23. நலம் தரும் திருத்தலம்

 

-   23 –

வாழ்க்கையில் தான் எத்தனை மாற்றங்கள்... சமூக கலாச்சாரத்தில் மாற்றம் ஆண் பெண் வேறுபாடு இன்றி, உடலை ஓட்டியை உடை என உடை நாகரீகத்தில் மாற்றம். பேச்சு மொழி நட்பு உறவு என அனைத்திலும் மாற்றம்.

தெரிந்தோ தெரியாமலோ இதை நாம் ஏற்றுக் கொள்ள பழகி விட்டோம். இதை ஏற்றுக் கொள்ள தயங்குபவர்கள் அல்லது மறுப்பவர்கள் இங்கே வாழ தகுதி இல்லாதவர்கள் போல ஆகி விடுகிறோம். அதனால் விரும்பியோ விரும்பாமலோ, விளம்பரத்தை பார்த்து வாழ்க்கையை பலர் மாற்றிக் கொண்டு இருக்கிறார்கள் என்பது இன்றைய நிதர்சனம்.

உடல் எடை குறைய வேண்டும் என்றால், அந்த உணவை எடுத்துக் கொள்ளுங்கள் இந்த உணவு முறையை பின்பற்றுங்கள் என்று அடுக்குபவர்களில் யாராவது ஒருவராவது வியர்வை சிந்த உழைக்க வேண்டும் என்று சொல்றாங்களா பாருங்கள். இது தான் இந்த மாற்றத்தை காட்ட ஒரு உதாரணம்.

மாத்திரை தினமும் எடுத்துக் கொள்ளாத எங்களைப் போல ஒரு சிலரையாவது உங்களால் காட்ட முடியுமா? என்றால் அது ஒரு மில்லியன் டாலர் கேள்வியாகவே இருக்கும்.

இப்போ சர்க்கரை வியாதி பரவலாக நம்முடன் வாழ்ந்து கொண்டு இருக்கிறது. சரி நம்ம வீட்டில் ஒருவராக இருக்கட்டுமே என நாமும் அதை விட்டு விட்டோம். அதை விட நம்மை முடக்கி போடும் இன்னொரு சிக்கல் இப்போ பரவலாக இருக்கிறது தெரியுமா?

ஆமாம். அது தான் ஆர்தரைடிஸ் என்று சொல்லக் கூடிய மூட்டு வலி பிரச்சனை. முன்பெல்லாம் வயதான பெண்களுக்கு என்று அடையாளம் காட்டப்பட்ட இந்த மூட்டு வலி பிரச்சனை இப்போது இள வயதினர்களுக்கே வருகிறது என்றால், நாம் எங்கே தவறு செய்கிறோம் என்று யோசிப்பதற்கு பதில், அவைகளுடன் வாழ பழகி கொண்டு விட்டோம் என்று தான் சொல்ல வேண்டும்.

தரையில் உட்கார்ந்து சாப்பிட்டு பழகிய தமிழ் சமுதாயம் இப்போது வீட்டுக்கு வீடு டேபிளில் உட்கார்ந்துகொண்டு சாப்பிடுகிறார்கள். சாதரணமாக கூட டிவி பார்க்கும் போது கூட கீழே உட்காருவதில்லை. விளைவு மூட்டு வலி பிரச்சனை, மூட்டு மாற்று பல லட்சம் செலவு செய்து வரும் அறுவை சிகிச்சை என நோய்க்கு தீர்வு சொல்வதற்கு நவீன மருத்துவமும் நம் முன் வந்து நிற்கிறது.

“ஆமாங்க ஐயா, இந்த மூட்டு வலி பிரச்சனை இருக்கே..” என்று நம்மை பார்த்ததும் அந்த வலி உணர்வுகளை நம்மிடம் கொட்டும் பலரை நாம் சந்தித்து இருப்போம். எத்தனையோ மருந்துகள், பல வித மருத்துவ முறை சிகிச்சைகள் என பார்த்து சோர்ந்து போன சிலருக்கு உற்சாகம் தர கூடிய ஒரு செய்தியை சொன்னால் .... சொல்லும் போதே கேட்க ஆவல் வருகிறது அல்லவா..?

உங்களுக்காக தான் இந்த வார திருத்தல குறிப்பில் இந்த வழிபாட்டு தலத்தை பகிர்ந்து கொள்ள போகிறேன்.

செல்லூர் என்றதும் உங்களுக்கு அவரைத் தான் நினைவில் கொண்டு  வர தோன்றும். இந்த வார சிந்தனையில் இடம் பெறும் திருக்கோயில், மதுரை அருகே செல்லூரில் உள்ள ஆப்புடையார் திருக்கோயில் தான், இந்த மூட்டு வலி பிரச்சனைகளுக்கு முழு தீர்வு தரும் திருத்தலமாக பரிந்துரைக்க படுகிறது.

