமணம் ஆன பிறகு வாழ்க்கைத் துணைவரிடம் இருந்து பாராட்டு, இப்படியே வயதான பிறகும் நம்மை மற்றவர்கள் மதிக்க வேண்டும் பாராட்ட வேண்டும் என எதிர்பார்ப்பு. 

இந்த எதிர்பார்ப்பில் வளர்ந்துவிட்ட பிறகு வயது நிறைவடைந்து முதுமை அடைந்த பிறகு, நமக்கு யாராவது எதையாவது செய்ய வேண்டும். தர வேண்டும். நம்மிடம் பேச வேண்டும் என எதிர்ப்பார்க்கும் குணம் இருக்கிறதா.. முதலில் அதை கைவிடுங்கள். 

அட என்னங்க சார்.! புசுக்குன்னு இப்படி சொல்லிட்டீங்க! என சொல்லாதீங்க.. 

முதுமையில் வாழ பழக வேண்டிய முதல் பழக்கம் இது தான்.  இதை ஏன் பழக்கப் படுத்திக் கொள்ள வேண்டும்? அல்லது எப்படி பழக்கப் படுத்திக் கொள்வது என யோசிக்கிறீர்கள் புரிகிறது. 

முதுமையில் கை தவறி ஒரு பொருள் கீழே விழுகிறது. யாராவது எடுத்துக் தர மாட்டார்களா என்று யோசிப்பதை நிறுத்தி விட்டு, யாரையும் எதிர்பார்க்காமல் நீங்களே எடுக்க பழகுங்கள். வீட்டில் உங்கள் வசதிக்காக எதையாவது செய்து கொடுத்தால் வேண்டாம் அது உங்கள் வாழ்க்கை துணையாக இருந்தாலும் சரி, உங்களைப் பெற்ற பிள்ளைகளாக இருந்தாலும் சரி. உங்கள் வீட்டில் வாழ வந்த பிள்ளைகளானாலும் சரி.  மறுத்து நீங்களே செய்ய பழகுங்கள். 

இந்த உறுதிப்பாடு உங்கள் மனதில் வந்துவிட பழகிக் கொள்ளுங்கள்.  இந்த பழக்கம் இளமையிலேயே வர வேண்டும். அப்போது முதுமை எளிமையாக இருக்கும். இளமையில் பழகவில்லையா பரவாயில்லை முதுமையில் பழக்கப்படுத்திக் கொள்ள வேண்டும். 

பிள்ளைகளிடம் இருந்து பணத்தையோ, அன்பையோ, எதிர்பார்க்காதீர்கள். யாராவது நம்முடன் பேசமாட்டார்களா?! என்று எதிர்பார்க்காதீர்கள். போனை அவ்வப்போது எடுத்து நமக்கு message வந்து இருக்கா. யாராவது கூப்பிட்டு இருக்காங்களா? என எதிர்பார்க்காதீர்கள். எதிர்பார்ப்பு என ஒன்று இருந்தால் ஏமாற்றம் இருக்கும். இளமையில் ஏமாற்றம் வந்தால் சமாளித்துவிடலாம் முதுமையில் வந்தால்,  அதை எதிர்கொள்வது கடினம். 

என்ன சார் இது கொடுமை..!! யாராவது பேசமாட்டாங்களா? என எதிர்பார்ப்பது கூட தப்பா என கேட்காதீர்கள்.. 

உங்களிடம் யாருமே பேசவில்லை என்றால் கூட பரவாயில்லை. நாம் யாரிடமாவது பேசகூடாதா என யோசிக்கிறீர்கள். அதற்கு தான் உங்களுக்கு இந்த tips. 

பேசுங்கள்.  தாராளாமாக பேசுங்கள்.. இந்த உலகத்துடன் பேசுங்கள்.. மற்றவர்களுடன் பேசும் போது எப்படி பேச வேண்டும் என ஒரு நிமிடம் சிந்தித்து பேசுங்கள்.. ஆம்.. podcastல் பேசுங்கள்..!! உங்கள் நல்ல கருத்துக்களை கேட்க பலர் உலகம் முழுவதும் இருக்கிறார்கள்.. உங்களுக்கு என ஒரு podcast உருவாக்கி அதில் உங்கள் எண்ணங்களையும் கருத்துக்களையும் பகிர்ந்து கொள்ளுங்கள்..  இதை விட ஒரு அற்புதமான சந்தர்ப்பம் உங்களுக்கு முன்னாள் வாழ்ந்த முதியவர்களுக்கு கிடைக்கவில்லை அது இப்போது உங்களுக்கு கிடைத்து இருக்கிறது. அதனால் பேசுங்கள்..  

இதில் பெரிய டெக்னிக் அல்லது software என எல்லாம் தெரிந்து இருக்க வேண்டிய அவசியம் இல்லை. phoneல் மைக் செருகி பேச வேண்டியது தான். முதலில் பேசும் போது, தடுமாற்றம் வருவது இயல்பு அதை அப்படியே விட்டுவிட்டு ஒரு சில நாள் பழகினால் அது வழக்கத்திற்கு வந்து விடும். 

மற்றவர்கள் ரசிக்கும்படி பேசதெரியாது என சொல்லாதீர்கள். உங்கள் உணர்வுகளை வெளிப்படுத்துங்கள்.. ஒன்பது உணர்வுகளில் எதை வேண்டுமானாலும் வெளிப்படுத்தலாம்.  எதுவுமே எனக்கு பேச தெரியாது சொல்லாமல் மற்றவர்களிடம் பேச வேண்டும் என எதை சொல்றீங்களோ அதையே பேசுங்கள்.. முதலில் பேசியதை மறு நாள் கேட்டுப் பாருங்கள்.. 

ச்ச்சீ இதை இப்படி பேசி இருக்க கூடாது என்ற எண்ணம் உங்களுக்குள், வந்து விட்டால்,  மாற்றம் வந்து விட்டது உங்கள் முதுமைக்கான வயது குறைந்து விட்டது எனபொருள். இதை போய் எப்படி பேசுவது என நினைக்காமல் எதையும் பேசலாம். மறுநாள் நீக்கலாம். மறுபடியும் சேர்க்கலாம். 

இப்படி எதுவுமே தெரியாது என்பவர்கள் ஏதாவது ஒரு புத்தகத்தை எடுத்துவைத்துக் கொண்டு அதில் இருந்து ஒரு சில பக்கங்களை படித்து காட்டுங்கள். உங்களிடம் யாரும் பேசவில்லை என்ற உணர்வு உங்களுக்கு அறவே வராது. 

யாரையும், யாரிடம் இருந்து எதையும்  எதிர்பார்க்காமல் வாழ பழகி விட்டால் முதுமையை கையாள்வது சுலபம்.

 

"வாழ பழகலாம் வாங்க!"

புத்தகம் பற்றிய உங்கள் எண்ணக் கருத்துக்களை இங்கே பகிர்ந்து கொள்ளலாம்

GIVE FEEDBACK