வெளிச்சத்திற்கு வாங்க 52

 

“வெளிச்சத்திற்கு வாங்க...”

-         -52-

கல்யாணம் கிரகபிரவேசம் போன்ற சுப நிகழ்ச்சிகளுக்கு போயிருப்பீங்க...

அங்கே மண்டபத்திற்கு போன உடன் ஒரு நாலு பேர், நின்று கொண்டு, டேபிளில் பன்னீர் தெளித்து, சந்தனம் கொடுத்து,கல்கண்டு தந்து, பூ முடிப்பையும் தருவார்கள். இப்போதெல்லாம்  பேட்டரியில் ஓடும் ஒரு பொம்மையை நிற்க வைத்து எல்லோரையும் கும்பிடுவது போல வைத்து இருப்பார்கள். இது சரியா தவறா என்று சொல்ல வரவில்லை.

சுப நிகழ்ச்சிகளுக்கு சென்று வரும் போது, ஒரு தட்டில், வெற்றிலை, பாக்கு, பழம் தேங்காய், மற்றும் பூ வைத்து தருவார்கள் இதை தாம்பூலம் தருதல் என்ற சடங்காக வைத்து இருப்பார்கள்.

இது போன்ற தாம்பூலம் தரவில்லை என்றாலோ அல்லது இதில் ஒன்று குறைந்தாலோ, அவ்வளவு தான் மண்டபமே அமர்க்களப்படும் அளவுக்கு சண்டை வந்து விடும்.

இப்போதெல்லாம் அப்படி இல்லை.. எல்லாவற்றையும் ஒரு நெகிழி அதாங்க பிளாஸ்டிக் பையில் போட்டு டேபிளில் வைத்து பக்கத்தில் குழந்தைகள் அல்லது இள வயது பெண்களை கையில் மொபைலை கொடுத்து ஆளுக்கு ஒரு பை தான் எடுத்து செல்ல வேண்டும் என சொல்லி, நிற்க வைத்து விடுகிறார்கள். போகிறவர்கள் டோக்கனை காட்டி எடுத்துக் கொண்டு போவது போல, ஆளுக்கு ஒரு பையை எடுத்துக் கொண்டு போகிறார்கள்.

இது என்னவோ சம்பிரதாயத்திற்கு தருவது போல இருக்கிறது. என்று நினைக்க போறீங்க.. உண்மையில் அப்படி தான் இருக்கு. தாம்பூலம் தருவது என்பது இப்படி இல்லை என்பதை முதலில் புரிந்து கொள்ளுங்கள்

அது சரிங்க.. கால சூழலுக்கு ஏற்ப வந்த மாற்றங்கள் தானே. இதை பெரிதாக சொல்ல வேண்டுமா என்று நீங்கள் கேட்க வருகிறீர்கள் புரிகிறது. அதை சொல்வதற்கு தான் இந்த வார பதிவு.

இறைவனை வழிபட அஷ்ட புஷ்பங்கள், பிறப்பிலி இறைவனை வழிபட வேண்டிய அட்ட வீரட்ட தலங்கள், அஷ்ட மா சித்துக்கள், அஷ்ட கர்மங்கள் என்ற வரிசையில் அஷ்ட மங்களங்களும் உண்டு.

அந்த அஷ்ட மங்களங்களில்  முதலில் வருவது இந்த தாம்பூலம் தான். சாப்பிட்ட பிறகு தாம்பூலம் தரித்தல் என்ற சடங்கே இந்து வாழ்க்கை முறையில் உண்டு என்று நம்மில் எத்தனை பேருக்கு தெரிந்து இருக்கும் என்று நினைக்கிறீர்கள்.

இப்பவும் சில பெரிசுகள், இதை பழக்கத்தில் வைத்து இருக்கிறார்கள் என்றாலும், சிலர் இதில் இன்றைய நாளில் சுவைக்காகவோ அல்லது வேறு காரணத்திற்காகவோ  புகையிலையையும் சேர்த்துக் கொள்கிறார்கள். அது ஆன்மாவிற்கு மட்டுமல்ல ஆயுளுக்கும் கெடுதியை செய்ய கூடியது என்பதை தெரிந்து கொண்டால் நல்லது.

