24. நலம் தரும் திருத்தலம்

 

-   24 –

“ஆலயம் தொழுவது சாலவும் நன்று” என்பது ஒளவையார் வாக்கு.

அது சரி ஆலயம் என்றால் என சில சிந்தனைகள் வரலாம். நமக்கு பொதுவாக தெரிந்து இருக்கும். சில இடங்களில் உள்ள சிவ மூர்த்தங்கள் சுயம்பு என்று. சுயம்பு என்பது மனிதர்களால் உருவாக்கப்படாமல் தானே தோன்றிய மூர்த்தங்கள். மூர்த்தங்கள் என்பது சிலை அமைப்புகள் என்பதை நாம் அறிவோம்.

சரி இது போன்ற சுயம்பு லிங்கம், சிவன் கோவில்களில் இயல்பாக வழிபடு தலமாக அமைந்துவிடும். “உரு” ஏறினால் “திரு” ஏறும் என்று சொல்வது போல, சில திருத்தலங்கள் இது போல பெருமைக்குரியனவாக இருக்கும்.

அந்த வரிசையில் இந்த வாரம் நாம் சிந்திக்க தரும் திருத்தலம், செல்வ வளம் தரும் திருக்கோயில். இது ஒரு வரம் தரும் திருத்தலமாகவே போற்றப்பட வேண்டிய கோயில்.

இந்த திருக்கோயில் தமிழகத்தில் இல்லை என்பது ஒரு புறம் இருக்க, இந்த கோவிலின் அமைப்பு ஒவ்வொரு நகர்விலும் நம்மை பிரமிக்க வைக்கும்.

இந்த திருக்கோயில் உத்திராஞ்சல் மாநிலத்தில் டேஹ்ராடூன் என்று இடத்தில் இருக்கும் திருக்கோயில்.

இந்த திருக்கோயிலில் உள்ள லிங்கம் சுயம்பு மூர்த்தம். அது மட்டுமல்ல இது ஒரு குகையில் அமைந்த லிங்கம். குகையில் இருப்பது ஒன்று பெரிய விஷமில்லை. ஆனால் அந்த குகையில் எங்கிருந்து தண்ணீர் வருகிறது என தெரியாதபடி இந்த சிவ லிங்கத்தின் மீது தண்ணீர் விழுகிறது. அதுவும் சீரான இடைவெளியில் ஒரே அளவில் என்றால் ஆச்சரியமாக இருக்கிறது அல்லவா.

இன்னும் சொல்ல வேண்டும் என்றால், அந்த தண்ணீர் அமிர்தத்தை விட சுவை நிறைந்து இருக்கிறது. விழுந்த தண்ணீர் அடுத்த சில மணித்துளிகளில் இல்லாமல் போகிறது.

இந்த தண்ணீர் இயற்கையாகவே குகை வழியாக வருகிறது. யாரும் தண்ணீர் ஊற்றுவதில்லை. அருகில் தண்ணீர் ஓடை குளம் போன்ற எந்த அமைப்பும் இல்லை.

இப்படி ஒரு சிவன் கோவில் பிரமிப்பாகவும் இருக்கிறது. சாநித்தியம் பெற்ற திருக்கோயில் கேட்டதை உடனே வரம் தரும் திருத்தலமாகவும் விளங்குகிறது.

இந்த திருக்கோயில், துரோணர் இருந்த இடமாக சொல்லப்படுகிறது. சுமார் ஐந்து ஆயிரம் ஆண்டுகள் பழமைவாய்ந்த இந்த திருக்கோயில் அமைந்த இந்த குகையை துரோணர் குகை என்றே வழக்கத்தில் மக்கள் அழைக்கின்றனர்.

சாலை ஓரத்தில் அமைந்த இந்த திருக்கோயில் வரவேற்பு வளைவு நம்மை அழைக்கிறது. உள்ளே சென்றதும். தமிழக கோவில்கள் போல நீண்டு உயர்ந்த ராஜ கோபுரங்கள் பொதுவாக வட நாட்டு பகுதிகளில் இருப்பதில்லை என்றாலும் இந்த திருக்கோவிலிலும் அப்படி ஒரு பெரிய கோபுர அமைப்புகள் இல்லை.

தமிழக கோவில்கள் தான் பிரம்மாண்டமாக இருக்கும். சில கோவில்கள் சில ஏக்கர் கணக்கில் பெரியதாகவும் இருக்கும். ஆனால் வட நாட்டு கோவில்கள் பெரும்பாலும் பெரியதாக இருப்பது இல்லை என்பதை மனதில் நிறுத்திக் கொள்ளுங்கள்.

கோவில் உள்ளே நுழைந்ததும் குகை வழியாக சுவாமி தரிசனத்திற்கு போக முடியும். லிங்கத்தின்  பானம் சிறியதாக இருக்கிறது. இந்த குகையில் தண்ணீர் எங்கிருந்து வருகிறது என்றே தெரியவில்லை என்றாலும் 24 மணி நேரமும் லிங்க திருமேனியில் தண்ணீர் விழுகிறது. அதுவும் ஒரே சீராக, சீரான இடைவெளியில் என்றால் மனதை தொடுகிறது.

