வெளிச்சத்திற்கு வாங்க 27

 

“வெளிச்சத்திற்கு வாங்க...”

-   27 -

ஜோதிடம் என்றதுமே, நமக்கு என்ன நடக்குமோ என்ற எதிர்பார்ப்பும், குரு பெயர்ச்சி, சனி பெயர்ச்சி, ராகு கேது பெயர்ச்சி என ஆண்டு முழுவதும் வருகிறதே.. நமக்கு இது இப்படி நடந்து விட கூடாதே,  என்ற பயமும் அநேகமாக எல்லோருக்கும் இருக்கும்.

இதில் இப்படி வர போகிறதே என்று சோதிட ஆலோசனை பெறாமல் சிலர் எதையாவது தொடங்கி விட்டு, அப்புறம் அது தீர வேண்டுமே என ஆலோசனைக்கு வந்து நிற்ப்பார்கள்.

நமக்குள்ள இந்த பிரச்சனை தீர வேண்டுமே என்று சிலர் நவக்கிரக வழிபாடு செய்வார்கள். அதிலும் சிலர் நவகிரங்கங்களுக்கு ஒன்பது சுற்று சுற்றுவார்கள். இன்னும்சிலர் அதில் ஒரு சுற்று தலைகீழாக ராகு கேதுவுக்கு என்று சுற்றுவார்கள்.

சிலர் சனிக்கு எள்ளு பொட்டலம், நவதானியத்தில் விளக்கு என அவரவர்கள் ஒன்றை செய்து கொண்டு இருப்பார்கள். இன்னும்சிலர் இதை பார்த்து நாமும் இப்படி செய்ய வேண்டும் போல என்று பழக்கத்திற்கு கொண்டு வந்து விடுவார்கள்.

இதெல்லாம் சரியா? இதனால் பலன் கிடைக்குமா? என்று எப்போதாவது சிந்தித்து பார்த்தது உண்டா?

பல கோவில்களில் நவகிரகங்கள் ஒன்றை ஒன்று பார்த்த படி இருக்காது. ஜாதக கட்டத்தில், ஒன்றை ஒன்று பார்க்காமல், ஒன்றை ஒன்று இணைவு பெறாமல், எப்படி கிரக பலனை சொல்ல முடியும்? அது முடியாது என்றால், இந்த வழிபாடு பலன் தருமா என்று சிந்திக்க தோன்றுகிறதா?  சரி இப்போ தான் விழித்துக் கொள்ள தொடங்கி விட்டீர்கள்.

அப்படின்னா நவக்கிரக வழிபாடு செய்யவே கூடாதா? அல்லது எப்படி செய்ய வேண்டும் என்ற வழிமுறைகள் உள்ளதா என்று கேட்க தோன்றும். சரி தான்.

கோவில்களில் புறத்தே தான் நவகிரகங்கள் இருக்கும், பல முறை சொல்லி உள்ளது போல, நவகிரகங்கள் தன்னிச்சையாக எதுவும் செய்யாது அல்லது செய்ய முடியாது. அவைகள், ஆண்டவன் கட்டளைகளை நிறைவேற்றும் அதிகாரி போல செயல்படும். அவ்வளவு தான்.

நவகிரங்களுக்கு  ஒரு வணக்கம் வைத்து விட்டு போக வேண்டும் அவ்வளவு தான். வணக்கம் வேறு வழிபாடு வேறு. குறிப்பாக சொல்ல வேண்டும் என்றால், நவகிரங்களில் தலைமை கிரகம் சூரியன் என்பது நமக்கு தெரிந்து இருக்கும்.

ஒவ்வொரு கிரகத்திற்கும் ஒரு portfolio என்பது போல சூரியன் தான் தலைமை கிரகம். இறைவனிடம் இருந்து ஆணை பெற்று வந்து மற்ற கிரங்களுக்கு கட்டளை இடும் மிடில் லெவல் மேனஜர் என்பது போல புரிந்து கொள்ளுங்கள்..

அதனால் தான் சூரியன் மற்றும் சந்திரனை கிரகண காலத்தில் ராகு கேது பிடிப்பதாக நமக்கு சொல்லி தந்து இருப்பார்கள். ராகு கேது இயல்பு தான் உங்களுக்கு தெரியுமே..!!

எனவே தலைமை கிரகமான சூரியனை நோக்கி வணங்கியபடி இருக்கும் நவகிரக தலத்தில் வழிபாடு செய்தால் மட்டுமே நவக்கிரக வழிபாடு செய்த உணர்வு கிடைக்கும்.

அதை விடுத்து இத்தனை சுற்று என்ற எண்ணிக்கையில் நவக்கிரகத்தை சுற்றி வந்தால், உடல் எடை வேண்டுமானால் குறையலாம். இதே போல ராகு கேதுவுக்கு என ஒரு சுற்று இடமாக வலம் வருதல் சாஸ்திர விரோதம். அப்பிரதக்ஷனமாக வர கூடாது என்பதை சொல்லித்தானா தெரிய வேண்டும்.

