நோயின்றி வாழ செய்யும் சந்திர தரிசனம்

 

“இன்றைய நாளில் நோயின்றி வாழ முடியுமா?”

இது பில்லியன் டாலர் கேள்வி தான். நோய் நாடி நோய் முதல் நாடி என்பது எல்லாம் புத்தகத்தில் மட்டும் தான் படித்து இருப்போம். என்ன செய்ய கால சூழல் இப்படி அமைந்து விட்டது. நாமும் விரும்பியோ விரும்பாமலோ அதில் சிக்கிக் கொண்டு விட்டோம்.

இன்னமும் சிலர் எனக்கு இந்த நோய் இருக்கிறது என்று சொல்வதை பெருமையாக நினைப்பார்கள். இது எல்லாம் சோதிடம் சொல்லும் குறிப்புகள் தான்.

ஆனாலும் நோயின் தொல்லை அதிகமாகும் போது தான் தீர்வை நோக்கி ஓடுவார்கள்.. அவர்கள் நலம் பெறவே இந்த வார பரிகார குறிப்புகள். எல்லா நோய்க்கும் பொதுவாக பரிகாரம் சொல்வது என்பது பொது பலன். இந்த நோய் இன்ன மருந்து என மருத்துவர்கள் சொல்வது போல சோதிடர்கள் சொல்லும் பரிகாரம்தான் தேவைக்கு உதவும் அருமருந்தாக இருக்கும்.

சரி.. இந்த வார சோதிட குறிப்புக்கு போகலாம். ருன ரோக சத்ரு ஸ்தானம் என்று சொல்லும் இடம் தான் 6ம் பாவம். இது வயிற்றையும் குறிக்கும் அதனால் தானோ பல நோய்க்கு காரணம் நாம் எடுத்துக் கொள்ளும் உணவு என மருத்துவம் சொல்கிறது.

இந்த பாவத்தை கொஞ்சம் கவனமாக அணுகவேண்டும். அப்போ தான் எந்த நோய் அது எப்போ வந்து நம்மை தாக்கும் அதற்க்கு தீர்வு என்ன என்பதை சொல்ல முடியும். இந்த ரோகாதிபதி திரிகோண தொடர்பு கொண்டிருந்தாலும் தொல்லை தான் கேந்திர தொடர்பு கொண்டிருந்தாலும் தொல்லை தான்.

இந்த 6 ம் பாவம் எந்த பாவத்தை தொடர்பு கொண்டுள்ளது என்பதை வைத்து அவருக்குள்ள நோய் எப்படி வரும் என்பதை சொல்லலாம். உதாரணமாக இந்த பாவம் இரட்டைப்படை பாவங்களை தொடர்பு கொண்டால் food poison என்பார்களே அந்த வகையில் உண்ணும் உணவால் நோய் வரலாம் என சொல்ல முடியும். உரிய தசா புத்திகள் நடக்கும் போது அவை வெளிப்படும். 6க்கு உரியவன் 12ல் இருந்தால் எப்படி தூக்கம் வரும். இந்த ரோகாதிபதி பாவியாக இருந்தால் நோய் எதிர்ப்பு சக்தி குறையும் இல்லையா.

நோயின் பட்டியல் பெரியதாக இருக்கிறதே அத்தனையையும் சோதிடத்தில் காட்ட முடியுமா? இன்னமும் புதியதாக சில நோய் வருகிறதே இதை எப்படி சோதிடத்தில்.... என யோசிக்க வேண்டாம்.

“இல்லாது தோன்றாது. உள்ளதே சிறக்கும்” என்பது தான் சாத்திர விதி. நோய் வெளிப்ப்படும் போது இவை எடுத்து காட்டப்படுகிறது அவ்வளவு தான்.

நோய் நாடி நோய் முதல் நாடி அது தணிக்கும் வாய் நாடி வைப்ப செயல் என்ற வள்ளுவம் சொல்வது போல நோயின் தன்மையை அறிந்து அதற்குரிய பரிகார குறிப்புகள் சொல்லும் போது பலன் கிடைக்கிறது என்பது தான் நிஜம்.

