வெளிச்சத்திற்கு வாங்க

 

“வெளிச்சத்திற்கு வாங்க...”

-   35 -

என்னப்பா.. நீ உப்பு போட்டு தான் சாப்பிடுகிறாயா?

என நாம் கேட்பதை பார்த்து இருப்போம். சிலர், அவர்கள் செய்யும் அக்கிரமங்களை எல்லாம் நாம் செய்வது போல திரித்து பேசுவார்கள். மற்றவர்களையும் அப்படியே நம்ப வைக்க முயற்சி செய்வார்கள். அது சரி இவர்கள் எல்லாம் உப்பு போட்டு தான் சாப்பிடுகிறார்களா என்பது போல நமக்கு கேட்க தோன்றும்.

அப்படினா, உப்பு போட்டு தான் சாப்பிடனுமா? என்று கேட்டு பாருங்கள்.  உணவில் ஒரு நாள் உப்பு போட மறந்து விட்டால் சிலர் வீடுகளில் தட்டுக்கள் பறக்கும் அன்றைய பொழுது வீடே அலங்கோலமாக இருக்கும்.

“தம்மா துண்டு சோறு – அதில தம்மா துண்டு உப்பு” அதுக்குன்னு இப்படியா? என்று கேட்காதீர்கள். உப்பு இல்லா பண்டம் குப்பையிலே என்று அன்று சொன்னவர்கள் இன்று உப்பு இல்லா பண்டம் ஆனாலும் அவை தொப்பையிலே என்பது போல சொல்லிக் கொண்டு இருக்கிறார்கள்.

“இது என்னங்க ஐயா உப்பு பெறாத விஷயம்” இதுக்குக் போய் என நீங்க அந்த டிவி பேட்டியை பார்த்து விட்டு சிரிக்கிறீங்க புரிகிறது. அந்த உப்பை பற்றி தான் இந்த வாரம் சொல்ல வந்து இருக்கேன்.

இந்த “உப்புன்னா என்னங்க?” என்று எப்போதாவது யோசித்து பார்த்தது உண்டா? நாம் சாப்பிடும் உப்பு சோடியம் குளோரைடு என்பது போல வேதியல் பார்முலா உங்களுக்கு சொல்ல போவது இல்லை.

விவரமாக கேட்டுக் கொள்ளுங்கள். உப்பு என்றால் “அன்பு” என்று தான் பொருள். என்னது உப்புக்கும் அன்புக்கும் என்னங்க தொடர்பு என்பது போல யோசிக்காதீர்கள்.

 

ஊடிப் பெறுகுவம் கொல்லோ நுதல்வெயர்ப்பக்

கூடலில் தோன்றிய உப்பு.

என்ற திருக்குறளை ஒரு முறை படித்து பொருள் தெரிந்து பாருங்கள். உங்களுக்கும் புரியும்.

இதை வைத்து தான் உப்பு (அன்பு)இல்லா  பண்டம் குப்பையிலே என்று சொல்லி வந்தது.. இதன் பொருள் அன்பு இல்லாமல் உள்ள உணவு பண்டம் பரிமாறபடுமானால் அவை குப்பையில் போட வேண்டும் என்பது தான் கருத்து. நம்ம மக்கள் வழக்கம் போல அதை ‘உப்புக்கு’ என எடுத்துக் கொண்டு விட்டதாக தெரிகிறது..

பொதுவாக காலில் வீக்கம் வந்தால் ‘உப்பி’ இருக்கு என்பார்கள்..  அதாவது அன்பு பெருகி பொங்குவது போல வீங்கி இருக்கிறது என்பது பொருள்.

இன்னும் தெளிவாக சொல்ல வேண்டும் என்றால்.. சாதாரணமாக நாம் சாப்பிடும் உணவுக்கு உப்பு அவசியமே இல்லை. ஆனால் நாம் தெரிந்தோ தெரியாமலோ இப்படி சாப்பிட்டு பழக்கப்பட்டு விட்டோம் என்பது தான் உண்மை.

(நீங்கள்) free flow உப்பு பயன்படுத்துபவர் என்றால்.. அது உப்பே இல்லை... இது பற்றி இன்னொரு சிந்தனையில் வாய்ப்பு கிடைக்கும் போது சிந்திப்போம்.. இப்போ தொடங்கிய சிந்தனைக்கு வரலாம்.

