06. நலம் தரும் திருத்தலம்

 

-   06 –

-        இன்றைய நாளில் குடும்பத்தில் ஒருத்தருக்காவது சர்க்கரை வியாதி இல்லாமல் இல்லை அது போல, சம்பாதிப்பவர்கள் ஏதாவது ஒரு வகையில் கடன் வாங்காமல் இருப்பதில்லை. சிலர் சம்பாதிக்கும் நாள் முழுவதும் EMI கட்டியே சோர்ந்து விடுவார்கள்.

நாம பாட்டுக்கு இருந்தால் கூட, கடன் வேண்டுமா? என கேட்டு தொலைபேசியில் விடாது துரத்தி எந்த டாக்குமெண்டும் தேவையில்லை என நமது ஆசைகளை தூண்டி, கடன் வாங்க வைத்து விடுவார்கள். அதை கட்டுவதற்குள் அப்பாடா.. போதும்.. போதும்... என ஆகிவிடும். இந்த கடனை எப்படிடா அடைப்பேன் என விழி பிதுங்க நின்று கொண்டு இருப்பவர்கள் ஏதாவது வழி கிடைக்காதா? யாராவது ஆலோசனை சொல்ல மாட்டாங்களா என்ற ஏக்கமும் இருக்கத் தான் செய்யும்.

இப்படி கடன் தொல்லையில் இருந்து வருந்துபவர்களுக்காக தான் இந்த வாரம் இந்த கோவிலை பரிந்துரை செய்கிறேன். இதற்கு இன்னொரு காரணமும் உண்டு.. இது போன்ற கடன் பிரச்சனை எனக்கு மட்டும் இல்லாமலா இருக்கும் என நினைக்கிறீர்கள். ஒரு சமயம் கடன் சுமை வருந்தும் நிலையில் இருக்கும் போது, எனக்கு கை கொடுத்தது இந்த திருத்தலம் தான் என்றால் வியப்பாக தான் இருக்கும்.

இந்த திருத்தலத்தின் சிறப்பை கேட்டால் ஆச்சரியமாக இருக்கும். கோவில் கூட சின்ன கோவில் தான்.  இருக்குமிடமும் சிறிய கிராமம் தான்.  அட ஒரு கிராமத்தில் இப்படி ஒரு அதிசயமா என்ற வியப்பில் தான் நானும் நுழைந்தேன்.

இந்த கோவில் புதுக்கோட்டை மாவட்டத்தில் உள்ள வேந்தன்பட்டி என்ற சிற்றூரில் உள்ளது, இந்த திருத்தலத்தில் சிவபெருமானை விட நந்திக்கு தான் பெருமை போல அதனால் நந்தியின் பெயரிலேயே கோவில் அமைத்து இருக்கிறார்கள்.

இது தேவார பாடல் பெற்ற திருத்தலம் அன்று எனினும் நகரத்தார்கள் இந்த கோவிலுக்கு நிறைய நற்பணிகள் செய்து இருக்கிறார்கள்.

இவ்வாலயத்தின் பிரதான தெய்வமாக மீனாட்சி அம்மன் சமேத சொக்கலிங்கேஸ்வரர் அருள்பாலிக்கிறார். இருப்பினும் இங்குள்ள நந்தியே சிறப்புக்குரியது என்பதால், நெய் நந்தீஸ்வரர் என்ற நந்தியின் பெயரிலேயே இவ்வாலயம் சிறப்பு பெற்று விளங்குகிறது.

இது பாண்டிய நாட்டுத் திருத்தலம் தான். ஒரு சமயம் இங்கு ஆட்சி செய்த பாண்டிய மன்னன், பிரதோஷ காலத்தில் கோவிலுக்கு போக முடியவில்லையே என்ற ஏக்கத்தில் ஒரு கோவிலை அமைத்து அங்கே மீனாட்சி சொக்கநாதரை பிரதிஷ்டை செய்து வழிபட்டு இருக்கலாம் என்று சொல்கிறார்கள்.

ஆலய வராலாறு முழுமையாக கிடைக்கப் பெறவில்லை என்றாலும் பழமையான மற்றும் பலன் தரும் திருக்கோயில் என்ற வரிசையில் அனுபவ வாயிலாகவே இதனை சொல்லலாம்.

தஞ்சை பெரிய கோவில் நந்தியும் இந்த திருக்கோவிலில் உள்ள நந்தியும் சம காலத்தியவை என்பதால் இந்த கோவில் நந்தியை தம்பி நந்தி என்று பாசமாக அழைக்கின்றனர்.

கடன் தொல்லை உள்ள “ரிஷப ராசி” அன்பர்கள் இந்த கோவிலில் நந்திஸ்வரருக்கு நெய் அபிஷேகம் செய்து, சுவாமிக்கு அர்ச்சனை செய்து பிரார்த்தனை செய்தால் கடன் தொல்லை தீரவழி பிறக்கும். கடன் சுமை சேராமல் இருக்கவும் தேவைக்கேற்ற வருமான வாய்ப்பிற்கும் வழி கிடைக்கும்.

