26. நலம் தரும் திருத்தலம்

 

-   26 –

திருக்கோயில் வழிபாடு என்றால், ஒவ்வொருவருக்கும் ஒரு விருப்பம் இருக்கும். இஷ்ட தெய்வ வழிபாடு என்று தங்கள் நடைமுறைக்கு மாற்றாக கூட சிலர் வைத்து இருப்பார்கள். இது சரியும் இல்லை. தவறும் இல்லை என்ற போதும், சில சிந்தனைகளை இந்த வாரம் சிந்திக்க எடுத்துக் கொள்வோம்.

சக்தி பீட தலங்கள் என்றால் 51 என எண்ணிச் சொல்லுவார்கள். திவ்ய தேசங்கள் என்றால் 108 என நமக்கு காட்டுவார்கள். ஆறுபடை தலங்கள் என்பது நமக்கு தெரியும். அதே போல அஷ்ட விநாயகர் திருத்தலங்கள் என்ற வரிசையில், இதே போல, பஞ்சபூத தலங்கள், ஒரு ஊரில் உள்ள பஞ்ச பூத தலங்கள், பஞ்ச நடன தலங்கள், அட்ட வீரட்ட தலங்கள், என்ற வரிசையில் ஜோதிர் லிங்க தலங்கள் என பட்டியல் வளர்ந்து கொண்டே போகும்.

பன்னிரண்டு ஜோதிர்லிங்க தலங்கள், ஜாதக கட்டத்தில் உள்ள பன்னிரண்டு பாவகங்களை மனதில் வைத்து சிந்தித்து பார்க்க வேண்டும். இதே போல பஞ்ச பூத தலங்கள்,ஒலிக் கிரகங்களான சூரியன் சந்திரன், மற்றும் நிழல் கிரகங்களான ராகு கேது தவிர மீதம் உள்ள ஐந்து ராஜ கிரகங்களை வைத்து சிந்திக்க வேண்டும். இது உடலில் உள்ள ராஜ உறுப்புகளை அடையாளம் காட்டுவதை இணைத்து சிந்திக்க வேண்டும். கைகளில்/கால்களில் உள்ள ஐந்து விரல்களை இப்படி இணைத்து சிந்தித்து பார்க்க வேண்டும்.

இப்படி macro வில் இருந்து micro அளவில் சிந்தித்தால், ஜோதிடத்தை பாவிப்பதற்கும் ஜோதிடர்களை மதித்து கௌரவபடுத்தவும் தயங்க மாட்டார்கள். சில ஆயிரங்களுக்காக அல்லது தங்கள் குடும்ப சூழல் காரணமாக பலன் சொல்லுபவர்கள் இல்லை சோதிடர் என்ற அடிப்படை மன நிலை ஒவ்வொருவருக்கும், ஜோதிட அபிமானிகளுக்கும் வர வேண்டும் என்பதில் மாற்றுக் கருத்து இருக்க முடியாது.

இந்த ஜோதிட சிந்தனைகள், வாழ்வில் ஒவ்வொரு நிகழ்விலும் நாம் அறிந்து தெரிந்து கொள்ள முடியும், உண்ணும் உணவு முதல் வாழ்க்கை முறை அமைப்பிலும் என சொல்லிக் கொண்டே போகலாம் என்றாலும் ஒரு பானை சோறுக்கு என்று சொல்வது போல ஒரு சிந்தனையை பகிர்ந்து கொள்கிறேன் சரியாக உள்ளதா சொல்லுங்கள்.

ஒவ்வொரு ஆணுக்கு பின்னால் ஒரு பெண் என்பதை அடிக்கடி சொல்வதை நாம் கேட்டு இருப்போம். சிலர் அனுபவத்திலும் அறிந்து இருப்போம். குறைந்த பட்சம் திரைப்படத்திலாவது பார்த்து இருப்போம். இதனை எப்போதாவது சோதிட ரீதியில் சிந்தித்து இருப்போமா என்றால் கழுத்து வலமிருந்து இடமாகவும் இடமிருந்து வலமாகவும் ஒரு முறை நகருமே தவிர ஆம் என்று சொல்வதற்கு தயக்கமாக இருக்கும்.

இப்படி சொல்கிறேன் சரியாக உள்ளதா சொல்லுங்கள். ஜோதிடத்தில் ஆண் கிரகம் சில இருந்தாலும், தலைமை கிரகம் சூரியன் தானே. குடும்பத் தலைவனை சூரியனை வைத்தே பலன் எடுக்கிறோம் இல்லையா. இதே போல பெண் கிரகம் என்று வைத்து கொண்டால், சந்திரன், தலைவியை குறிப்பதும் இப்படி தானே.