 

தாம்பூலம் என்றதும் ஏதோ  வெற்றிலை வைத்தோமோ இரண்டு பழத்தை வைத்தோமா என்று இருக்க கூடாது அதற்க்கான சில வழி முறைகளை தருகிறோம் சரியாக உள்ளதா சொல்லுங்கள்.

ஒளி கிரகமான சூரிய, சந்திரனையும் இருள் கிரகமான ராகு கேதுவும் நீங்கலாக, மீதம் உள்ள பஞ்ச பூதங்களை குறிக்கும் ஐந்து கிரகமும் இந்த தாம்பூலத்தில் இடம்பெறும் என்பதாலேயே இது சுப நிகழ்ச்சிகளில் முக்கியத்துவம் பெறுகிறது.

ஏன் இருள் கிரகங்களையும் ஒளி  கிரகங்களையும் நீங்கலாக என்று யோசித்து பாருங்களேன்.. எங்கே ஒளி இருக்கிறதோ அங்கே எல்லாம் இருள் இருக்கும். “ஒளிக்கும் இருளுக்கும் இடம் ஒன்றே” என்பது சித்தாந்த சாத்திரங்கள் பதினான்கனுள்  ஒன்றான உமாபதி சிவாச்சாரியார் அருளிச்செய்த “கொடிக்கவி” என்ற நூலில் காணாலாம்.

சரி இந்த தாம்பூலம் எப்படி முறையாக தர வேண்டும் என பார்க்கலாம். தாம்பூலம் தரும் போது, தருபவர் கிழக்கு பார்த்தபடி இருந்து தர வேண்டும். பெறுபவர் மேற்கு நோக்கி நின்று பெற வேண்டும். அது சமயம்  வெற்றிலை நுனி பகுதி கிழக்கு நோக்கி இருக்க வேண்டும் அதாவது பெறுபவரை நோக்கி இருக்க வேண்டும்.

ஒரு வெற்றிலை கொடியில் இருந்து வரும் வெற்றிலை எப்படி பெறுபவரை நோக்கி நுனி இருக்கிறதோ அது போல இருந்து தர வேண்டும்.

ஆனால் தாம்பூலம் தரிக்கும் போது, காம்பையும் நுனியையும் கிள்ளி எரிந்து விட்டு, நடுவில் உள்ள நரம்பை கிழித்து அதில் மங்கள பொருட்களை வைத்து உமிழ்நீருடன் கலந்து சாப்பிட வேண்டும்.

இதில் இடம் மாறி கொடுத்தால் அதன் பலன் மாறும் என்பது தான் முன்னோர்கள் நமக்கு சொல்லி தந்தபாடம். 

முக்கனி என சொல்லும் மா பலா வாழை என்ற வரிசையில் மாவிலையை  வாசலில் கட்ட வேண்டும்  இதில் இலை வாசலை பார்த்து கட்டி இருந்தால் சுபகாரியம், வீட்டை பார்த்து இருந்தால் அசுப காரியம் என்று பொருள். பலா இலையில் தொன்னை. (தொன்னை என்பது இன்றைய நாளில் நாம் புரிந்து கொள்ளும் படி  சொல்ல வேண்டும் என்றால் கட்டோரி அல்லது கிண்ணம்) வாழை இலையில் சாப்பாடு என தனியாக இதில் உள்ள சோதிட சிந்தனையை இன்னொரு நாள் சிந்திக்கலாம்.

அது போல இந்த வெற்றிலையும் என்பதை புரிந்து கொண்டால் நல்லது. வெற்றிலையை தனித்து தர கூடாது என்பதை மனதில் பதித்து கொண்டு, இதனை சோதிடத்தில், சூரியனுடனோ சுக்கிரனுடனோ சேர்ந்து தான் புதன் இருக்கும். என்பதை சேர்த்து சிந்திக்க வைத்துக் கொள்ளுங்கள்.