எந்த நோயும் இருப்பதாக வெளியில் தெரியவில்லை என்பவர்களும் ஏதாவது ஒரு நோய் இருப்பவர்களும் குறிப்பாக ரத்த கொதிப்பு உள்ளவர்களும் மிக சுலபமாக செய்ய கூடிய பரிகாரம் இது தான்.. அது சந்திர தரிசனம்.

மூன்றாம் பிறை என்று வழக்கத்தில் சொல்லுவார்கள். அமாவசையை தொடர்ந்து வரும் 3ம் நாள் கதிர் விலகும் நேரத்தில் வெளிப்படும் மாலையில் சந்திர தரிசனம் செய்ய வேண்டும். இதை தொடர்ந்து வாழ் நாள் முழுதும் செய்து வந்தால் டானிக் சாப்பிடுவது போல் நோய் பாதிப்பு இன்றி இருக்கலாம். அதனால் தான் சதாபிஷேகம் செய்து கொள்பவர்களை ‘ஆயிரம் பிறை கண்டவர்’ என உயர்த்தி பேசுவார்கள்.

திங்கட்கிழமை வரும் நாள் அல்லது ரோகிணியில் வரும் நாள் இப்போதெல்லாம் முன் பின் ஒரு மணி நேரம் மவுனம் இருத்தல் ரத்த கொதிப்பை சம நிலை படுத்தும் என்பதை நீங்களே ஆய்வு செய்து பார்த்துக் கொள்ளலாம்.

நாங்கள் அலுவலகம் செல்பவர்கள், இரவு நேர பணியில் இருப்பவர்கள், எங்களால் இது முடியாதே வேறு உபாயம் சொல்ல முடியுமா என கேட்பவர்கள், மதுரையை அடுத்து செல்லூர் பாலம் அருகில் உள்ள திருஆப்பனூர் இறைவனை வாய்ப்பு கிடைக்கும் போதெல்லாம் தரிசனம் செய்து வாருங்கள்..

இந்த தலத்தை குறிப்பாக இங்கே சொல்ல காரணம் மூட்டு வலி (ஆர்தரிடிஸ்) யால் சிரம படுபவர்கள் இந்த திருத்தலத்தை முறைப்படி வலம் வந்தால் அவர்கள் வாதம் மற்றும் மூட்டு வலி தொல்லையில் இருந்து நிவாரணம் பெறுவார்கள்.

இதற்கும் வாய்ப்பு இல்லாதவர்கள் இந்த திருத்தல பதிகமான

முற்றும் சடைமுடிமேல் முதிரா இளம் பிறையன்

ஒற்றைப் பட அரவம் அது கொண்டு அரைக்கு அணிந்தான்

செற்றம் இல் சீரானைத் திருஆப்ப னூரானைப்

பற்று மனம் உடையார் வினை பற்று அறுப்பாரே.

 

என்ற சம்பந்தர் அருளிய திருப்பதிகத்தை படனம் செய்து வரலாம்.

ஒரு நோய்க்கு ஒரு மருந்து அல்ல. ஒரு மருந்து ஒரு நோய்க்கு அல்ல. அது போல ஒரு பரிகார குறிப்பு ஒரு நோய்க்கு அல்ல. ஒரு நோய்க்கு ஒரு பரிகார முறை அல்ல என்பதை கவனத்தில் வைக்க வேண்டும். பரிகாரம் செய்தால் போதுமா மருத்துவம் வேண்டாமா என்றும் சித்திக்க கூடாது.. பரிகார முறையுடன் நோய்க்கான மருத்துவ ஆலோசனையும் பெற்றால் நோயில் இருந்து விடுதலை பெறுவது சுலபம்.

அதனால் உங்கள் நம்பிக்கைக்குரிய சோதிடரை அணுகி ஜாதகத்தை ஆய்வு செய்து நோய் தணிக்கும் செயலை அறிந்து ஆரோக்கியமுடன் நலமாக வாழ இறைவனை வேண்டுகிறோம்.

நல்லது சொல்லி உள்ளது நல்லதே நடக்கும். நல்வாழ்த்துக்கள்.