வெளிச்சத்திற்கு வாங்க 16

 

“வெளிச்சத்திற்கு வாங்க...”

-   16 -

 

எந்த உயிராக இருந்தாலும், பிறப்பு என்று ஒன்று இருக்குமானால், நிச்சயமாக இறப்பு இருந்தே தீரும் என்பதில் எந்த மாற்றுக் கருத்தும் இல்லை. இராமனையும், கிருஷ்ணனையும், புராணங்களில் நமக்கு காட்டும் போதும், இதே சிந்தனையை நமக்கு சொல்லாமல் இல்லை.

இருக்கும் போது, மகிழ்ச்சியாக வாழ விரும்புவர்கள், இறந்த பிறகு என்ன ஆகிறோம் எங்கே போகிறோம் என்பது தெரியாமலே வாழ்ந்து விடுகிறார்கள்.

முற்பகல் செய்யின், பிற்பகல் விளையும் என்பது போல, அவரவர் நல்வினை தீவினைப் பயனாக வினைகளை அனுபவித்தே ஆக வேண்டும், இதனை, சிவஞான சித்தியார்,

“பேறு, இழவு, இன்பமோடு,பிணி மூப்பு சாக்காடு இவ்வாறும் முன் கரு உட்பட்டவாறு” என்கிறது. (பேறு-நற்பேறு; இழவு-இழப்பு, இன்பம்-மகிழ்ச்சி, பிணி-நோய், மூப்பு-முதுமை, சாக்காடு-மரணம்).

மரணம் அல்லது இழப்பு என்றால் ஓரு வகையில் பயம் இருக்க தானே செய்கிறது. இந்த வகையில் இவர் இறக்க வேண்டும் என்று எழுதி வைத்த கூற்றை எடுத்து படிக்க முடியாது என்றாலும் இறந்தபிறகு அந்த உயிர்களுக்கு செய்யும் கடன்கள் தான் இந்த வார சிந்தனைக்கு தருகிறோம்.

அது தான் வாழும் இந்த இல்லறம் நல்லறமாக அமைய துணை செய்யும். இல்லறம் சிறக்க தெய்வப்புலவர்; "தென்புலத்தார் தெய்வம் விருந்துஒக்கல் தான் என்று ஆங்கு ஐம்புலத்து ஆறு ஓம்பல் தலை'' என சொல்வது நமக்கு தெரியும் தானே.

பிதிரர்க்கும், தெய்வத்திற்கும், விருந்திற்கும், இனத்திற்கும், தனக்கும் என்று கூறி இல்லறத்தானின் கடமைகளுள் ஒன்றாக பித்ருக்களுக்கான  வழிபாட்டை சொல்லி இருக்கிறார் என்றால் இதனை அப்படியே விட்டு விடலாமா?

அதனால் பிறப்புக்கு செய்யும் சிறப்புகளை, பிறந்த போதும், வாழும் போதும் செய்வது போல,  இறப்புக்கும், அதன் பிறகும் செய்ய வேண்டும் என்பது சொல்லாமலே புரியும்.

இந்த நன்றி தெரிவிக்கும் செயல்கள் தான் வழிபாடு. எல்லா உயிர்களும் நன்றி உணர்வை வெளிக்காட்டும் இல்லையா. சரி இருப்பவர்களுக்கு தானே நன்றி சொல்ல வேண்டும். இல்லாதவர்களுக்கு எதற்கு சொல்ல வேண்டும்? சொன்னால் அவர்களுக்கு எப்படி போய் சேரும் என்பது போல எதிர்வாதம் பேசுபவர்களுக்கு தனியாக தொடராகவே எழுதலாம்.

ஒரு வருடத்தை இரண்டு அயனங்களாகப் பிரித்துள்ளனர். தை முதல் ஆனி வரை உள்ள ஆறு மாதம் “உத்தராயண காலம்” (வடக்கு) என்றும், ஆடி முதல் மார்கழி வரை உள்ள காலம் “தட்சணாயன காலம்” (தெற்கு) என்றும் அழைப்பர். உத்தராயணத்தின் தொடக்கம் தையாகவும் தட்சணாயத்தின் தொடக்கம் ஆடியாகவும் வருவதால், ஆடி-தை அமாவாசை வழிபாட்டில், முக்கியத்துவம் பெறுகிறது.

சோதிட ரீதியாக தந்தையை குறிக்கும் கிரகமான சூரியனும், தாயை குறிக்கும் கிரகமான சந்திரனும்,  சேர்ந்து இருக்கும் காலம்  தான் அமாவாசை திதி என்று சொல்லப்படும்.

ஒரு ஆண்டில் செய்ய வேண்டிய தர்பானாதி கர்மாக்களை முழுவதும் செய்ய முடியாவிட்டாலும் முக்கியமாக ஆடி அமாவாசை, தை அமாவாசை, மற்றும் மஹாளய அமாவாசை ஆகிய தினங்களில் செய்தே ஆக வேண்டும்.

