11. கங்கை சொல்லும் பாடம்.

 - 11 - 

               கங்கை ஒடுவதை பார்த்து மகிழ்ந்து இருக்கலாம், புனித நீராடி இருக்கலாம், வழிபாடு செய்து இருக்கலாம். ஆனால் கங்கை எப்போதாவது ஓய்வெடுத்து பார்த்து இருக்கிறீர்களா? என கேட்டால் ஒரு நிமிடம் நம்மை சிந்திக்க வைப்பது அந்த கேள்வி தான். அழகு மற்றும் சக்திக்காக மட்டுமல்ல, கங்கை தூய்மைக்காகவும் புனிதமாக போற்றப் படுகிறது. எத்தனையோ மாசுபாடுகள் இருந்த போதிலும், நதி புனிதமாக கருதப்படுகிறது, 

               தூய்மை என்றால் என்ன? களங்கம் இல்லாத நிலையா? அல்லது வெளிச் சக்திகளால் தீண்டப்படாத நிலையா? கங்கையின் தூய்மையானது, அது தன் பயண வட்டத்தில், தான் சந்திக்கும் அனைத்தையும் மீறி தொடர்ந்து ஓடிக் கொண்டு இருப்பதில் தான் அதன் சக்தி உள்ளது. 

               மனிதர்களாகிய நம்மிடமும், எதிர்மறையான எண்ணங்கள், கோபம், பொறாமை, கடுமை, ஊழல் மற்றும் சவால்கள்  என அசுத்தங்கள் நம்மை முட்டி மோதுகின்றன. சிலர் இவைகளை சந்தித்த சில காலத்தில் அந்த குப்பையோடு சேர்ந்து குப்பையாகி விடுகிறார்கள். இன்னும் சிலர், இது நமக்கு சரிப்பட்டு வராது என்று ஓய்வு எடுக்க போய் விடுவார்கள். ஒரு சிலர் சவால்களை எதிக்கொண்டு எதிர் நீச்சல் போடுவார்கள். 

               எல்லோரும் வாழ்க்கையில் இப்படி எதிர் நீச்சல் போட வேண்டிய அவசியம் இல்லை. காலம் நம்மை எப்படி கடத்திக் கொண்டு செல்கிறதோ, அந்த வட்டத்தில் ஓடிக் கொண்டு இருக்க வேண்டும். ஆர்வமும் துணிவும் உள்ளார்கள் எதிர் நீச்சல் போட்டுக் கொள்ளட்டும். மொத்தத்தில் எப்போதும் சுறுசுறுப்பாக ஓடிக் கொண்டே இருக்க வேண்டும். 

               வயது 50யை  தொட்ட உடனேயே என்னால் இது முடியவில்லை என ஓய்வு எடுக்க தொடங்கி விடுகிறார்கள். பலர் தொலைக் காட்சி முன்பாக உட்கார்ந்து இருப்பதே ஓய்வு எடுப்பது தான். ஓய்வு என்பது எதுவும் செய்யாமல் இருப்பது அல்ல. வழக்கமாக செய்யும் பணியில் இருந்து இன்னொரு வேலையை செய்ய வேண்டும் என்பது தான் ஓய்வு. 

               இதன் பொருள் தொடர்ந்து ஓடிக் கொண்டே இருக்க வேண்டும் என்பது தான் வயது 50 ஆனால் என்ன 80 ஆனால் என்ன முயற்சியும் சிந்திணையும் உழைப்பும் தொடர்ந்து வெளிப்படுத்த படும் போது, நம்மை மக்கள் வியந்து பார்ப்பதுடன் நம்மை ஒரு முன் மாதிரியாக வைத்துக் கொண்டு அவர்கள் தங்கள் வாழ்க்கையை சீர் அமைத்துக் கொள்வார்கள். மொத்தத்தில் ஓடிக் கொண்டே இருக்க வேண்டும். உழைத்துக் கொண்டே இருக்க வேண்டும். உழைப்புக்கும் சிந்தனைக்கும் வயது ஒரு பொருட்டு அல்ல. 

               வயதான காலத்தில் முன்பு இளமையில் இருந்த ஓட்டமும் ஆட்டமும் இல்லாமல் இருக்கலாம் அதறக்காக  உழைப்பு இல்லாமல் இருக்கலாமா? வயதான காலத்தில் நமது உழைப்பில் வேகம் குறைந்து காணப்படலாம். ஆனால் அதற்காக உழைக்காமல் இருக்கலாம்.. கங்கை நதியில் கூட சில இடங்களில் வேகம் குறைவாக இருக்கும். வேகம் குறைவாக இருக்கிற இடத்தில் தான் தைரியம் குறைந்த பெண்களும் குழந்தைகளும் புனித நீராடுவார்கள். தண்ணீரின் வேகத்தை எதிர்த்து நிற்க வேண்டிய அவசியம் இல்லை என்பதால், கங்கையில் கூட சில இடங்களில் வேகம் குறை வாக இருக்கிறதே அது போல நமது வாழ்க்கையிலும் ஒரு சில வயதிற்கு பிறகு வேகம் குறைவாக இருக்கலாம். அதற்காக உழைக்காமல் இருக்கலாமா/

               உழைப்பு என்பது உடல் உழைப்பு மட்டும் அல்ல மனமும் சிந்தனையும் உழைப்பதும் உழைப்பு தான்.நமது மனதை தூய்மை படுத்த எடுத்துக் கொள்ளும் ஒவொரு முயற்சியுமே உழைப்பு தான்  மற்றவர்களுக்காக சிந்திப்பதும், ஒரு புத்தகத்தை படிப்பதும் புத்தகத்தை படைப்பதும் உழைப்பு தான். அடுத்தவர்களுக்கு நாம் inspiration ஆக  இருப்பதுவே உழைப்பு தான். 

               வாழ்க்கைப் பாடம்: ஓடிக் கொண்டு இருப்பது தான் வாழ்க்கை வயதாகி விட்டதே என ஓய்வு எடுப்பது அல்ல வாழ்க்கை. அதனால் தொலைக்காட்சி வீட்டில் இருந்தால் அது உங்கள் பக்கம் திரும்பாமல் பார்த்துக் கொள்ளுங்கள். உழைப்புக்கு என்ன கிடைக்கப் போகிறது என யோசிப்பாதை விட முதலில் உழைக்க வேண்டும் என்ற எண்ணத்தை மனதில் பதியுங்கள். சவால்களை சந்திப்பதற்கு நீங்கள் எந்த வயதை சேர்ந்தவராக இருந்தாலும், முதலில் உழைக்க வேண்டும் என்ற எண்ணத்தை முதலில் மனதில் பதியுங்கள்