வெளிச்சத்திற்கு வாங்க 17

 

“வெளிச்சத்திற்கு வாங்க...”

-   17 -

 

காதல் என்பது எதுவரை..? கல்யாண காலம் வரும் வரை...! என்று ஒரு பழைய சினிமா பாடல் வரும்..

இன்றைய நாளில் காதல் என்பது இதுவரை என்று தான் ஆகி விட்டது. காதல் என்பது தமிழர் கலாச்சாரத்தில் உள்ளது தான் என்பதை சங்க இலக்கியங்களில் இருந்து தெரிந்து கொள்ளலாம்.

முன்பெல்லாம் கூட காதலர்கள் இருந்தார்கள். காதல் தோல்வி என்றால் தற்கொலை என முடிவு செய்துவிடுவார்கள். அடுத்த கால கட்டத்தில், காதல் சோகம் என தாடி வைத்த படி வாழ்க்கையை கழித்தார்கள். அதற்கு அடுத்த கால கட்டத்தில், எங்கிருந்தாலும் வாழ்க என்ற மன நிலைக்கு வந்து விட்டார்கள். இன்றைய நாளில் விவாகரத்து செய்து விட்டு வரும் வரை காத்திருக்கிறேன் என்ற நிலையில் இருக்கிறார்கள்.

அது சரி இதெல்லாம் சரியா...?  என்ற லாஜிக் இல்லாமல் அப்படியே ஏற்றுக் கொண்டு வாழ பழகி விட்டோம் என்றாலும், சில அடிப்படைகளை தெரிந்து கொள்ளாமல் இருக்கலாமா?

திருமண வயதை தொட்டவர்கள், ஜாதக பொருத்தம் பார்ப்பது என்ற முக்கியமான கட்டத்தை கடந்து தான் ஆக வேண்டியது உள்ளது. திருமண பொருத்தம் என்றதும் தசவித பொருத்தம் என்று சொல்லும் பத்து வித பொருத்தங்களை வைத்து காலம் காலமாக சோதிட வல்லுனர்கள் பார்த்து வருகிறார்கள்.

காதல் நிலை மாறுகிறது, வாழ்க்கை முறை என எல்லாம் மாறும் போது, திருமண பொருத்தம் பார்க்கும் சோதிட, முறையில் மட்டும் மாற்றம் இல்லாமலா இருக்கும்.

ஒரு பெண்ணிற்கு ஆண் நண்பர் இல்லை என்றால் அது கௌரவ குறைச்சல், அதே போல ஆணுக்கும் என்ற கலாச்சார நிலையை இவர்களாகவே ஏற்படுத்திக் கொண்ட பிறகு, இது எல்லாம் பெரிய விஷயமாக படுவதில்லை. அதனால் தான் காதல் திருமணங்களும் முன்பை விட அதிகமாகி விட்டன.

காதல் திருமணங்களை பெற்றோர்களே அனுமதிக்கிறார்கள். இன்னும் சிலர் அவர்களே முடிவு எடுத்து திருமணம் செய்து கொண்ட பிறகு குடும்ப கௌரவத்திற்காக, வீட்டை விட்டு வெளியே போனவர்களை அழைத்து, இவர்கள் மறுபடியும் திருமணம் செய்து வைக்கிறார்கள்.

இது போன்ற நிலையில் தசவித பொருத்தம் பொருந்துமா என்ற சிந்தனை நமக்கு எட்டாமல் இல்லை. அதனால் தான் தச வித பொருத்தங்களுடன், வேதை பொருத்தம், தோஷ சாம்யம், பாவ சாம்யம், யாம சுக்கிரன், என்பனவற்றை சேர்த்து முஹுர்த்தமும் குறிக்கப்பட வேண்டும்.

தொடக்க நாளில் திருமணம் என்பது அறம்/தர்ம காரியங்கள் செய்வதற்கு தான் இருந்தது. அதனால் அறம் வளர வேண்டும் விருத்தியாகும் வம்ச வாரிசுகளும் தர்ம காரியங்கள் செய்து நாடு செழித்து வளர வேண்டும் என்று இத்தனையும் பார்த்தார்கள். ஆனால் இன்றைய நாளில் திருமணம் என்பது, பையனுக்கு இவ்வளவு சம்பளம், பெண்ணிற்கு இவ்வளவு சம்பளம், ஒரு குடும்பம் நடத்த இது போதுமா? என்று வியாபாரமாகி விட்டது.