சரி நவக்கிரங்கள் சூரியனை நோக்கி இருக்கும்படியான தலங்கள் எங்கள் பக்கத்தில் இல்லையே என்ன செய்வது என சிலர் கேட்கலாம். அல்லது எங்கள் பக்கத்தில் உள்ள கோவில்களில் இப்படி சூரியனை நோக்கி மற்ற கிரகங்கள் இருப்பதாக இருக்கிறது. மற்ற கோவில்களில் இது போல இல்லையே இது தவறோ என்று நாங்கள் வழிபாடு செய்வதில்லை என்று கேட்பவராக கூட இருக்கலாம்.

அவர்களுக்கு தான் இந்த செய்தி. கிரக வழிபாடு செய்ய அந்த கிரகத்திற்குரிய அதிதேவதைகளை வழிபாடு செய்தாலே போதும். பலன் கிடைத்து விடும். எதை எப்படி செய்ய வேண்டும் என்ற வழிமுறைகளோடு செய்தால், செய்வன திருந்த செய்ய முடியும் அதனால் பலனும் கிடைக்கும்.

“அவன் கால் பட்டு அழிந்தது என் தலைமேல் அயன் கையெழுத்தே”

என்று அருணகிரிநாதர் அடிக்கோடிட்டு சொன்ன பிறகும் நம்பிக்கை இல்லை என்றால் என்ன செய்வது.

நவகிரங்களுக்கு ஆணை பிறப்பிப்பவன் ஆண்டவன்.. ஆணை போட்டவர்களால் மட்டுமே ஆணையை திரும்ப பெற முடியும் அல்லது மாற்றி எழுத முடியும் என்பதை இன்றைய நடைமுறையில் அனுபவத்தில், பார்த்து இருப்போம்.

அதனால் ஆணையிட்ட இறைவனிடம் முறையிட்டால், அதற்கான பலனும் பயனும் கிடைக்கும்.

அனுபவம் பெற்ற சோதிடர், அந்த ஆணையினை ஜாதகத்தில் உள்ளபடி படித்து பலன் தருவார், கூடவே பரிகாரமும் சொல்லுவார். செய்த வினைகளுக்கு கழுவாய் இல்லை என்றால் இறைவன் கருணை இல்லாதவன் என்பது போல ஆகி விடும் இல்லையா.

“அவை நல்ல நல்ல அடியார் அவர்க்கு மிகவே” என்று சம்பந்த பெருமான் கோளறு பதிகத்தில் குறித்து சொல்லி இருப்பதும்,

“அல்லல் என் செய்யும், அருவினை என் செய்யும்” என அப்பர் தேவாரத்தில் சொல்லி இருப்பதும்,

“”வான நாடனே வழித்துணை மருந்தே” என சுந்தரமூர்த்தி சுவாமிகளும்,

“நாள் என் செய்யும், வினை தான் என் செய்யும்” என கந்தர் அலங்காரமும்,

“மாதமும், தின, வாரமும், திதி, யோகமும், பல நாள்களும், படர்மாதிரம் திரி கோள்களும், கழல் பேணும் அன்பர்கள் பால் நலம் தர” என பாம்பன் சுவாமிகளும்,

“ஊழையும் உப்பக்கம் காண்பர் உலைவின்றித் தாழாது உஞற்று பவர்” என்று திருவள்ளுவரும் சொன்ன பிறகும்  நமக்கு நம்பிக்கை வர வேண்டாமா?

உங்களுக்காக ஒரு குறிப்பு செய்தி சொல்கிறேன், சரியாக உள்ளதா சொல்லுங்கள்.

திருச்சி மாவட்டத்தில் உள்ள பல கோவில்களில், நவகிரகங்கள் சூரியனை பார்த்தபடி வணங்கிய திருக்கோலத்தில் இருக்கும்.

கந்தர் சஷ்டி கவசம் அரங்கேறிய தலமான, சென்னிமலை முருகன் கோவிலில் நவகிரகத்தில் செவ்வாய் கிரகமே இருக்காது.

இது போன்ற சில அடிப்படை உண்மைகளை புரிந்து கொண்டு, உங்கள் பகுதியில் உள்ள திருக்கோவில்களில் நவக்கிரகங்கள் இப்படி இல்லை என்றால் அதற்காக வருந்த தேவையில்லை, முன்பு சொன்னது போல கிரகங்களின் அதி தேவதைகளை வழிபாடு செய்து பலன் பெறுங்கள்..

அடுத்து சில மாதங்களில். வரவுள்ள சனிப்பெயர்ச்சி எப்படி இருக்க போகிறது. இதில் பலன் பெறுபவர்கள் யாரு, பலம் இழப்பவர்கள் யார் என்பதை வரும் வாரங்களில் சிந்திப்போம்.

நல்லதே நினைப்போம். நல்லதே நடக்கும்.