இந்த கோவிலில் உள்ள நந்திக்கு செய்யப்படும் நெய் அபிஷேகத்தில்,. கீழே சிந்திய நெய்யை எறும்புகள் மொய்ப்பதில்லை. அபிஷேக நெய்யை வேறு எதற்கும் பயன்படுத்துவதில்லை. கோவிலில் உள்ள கிணற்றில் ஊற்றி வைத்து விடுகிறார்கள். நெய் கிணறு நிரம்புகிறது. திறந்த வெளியில் இருக்கும் நெய்யில் ஈ, எறும்பு  துளிகூட வருவதில்லை என்றால் அதிசயமாக தானே இருக்கிறது இல்லையா.

வன்னி மரத்தை தல விருட்சமாக கொண்ட இந்த திருத்தலம், வேப்ப மர நிழலில் அமைந்து இருக்கிறது. சாதரணமாக சிவாலயங்களுக்கு சுவாமி மற்றும் அம்பாளுக்கு எடுத்துச் செல்லும் பூஜை மற்றும் அபிஷேக பொருட்களுடன், நந்திக்கு சிறப்பாக சுத்தமான பசு நெய் அபிஷேகத்திற்கும், அர்ச்சனை மற்றும் தனியாக பூ மாலை மற்றும் பூஜை பொருட்களை எடுத்துச் செல்ல வேண்டும். கோவில் அருகில் பெரிய கடைகள் எதுவும் இல்லை என்பதால் தேவையான பொருட்களை நாமே எடுத்துச் செல்வது நல்லது. அங்கே சென்ற பிறகு இது கிடைக்கவில்லையே என்ற வருத்தம் இல்லாது இருக்கும் இல்லையா

குறிப்பாக கடன் தொல்லையால் பாதிக்கப்படும் ரிஷப ராசி அன்பர்கள், வேறு எந்த தொல்லையாக இருந்தாலும் நந்திஸ்வரருக்கு நெய் அபிஷேகம் செய்து நந்தியின் இரண்டு கொம்புகளுக்கு இடையே உள்ள சக்கரத்தை தரிசித்து பிரார்த்தனை செய்து வந்தால் தீர்வும் தெளிவும் உறுதியாக கிடைக்கும்.

மதியம் 12 மணி  வரை திறந்து இருக்கும் இந்த திருக்கோயில், மாலையில் 8 மணிவரையில் திறந்து இருக்கும். சிறிய ஊர் என்பதால், பஸ் வசதிகள், அங்கே கிடைக்கும் பொருட்கள் பஸ் வசதிகள் என நாமே திட்டமிட்டு எடுத்துச் செல்வது சிக்கலையும் மன வருத்தத்தையும் குறைக்கும்.

இந்த திருக்கோவிலில், சுவாமிக்கு இடது புறம் அன்னை மீனாட்சி அருள்பாலிக்கிறார். மாங்கல்யம் நிலைக்கவும் தன் கணவருக்கு ஏற்பட்ட தீராத உடல் நோய் நீங்கவும் இங்கே பிரார்த்தனை செய்து கொள்ளலாம்.

பிரகாரத்தில் விநாயகர், வள்ளி குஞ்சரி சமேத முருகப்பெருமான், தேவயானையுடன் அருள்பாளிக்கிறார். மகாலட்சுமி, பைரவர், நவக்கிரகங்கள் ஆகியோரும் சுற்று பிரகாரத்தில் வீற்றிருக்கிறார்கள்.

மற்ற சிவாலயங்களில் உள்ளது போல முக்கியமான விசேஷ நாட்கள் உண்டு என்றாலும் பிரதோஷம் பிரதானமகாவும், மிக விசேஷமாகம் உள்ளது.

அருள்மிகு மீனாட்சி அம்மை சமேத சொக்கலிங்க பெருமான் அமைந்துள்ள நெய் நந்தீஸ்வரர் திருக்கோயில், புதுக்கோட்டைமாவட்டத்தில் வேந்தன்பட்டி என்ற சிற்றூரில் உள்ளது. இது பிள்ளையார்பட்டியில் இருந்து சுமார் 30 கிலோமீட்டர் தொலைவில் இருக்கிறது,

கடன் மற்றும் பிரச்சனைகளுக்கு தீர்வு வேண்டுகிற ரிஷப ராசி அன்பர்கள் இந்த திருத்தலத்திற்கு சென்று வருவது நன்மை பயக்கும். ரிஷப ராசி அன்பர்கள் மட்டும் தான் செய்ய வேண்டுமா என கேட்காதீர்கள். எல்லோரும் செய்யலாம், எனினும், ருன ரோக சத்ரு ஸ்தானமாக சோதிடத்தில் சொல்லப்படும் 6ம் பாவகம் பழுது பட்டு இருக்கும் வெவ்வேறு ராசி அன்பர்களுக்கு வெவ்வேறு திருக்கோயில் வழிபாடு உண்டு. அதை வரும் வாரங்களில் சிந்தனைக்கு எடுத்துக் கொள்வோம்.

நல்லதே நினைப்போம். நல்லதே நடக்கும்.