எது எப்படி இருந்தாலும், அடிப்படையில் சில மாறாது. அதை இன்றைய நடைமுறை சூழலுக்கு ஏற்ப  உள்ள அணுமுறையில் கையாண்டால், சிக்கல் இல்லை என்பதை மறுப்பவர்களும் யாரும் இருக்க மாட்டார்கள்.

அடிப்படையில், குடும்ப வாழ்க்கைக்கு பத்து  முக்கிய அம்சங்கள் தேவை. அவை புரிந்து உணர்தல், நம்பிக்கை கொள்ளுதல், மகிழ்ச்சியாக வாழ்தல், ஆரோக்கியமான வாழ்வு, வம்ச விருத்தி, ஏற்றமிகு வாழ்வு, உறவுகளை பேணுதல், சவால்களை சந்தித்தல், நீண்ட ஆயுள், நிறைவான அறப்பணி என்பன.  வேறு எதை பட்டியல் படுத்தினாலும் அதை இந்த பத்திற்குள் கொண்டு வந்து விடலாம்.

இந்த ஒவ்வொரு அம்சங்களையும், சோதிட ரீதியாக உள்ள குறிப்புகளை உளவியல் ரீதியாகவும் அணுகி ஜாதக பொருத்தம் பார்த்தால், திருமண பொருத்தம் என்பது ஏற்புடையதாக இருக்கும். நிலையை

ஒரு சில குறிப்புகளை சொல்கிறேன் சரியாக உள்ளதா சொல்லுங்கள். ஒரு பெண்ணின் மனநிலையை சந்திரன் சுக்கிரன், கேது என்ற மூன்று கிரகங்களின் தன்மையில் சொல்லிவிட முடியும். ஒரு ஆணின் மனநிலையை குரு சந்திரன், ராகு மற்றும் கேது என்ற கிரகங்களின் தன்மையில் சொல்லிவிட முடியும்.

இந்த இரண்டில் மன ஒற்றுமை வந்தாலே அடுத்த கட்ட பொருத்தம் பார்க்க சென்று விடலாம். அதை விடுத்து பத்துக்கு ஆறு என்று மதிப்பெண் போட்டு மணப்பொருத்தம் பார்ப்பது ஒரு சடங்காக இருக்குமே தவிர சுபமான தீர்வை கொண்டு தராது.

இந்த மன ஒற்றுமை என்பது காதல் சொல்ல வரும் நிலையில் இருந்தே தொடரும். அதனால் தான் பல பெண்கள் இருக்கும் கூட்டத்தில் கூட ஒரு பெண்ணை மட்டுமே தேர்வு செய்யும் இளைஞர்கள் இதை மறுப்பது இல்லை. இதே போல பெண்களும் என்பதை புரிந்து கொள்ளலாம்.

இவரை திருமணம் செய்து கொள்ளலாமா என்று கேட்க வரும் ஆணும் பெண்ணும், இவரை காதலிக்கலாமா என்று கேட்க வருவதில்லை. காரணம் இந்த கிரக குண இயல்பு அடிப்படை தன்மை தான்.

சந்திரன் கேது செல்பி பிரியர், செவ்வாய் சுக்கிரன் காம சிந்தனை, சந்திரன் தொடர்பும் வந்து விட்டால் கனவில் கூட இப்படி தான் என்று சொல்லிவிடலாம். மேஷத்தில் ராகு, குறுக்கு புத்தி, இப்படி ஜாதகரின் மன நிலை உணர்வு நிலை இவைகளை பட்டியல் படுத்தி இது உளவியல் ரீதியாக பொருந்தி வரும் ஜாதகத்தை பொருத்தி பார்த்தால் முறிவு இல்லாத வாழ்க்கை, சிக்கல் இல்லாமல் இருக்கும்.

இன்றைய நாளில் திருமண பந்தம் என்பது ஒரு ஒப்பந்தம் போல ஆகி விட்டது. இதில் இத்தனை வருடம் என்பதை சிலரும், மறுமணம் செய்து கொள்ளும் பலரும், இருப்பதை விட கூடாது என்று சிலரும், பாதுகாப்பான வாழ்க்கை என்று கூட்டுக்குள் சிலரும் என இந்த கால நிலை விரும்பியோ விரும்பாமலோ ஏற்றுக் கொள்ள பழகி கொள்ள வேண்டும்.

இது சரியா, இது முறையா, இதை மாற்ற வேண்டாமா என்ற வீண் முயற்சிகள் எல்லாம் செய்யாமல் முடிந்தால் அப்படியே ரசித்து, கழித்து விட்டு போக வேண்டியது தான் புத்திசாலித்தனம்.

நல்லதே நினைப்போம். நல்லதே நடக்கும்.