இப்போ ஜாதக கட்டத்தை எடுத்துக் கொள்ளுங்கள். சூரியனின் ஆட்சி வீட்டு சிம்மம் இல்லையா.இந்த சிம்மாத்திற்கு பன்னிரண்டாம் வீடு சந்திரன் ஆட்சி வீடான கடகம் இல்லையா. சூரியனுக்கு பின்னால் சந்திரன் என்பதை சொல்லும் விதமாக ஆணுக்கு பின்னால் பெண் என்ற சொல் வழக்கு வந்துள்ளது என்று இணைத்து சிந்தித்து பாருங்கள்.

இப்படி ஒவ்வொரு அசைவிலும் சோதிட சிந்தனை நிழலாடினால், வாழ்க்கை எளிதாக அமையும். பிரச்சனைகளை அறிந்து பிரகாசமான வாழ்க்கை முறையை கையாளலாம் இல்லையா. சரி இந்த வார திருத்தல வரிசையில், சோமனை குறித்து சொல்லும் பன்னிரு சோதிர் லிங்க தலங்களில் ஒன்றான சோமநாத் பற்றி சில சிந்தனைகளை எடுத்துக் கொள்வோம்.

சோமன் என்ற வடமொழி சொல் சந்திரனை குறிக்கும் சொல். அதனால் தான் பௌர்ணமி அன்று “ஓம் சோம் சோமாய நம”.  என 108 முறை அல்லது, 1008 முறை தியானிக்க உங்கள் நம்பிக்கைக்குரிய சோதிடர்கள் சொல்லி தந்து இருப்பார்கள் என்பது உங்களுக்கு தெரிந்து இருக்கும்.

இந்த சோம்நாத் அல்லது சோமநாதபுரம் என்ற இந்த திருத்தலம் தமிழ்நாட்டில் இல்லை. குஜராத் மாநிலத்தின் சௌராஷ்டிரா தீபகற்பத்தில், அரபிக் கடல் பகுதியில் அமைந்திருக்கிறது.  

தில்லி சுல்தான் மற்றும் முகலாயர்களால் பலமுறை சிதைக்கப்பட்ட திருக்கோயில் என்றாலும், 12 சோதிர் லிங்க தலங்களில் முதன்மையானது சோமநாதபுரம். சக்தி பீடத்தில் ஒன்றாகவும் இருக்கிறது.

இமயமலை தோன்றும் முன்பே இப்பகுதி இருந்ததாகவும், கற்கால மனிதர்கள் இங்கு வாழ்ந்தார்கள் என்றும் ஆராய்ச்சியாளர்கள் கருதுகிறார்கள். நாக லோகத்திற்கும் சோமநாதருக்கும் உள்ள தொடர்பு பற்றியும் புராணம் விவரிக்கிறது. இதை காட்டுவதை போல இங்குள்ள சிவலிங்க திருமேனியில், நாகம் இருப்பதை காணலாம்.

ஆண்டு முழுவதும் தரிசனத்திற்கு திறந்து இருக்கும் சோம்நாத் கோயிலுக்குச் செல்ல அவரவர் வசதி  போல செல்லலாம் என்றாலும், அக்டோபர் முதல் பிப்ரவரி வரை மாதங்கள் சீதோஷன நிலைக்கு ஏற்ப சிறப்பானதாக சொல்லப்படுகிறது. சிவராத்திரி மற்றும் கார்த்திக் பூர்ணிமா(தீபாவளி) இங்கு மிகுந்த உற்சாகத்துடன் கொண்டாடப்படுகிறது.

கபிலா, ஹிரன் மற்றும் சரஸ்வதி நதிகள் சந்திக்கும் இடத்தில் அமைந்துள்ள இந்த கோயில் அரபிக்கடலின் அலைகள் பழமையான இந்த கோவிலினை தொட்டு செல்கிறது.

இந்த கோவிலுக்கு செல்ல வெரவால் என்ற ரயில் நிலையம் வரை செல்ல வேண்டும் அங்கிருந்து சுமார் 5 கிலோமீட்டர் தூரத்தில் உள்ளது. வெண்புறாக்கள் சுற்றி திரியும் இந்த திருக்கோயில் அமைதியான சூழலில் மன அமைதி தரும் படி அமைந்துள்ளது.

சோதிட ரீதியாக, குரு சந்திர யோகம் உள்ளவர்கள், சந்திர மங்கள யோகம் உள்ளவர்கள் மட்டுமல்லாது அனைவரும் ஒரு முறையாவது அவசியம் போக வேண்டிய திருத்தலம் என்பதை குறித்துக் கொள்ளுங்கள்.

நல்லதே நினைப்போம். நல்லதே நடக்கும்..