தொடக்க நிலையில் உள்ளவர்களுக்கு மட்டுமின்றி நீண்ட நாட்களாக பிரச்சனை உள்ளவர்களுக்கும் வலியில் இருந்து விடுதலை பெற திருஞானசம்பந்தர் அருளிய ஆப்புடையார் திருத்தல பதிகத்தை படனம் செய்து வலம் வந்து வழிபட பிரச்சனைகள் குறைவதை கண் முன்னே காணலாம். இது ஒரு அனுபவ குறிப்பு என்று கூட கொள்ளலாம்.

இந்த ஆப்புடையார் கோவில், மதுரை மீனாட்சி அம்மன் கோவிலுக்கு வடக்கே சிம்மக்கல் பேருந்து நிலையத்தில் இறங்கி வைகை ஆற்று பாலத்தை கடந்து அந்த வழியாக செல்லலாம். அல்லது சாலை வழியாக ஆப்பனூர் பேருந்து நிலையத்தில் இறங்கியும் செல்ல முடியும். மதுரை பெரியார் நிலையத்தில் இருந்து பஸ் வசதிகள் உண்டு.

இந்த திருக்கோயிலில் உள்ள  லிங்கமூர்த்தி சுயம்பு. இந்த திருக்கோயில் மட்டுமல்ல இங்குள்ள லிங்கமும் அளவில் சிறியது தான் என்றாலும், பலன் தருவதில் அசாத்திய பலம் பொருந்தியது என்று சொல்வது மிகையல்ல.

பெரியதாக ராஜ கோபுரம்  என எதுவும் இல்லாமல் சிறிய சாலை ஓர சந்தில் இருக்கும் இந்த திருக்கோயில், தேவார பாடல் பெற்ற திருக்கோயில் என்ற பெருமைக்குரியது.

மதுரையை சுற்றி உள்ள பஞ்ச பூத தலங்களில், இது நீர் க்ஷேத்ரமாக சொல்லப்பபடுகிறது. இந்த திருத்தலத்தில் உள்ள சுவாமி தரிசனத்திற்கு ஒரு மாடத்தில் (சுமார் 5 அடி உயரத்தில் இருக்கும்) படிக்கட்டுக்கள் வழியாக பக்க வழியாக ஏறி செல்ல வேண்டும். சுவாமிக்கு நேராக செல்ல முடியாது. சுவாமிக்கு எதிரே உள்ள நந்திதேவர் உயரமான மாடத்தில் இருந்து அருள் பாலிக்கிறார்.

கிழக்கு நோக்கி உள்ள இந்த திருக்கோயிலில் சுகந்த குந்தாளாம்பிகை என்ற திருநாமத்துடன் அருள் பாலிக்கும் அம்மன் சன்னதி பிரகாரகத்தில்  தனியாக இருக்கிறது. அருள் மனம் கமழும் இந்த திருக்கோயிலில் ஒரு அரை மணி நேரம் அமர்ந்து தியானம் செய்தால் மன அமைதி கிடைக்கும் என்பதை அனுபவ வாயிலாக உணரலாம்.

சோமாஸ்கந்தர் அமைப்பில் அமைந்து இருக்கும் இந்த திருத்தலத்து முருகன், ஆக்ஞை விநாயகர்  என திருக்கோயிலை வலம் வந்து பஞ்சலிங்கத்தை தரிசனம் செய்து சுவாமியை வழிபட சிக்கல் தீர்ந்து நலம் பெறலாம்.

சோதிட ரீதியாக, சொல்ல வேண்டும் என்றால் எலும்பு தொடர்பான வியாதிகளுக்கு நில ராசியை கொண்டும் அதன் அதிபதிகளின் இருப்பு சேர்க்கை வைத்தும் சொல்ல முடியும். நிலத்திற்கு எதிராக உள்ள நீர் ஸ்தலங்களை தரிசனம் செய்வது வழிபாடு செய்வது என கொண்டால், மூட்டு வலி சிக்கலுக்கு தீர்வாக அமையும்.

மூட்டுகளில் friction (உராய்வு தன்மை) இருக்க வேண்டும் என்று தான் எண்ணை மசாஜ், தைலம் தடுவதல் ஒத்தடம் கொடுத்தல் என சில வழிமுறைகளை வலி மற்றும் சிக்கல் உள்ளவர்கள் அனுபவத்தில் கையாண்டு இருப்பார்கள் என்பதை நாமும் அறிவோம்.

அந்த வகையில் வாய்ப்பு ஒன்றை ஏற்படுத்திக் கொண்டாவது வைகை ஆற்று மணலை சோறு ஆக்கிய குபேரனை பெற்றுத் தந்த சுயம்பு லிங்கமாக அருள்பாலிக்கும் இந்த திருக்கோயிலில் திருஞானசம்பந்தர் அருளிய திருப்பதிகத்தை படனம் செய்து வழிபாடு இயற்றி நற்பலன் பெற அன்புடன் வேண்டுகிறோம்.

 .. நல்லதே நினைப்போம். நல்லதே நடக்கும்..