“உப்பிட்டவரை உள்ளளவும் நினை” – என்ற பழமொழியை நாம் அறிந்து இருப்போம். இங்கே அன்பை வைத்து சிந்திக்க வேண்டும்.. அன்பு உள்ளவர்களை உயிர் உள்ளளவும் நினைக்க வேண்டும் என்பது தான் பொருள். உப்பு போட்டு சோறு போட்டவரை என்று நீங்கள் தவறாக நினைத்துக் கொள்ள போகிறீர்கள்.

உப்பு வைத்த பானை நீர் கசியும்.. இல்லையா அது போல தான் அன்பு இருந்தால் அது கண்ணீரால் வெளிப்படும்.. இதனை தான் வள்ளுவரும்,  “புன்கணீர் பூசல் தரும்” என்று சொல்கிறது.

நமது தமிழர் கலாச்சாரத்திலும் பாருங்க, புதிய வீடு கட்டி கிரக பிரவேசம் போகும் போது.. உப்பை தான் முதலில் எடுத்து வைப்பார்கள்...  அன்பு கசிய வேண்டும் என்பதற்காக...

தமிழர் சாப்பாட்டில் இலையில், முதலில் உப்பை தான் வைப்பார்கள்.. அன்புடன் விருந்து படைக்கிறோம் என்பதை குறிப்பால் சொல்வதற்காக. ஆக.. உப்பு என்றால்.. சாப்பிடுகிற உப்பு அல்ல.. - அது "அன்பு" என்பதை புரிந்து கொள்ளுங்கள்.

அட.. இதுக்கு தான் சாப்பாட்டில் உப்பு சேர்க்கிறார்களா என்று கேட்க வருகிறீர்கள் புரிகிறது. இதை வைத்து சோதிட சிந்தனை சொல்லி விடலாமே என்று தான் சிந்தனைக்கு வந்தது உப்பு. இல்லை ... இல்லை ... அன்பு

அன்பு உள்ளவர்கள் நமக்கு வாழ்க்கை துணையாக வந்து விட்டால், அப்புறம் என்ன மற்றது தானே வரும் இல்லையா. இந்த  குறிப்பு சரியாக உள்ளதா சொல்லுங்கள்.

ஒருவருடைய ஜாதகத்தில் சந்திரனும் புதனும் சேர்ந்தோ, பலமாகவோ, கோனாதிபதியாகவோ இருந்து விட்டால், அவ்வளவு தான் அன்பு மழை ஆனந்தமாக பொழியும். அன்பில் சிறந்தவர்கள் இவர்கள் தான் என்று அடையாளம் காட்டி விடலாம். திருக்குறளில் அன்புடைமை அதிகாரமே இவர் தான் என்று சொல்லும்படி இருப்பார்கள்.

இயல்பான நிலையில் சொல்ல வேண்டும் என்றால் மூக்கிற்கு கீழே இவர்களுக்கு வியர்வை இருக்கும் அல்லது ஈர கசிவு இருக்கும். இது ஆணாக இருந்தாலும் பெண்ணாக இருந்தாலும் என்பதை அவரவர்கள் ஜாதகத்தை கொண்டு அல்லது அனுபவத்தை கொண்டு தெரிந்து கொள்ளலாம்.

அது சரிங்க அய்யா, திசை புத்தி என்று மாறிக்கிட்டே வருமே.. அப்போ இந்த அன்பும் மாறிவிடாதா என்று கேட்க வருகிறீர்கள் புரிகிறது. உண்மை தான். அன்பு என்பது உணர்வு, அந்த நிலைப்பாட்டில் மாற்றம் வராமல் இருக்க இங்கே தான் கேது தொடர்பை பார்க்க வேண்டும் இதுவும் சேர்ந்து விட்டால், பிறவி குணத்தை மாற்ற முடியாது என்று சொல்வது போல அமைந்து விடும். .

“அன்பு அகத்தில் இல்லாத உயிர் வாழ்க்கை” என்று திருக்குறள் சொல்லி இருப்பது போல அமைந்து விடாமல் இருக்க வேண்டும், இந்த குறிப்புகளை திருமண பொருத்தத்தில் மட்டுமல்ல காதல் பொருத்தத்திலும் பார்த்துக் கொள்ள வேண்டும்.

அன்பு உதட்டில் இருந்து வழிய கூடாது உள்ளத்தில் இருந்து பொங்க வேண்டும் என்பதை புரிந்து கொள்ளுங்கள். அதனால் தான் “உப்பு” என்றால் “அன்பு” என்று பொருள் என உலக புகழ் பெற்ற வின்ஸ்லோ அகராதியும் சொல்லும். உப்பு கசியும் என்பது போல அன்பும் கசிய வேண்டும்.

நல்லதே நினைப்போம். நல்லதே நடக்கும்.