இன்றைய நாளில், இதனை முறையாக செய்து வைப்பவர்களும் இல்லை. அவசரமாக எல்லோரையும் ஒன்றாக உட்கார வைத்து, எதையோ சொல்லி எதையோ செய்து விட்டு, தன் கடமை முடிந்து விட்டது என்பது போல, கூலிக்கு வேலை செய்வது போல அவர்களும் இருப்பதால், பலருக்கும் இந்த வழிபாட்டின் முக்கியத்துவம் தெரியாமல் போய்விட்டது. பிரச்சனை என்று வரும் பொது தான் பிராயச்சித்தம் தேடுகின்றனர்.  அதையும் இதே போல இன்னொரு முறையில் செய்து பலன் கிடைக்காமல் வருந்துகின்றனர்.

சிலர் இது போன்ற அமாவசை தர்ப்பணம் செய்யாமல் இருப்பதற்கு இதுபோல, நொண்டி சமாதானங்களை சொல்லிக் கொள்வார்கள்.

அவர்கள் தான் இறந்து விட்டார்களே அவர்களுக்கு இதை செய்தால் தெரியவா போகிறது என்று வறட்டு வாதம் பேசுவார்கள். இன்னும் சிலர் ஐயர்கள் கிடைப்பதில்ல்லை இருப்பவர்களும் சரியாக செய்வதில்லை எல்லாம் பணமா போச்சு சார்.. என்று தான் தான் தவறிய கடமைகளுக்கு நியாயம் சொல்லிக் கொண்டு இருப்பார்கள்.

ஏதோ தமிழ் மீது பற்று உள்ளவர்கள் போல, என்னமோ வேற மொழியில் சொல்றாங்க சார். நம்மையும் சொல்ல சொல்றாங்க, அவுங்களுக்கு புரியுதோ, இலையோ, நமக்கு ஒன்னும் புரியவில்லை. ஏதும் புரியாமல் சொல்லியோ, செய்தோ என்ன பயன் என்று தான் செய்வதில்லை என்று சிலர் இருப்பார்கள்.

நாலு பேருக்கு சாப்பாடு வாங்கி கொடுத்தால் போச்சு சார்.. இதுக்கு போய் எதுக்கு இத்தனை மெனக்கிட வேண்டும் என்று சிலர், நைட் ஷிப்ட் பார்க்கிற எங்களால், இதெல்லாம் செய்ய முடியுமா சொல்லுங்க, என்ன செய்யணுமோ அதை நீங்களே செய்து கொள்ளுங்கள். இந்தாங்க பணம் என கொட்டும் ஐடி துறை இளைஞர்கள்,

இது போல சொல்லும் யாராக இருந்தாலும் பெற்றோர்கள் இல்லாதவர்கள், அமாவாசை தர்ப்பணம் செய்தே ஆக வேண்டும்.

அப்படி செயாவிட்டால் என்று கேட்க தொடங்கினால், அதனால் வரும் சிக்களைகளை பட்டியலிட்டு சொன்னால் பயமாக தான் இருக்கும். இருந்தாலும் புரிதாலுக்காக இப்படி சொல்லலாம். வசதிகள் இருக்கும் வாரிசு இருக்காது; அறிவும் திறமையும் இருக்கும் வாய்ப்பு கிடைக்காது, எடுத்தவை எல்லாம் தடங்கலில் முடியும், முன்னேற்றம் எல்லாம் தடுமாற்றமாகும்.

கொலை, தற்கொலை, விபத்து, மருத்துவம் போன்ற ஏழு நிலையில் ஏற்படும் மரணத்தில் இவர் இந்த கதி அடைந்தார் என்பதை புண்ணிய சக்கரம் போட்டு பார்த்து அல்லது பிரச்சனம் போட்டு சொல்லுவார்கள்.

இறந்த போதும், இறந்த பிறகும், செய்ய வேண்டிய கர்மாக்களை செய்யாமல் இருந்தாலும், அமாவாசை தர்ப்பணங்கள் செய்யாமல் இருந்தாலும், தோஷம் அல்லது சாபம் என்ற நிலை ஜாதகத்தில் இருந்து தெரிந்து கொள்ளலாம்.

ஒரு ஜாதகத்தில் 5 மற்றும் 11 ஆம் அதிபதிகள் பாதக ஸ்தானங்களில்  இருப்பது, சூரியன் சந்திரன் நீசமாக இருப்பது, திரிகோணத்தில் சர்ப்ப கிரகங்கள் இருப்பது சனி தொடர்பான சர்ப்ப கிரகங்கள், ஒளி கிரகங்களுடன் தொடர்புடைய இருள் கிரகங்கள், சூரியன், சந்திரன் சஷ்டாஷ்டகத்தில் இருப்பது, என பல நிலைகளில் இதன் பாப, சாப, தோஷ தன்மைகளை சொல்லி விடலாம்.

பித்ரு தோஷம், பித்ரு சாபம் மற்றும் சர்ப்ப தோஷ நிவர்த்திகளுக்கு முன்னோர் வழிபாடு அவசியம், என்பதை ஒவ்வொருவரும் புரிந்து கொண்டு அதன்படி அமாவாசை வழிபாடு இயற்ற வேண்டும்.

இதுவரை இதுபோல செய்ய வில்லை என்றாலும், இப்போ உங்களுக்கு ஒரு வாய்ப்பு உள்ளது. வருகிற ஆடி அமாவசை அன்று இந்த வாய்ப்பை பயன்படுத்திக் கொண்டு, அமாவாசை வழிபாடு செய்யுங்கள். அனைத்து நலன்களையும் பெறுங்கள்.

நல்லதே நினைப்போம். நல்லதே நடக்கும்.