இந்த லிங்க திருமேனியின் முன் நின்று கண் மூடி சில நிமிடம் நமது வேண்டுதல்களை வைத்து கண் திறந்து பார்க்கும் போது, நீர் லிங்க திருமேனியில் விழுந்தால், நினைத்தது நடக்கும் என்பது போன்ற குறிப்பும் உள்ளது. இது synchronise ஆகும் போது, இந்த பலன் கிடைக்கும் என்பதை உறுதியாக நம்பலாம்.

சோதிட ரீதியாக சொல்ல வேண்டும் என்றால், நீச பங்கம் பெற்ற ஜாதகர்கள் யாராக இருந்தாலும் இது போன்ற திருத்தலங்களில் வழிபாடு இயற்றுவது அவசியம். இது போன்ற வாய்ப்பு கிடைக்காதவர்கள், சித்தர்கள் வழிபாடுகள், மகான்களின் சமாதிகளில் வழிபாடு செய்யலாம்.

அங்கிருந்து வரும் positive vibe நேர்மறை அதிர்வலைகள், வழிபாட்டின் பலனை பெற்றுத் தரும். சிவராத்திரி போன்ற விசேஷ நாட்களில் சுமார் 5 கிலோமீட்டர் நீளத்திற்கு மக்கள் வரிசை கட்டி வழிபாட்டிற்கு காத்திருப்பார்கள் என்றால் இந்த திருக்கோவிலின் சிறப்பை தனியாக சொல்ல வேண்டிய அவசியமில்லை.

சரி இந்த கோவிலுக்கு எப்படி போவது என்று தெரிந்து கொள்ள வேண்டாமா?

டேஹ்ராடூன் ரயில் நிலைத்தில் இருந்து சுமார் 6 கிலோமீட்டர் தூரத்தில் இந்த தபகேச்வர் திருக்கோயில் உள்ளது. டேஹ்ராடூன் ரயில் நிலைத்தில் இருந்து சிட்டி பஸ் வசதிகள் உண்டு. ஆட்டோ வச்திகளும் உண்டு. அங்கே ஆட்டோவுக்கு விக்ரம் என்று தான் பெயர். நேர்மையான ஆட்டோ ஓட்டுனர்கள் நியாயமான கட்டணத்தை தான் வாங்கி கொள்வார்கள். பயமில்லாமல் பயணம் செய்யலாம்.

உத்திராகன்ட்  மாநிலத்தில் உள்ள டெஹ்ராடூன் செல்வதற்கு டெல்லியில் இருந்து ரயில் வசதிகள் உள்ளது. தமிழகத்தில், மதுரையில் இருந்து வாரம் ஒரு முறை செல்லும் ரயிலும் உண்டு. விவரங்களை ரயில் அட்டவணையில் பார்த்து பயண திட்டத்தை வைத்துக் கொள்ளுங்கள்.

இந்த திருக்கோவிலுக்கு மட்டும் என திட்டமிடாமல், ஹரித்வார் ரிஷிகேஷ் போன்ற ஒரு யாத்திரையாக திட்டம் வைத்துக் கொண்டு ஒரு நாள் இதற்கு என ஒதுக்கி டெஹ்ராடூன் வரை சென்று வரலாம். இதன் அருகில் முசூரி வரை சென்று இயற்கை கொஞ்சும் எழில் அழகையும், ரசித்து விட்டு, இறைவன் அருளும் திருவருளையும் பெற்றுக் கொண்டு  வரலாம்.

முறையாக திட்டமிட்டு ஒரு பயண அட்டவனையை தயாரித்து அருகில் உள்ள திருத்தலங்கள், டூரிஸ்ட் தலங்கள் என பயணத்தை அமைத்துக் கொண்டால் முழு பயனையும் அடையலாம்.

இது போன்ற பகுதிகளுக்கு செல்லும் போது, குறிப்பாக டெஹ்ராடூன் போன்ற இடங்களுக்கு செல்லும் போது, ஹிந்தி தெரிந்து இருப்பது அவசியம் அல்லது ஹிந்தி தெரிந்தவர்களை உடன் அழைத்து செல்வது நல்லது. ஆங்கிலத்தை வைத்து சமாளித்துக் கொள்ளலாம் என்ற துணிவுடன் சென்றால் ஏமாற்றம் தான் கிடைக்கும் என்பதை புரிந்து கொள்வது சிரமம் இல்லாத பயணத்திற்கு துணையாக இருக்கும்

இந்த உலகில் வாழும் காலம் கொஞ்சம் தான். இது போன்ற இடங்கள் சென்ற வர வாய்ப்பு கிடைக்கட்டும் என்று காத்திருக்காமல் வாய்ப்புகளை ஏற்படுத்திக் கொண்டு துணிந்தால், வழி கிடைக்கும்.

நல்லதே நினைப்போம். நல்லதே நடக்கும்..