அதனால் தான் பாக்கு (அல்லது சீவல்) இல்லாமல் வெறும் வெற்றிலை தர கூடாது. என்பது மரபாக சொல்லி வைத்து இருக்கிறார்கள்.

தனித்த புதன் கூட கூடுதல் பலன் என சொல்லுவார்களே! பத்ர யோகம் என்று வேறு சொல்லுவார்களே என கேட்க வருகிறீர்கள் அதை சோதிட அன்பர்கள் சிந்தனைக்கு தந்து விடலாம்.

அதற்கு மருந்துக்கு பயனாகும் வெற்றிலையை வைத்து சிந்தித்தால் இதன் விவரம் புரியும். வெறும் வெற்றிலையை வெந்நீரில் போட்டு கொதிக்க வைத்து அருந்துதல், வெற்றிலையுடன் உப்பு மிளகு சேர்த்து சுவைத்தல் வெற்றிலையை பற்று போடுதல்   போன்ற மருத்துவ குறிப்புகளை வைத்து சிந்திக்கலாம். இதனை இன்னொரு சந்தர்ப்பத்தில் மருத்துவ சோதிடத்தில் வைத்து சிந்திக்க வைத்துக் கொள்வோம்.

“பத்ரம்” என்றால் சமஸ்கிருதத்தில் இலை என்று தானே பொருள் என்பதை சொல்லாமலே விளங்கும். தனித்த புதன் பத்ர யோகம் இவைகளை, மருத்துக்கு பயனாகும் வெற்றிலையுடன் வைத்து சிந்தித்து பாருங்கள்.

துவர்ப்பு தன்மை கொண்டது பாக்கு, அல்லது சீவல்,  இது செவ்வாய் அம்சம். பூ சுக்கிர அம்சம். வாழைப்பழம்  குரு அம்சம் தேங்காய் சனி அம்சம். சிதறு காய் போடுவது, முழு தேங்காயை இறைவனுக்கு முன் உடைத்து நிவேதனம் செய்வது என அதனை தனியாக இன்னொரு சந்தர்ப்பத்தில் சிந்திக்க வைத்துக் கொள்வோம்.

ஆக இந்த ஐந்து கிரகத்தையும் இந்த தாம்பூலத்தில் வைத்து அறிந்து கொள்ள முன்னோர்கள் சொல்லி தந்த சோதிட குறிப்புகளே இவை என்றால் ஆச்சரியமாக இருக்கிறது அல்லவா.!

அது சரி சில வடக்கிந்தியர்கள் பீடா போடுவதை தவிர இப்போ யாருங்க சார் வெற்றிலை தாம்பூலம் போடுகிறார்கள். take home மாதிரி எங்களுக்கு ஏதாவது சொல்லுங்க என்று கேட்பது புரிகிறது.

சர்ப்ப கிரகங்களால் பாதிப்பு இருப்பவர்கள், சர்ப்ப கிரகங்கள் நடப்பு தசா புத்தியில் இருப்பவர்கள், ராகு கேது பெயர்ச்சியில் சிரமங்களை இந்த சனிப்பெயர்ச்சிக்கு பிறகு கூடுதல் பணச்சுமை தேவையில்லாத செலவு என சந்தித்துக் கொண்டு இருப்பவர்கள்  விநாயக பெருமானுக்கு வெற்றிலை மாலை சாற்றுங்கள்,

குறிப்பாக மாலை கட்டும் போது ஒவ்வொரு ஜோடி வெற்றிலையுடனும், ஒரு ஏலக்காய், ஒரு மலர் உடையாத இலவங்கம்/கிராம்பு சேர்த்து வைத்து மாலை கட்ட வேண்டும்.

இந்த வெற்றிலை மாலை எண்ணிக்கை ஒற்றைப்படையில் வரும் படி அமைத்து விநாயக பெருமானுக்கு சார்த்துங்கள். உங்கள் சுமை குறைந்து நிம்மதி கிடைக்கும்.

நல்லதே நினைப்போம் நல்லதே நடக்கும்.