நலம் தரும் திருத்தலம் - நவபாஷாணம்

நலம் தரும் திருத்தலம் 

தடைகள் நீங்கி வெற்றி பெற வேண்டி, ஸ்ரீராம பிரானால் பிரதிஷ்டை செய்து வழிபாடு செய்த தலம் என்று பழக்கத்தில் சொல்கிறார்கள். இது குறித்து கல்வெட்டு சான்றுகள் இருப்பதாக தெரியவில்லை, என்றாலும், மக்கள் நம்பிக்கையில் உள்ள செய்திகளுக்கு மதிப்பு கொடுத்து அதை அப்படியே ஏற்றுக் கொள்வது தான் முதிர்ச்சியின் வெளிப்பாடு என்பதை புரிந்து கொள்ளுங்கள்.

கடற்கரை அருகே உள்ள திலகேச்வரர் கோவில் சிறப்பு வாய்ந்த சிவனார் அருள் பாலிக்கும் திருக்கோயில், இது சிறிய ஊர் என்பதால் வழிபாட்டு நேரம், நாம் செல்லும் நேரத்திற்கு உகந்தவையாக இல்லை என்றாலும் கடல் அலைகள் இல்லாத அதிக சீற்றம் கொள்ளாத கடலின் நடுவில், இடுப்பளவு தண்ணீரில் நின்றபடி வணங்கி, வலம் வந்து, இறைவழிபாடு செய்வது ஒரு வித்தியாசமான அனுபவம் தான் என்பதை இங்கே வந்து செல்லும் ஒவ்வொருவரும் உணரலாம்.

அருகில் உள்ள உப்பூரில் விநாயகர் திருக்கோவில் வரை கடலின் உப்புத் தன்மை குறைவாகவே இருக்கும். இந்தியா முழுவதிலும் உள்ள சக்தி பீடங்களில் இங்கு உலகம்மை ஆலயமும் உண்டு என்றால், நம்ம இடத்துக்கு பக்கத்தில் இத்தனை சிறப்புள்ள இடம் இருக்குதா என்ற பெருமை நமக்கு நிச்சயம் வரும்.

கடல் நடுவே உள்ள நவக்கிரக திருத்தலம், இராமநாதபுரம் மாவட்டத்தில் இராமநாதபுரத்தில் இருந்து சுமார் 15 கிலோமீட்டர் தொலைவில் “தேவிப்பட்டினம்” என்ற சிற்றூரில் உள்ளது. இராமநாதபுரம் பேருந்து நிலையத்தில் இருந்து பஸ் வசதிகள் உண்டு. தேவி பட்டினம் பேருந்து நிலையத்தில் இறங்கி சுமார் 1 கிலோமீட்டர் தூரத்தில் இந்த நவக்கிரக கோவில் உள்ளது. இது கடல் பகுதி, நீரில் நனைந்து குளிக்க மற்றும் வழிபாடு செய்ய வேண்டும் என்பதால், போதிய மாற்று உடைகளை முன்னேற்பாடுகள் உடன் எடுத்து செல்லுதல் நல்லது. 

உடை மாற்றுவதற்கு அருகில் மண்டபம் இருப்பதாலும், உப்பு தண்ணீரில் உடலை நனைப்பதால் அரிக்கும் என்ற கவலையும் இல்லாமல் செல்லலாம். இந்த பகுதியில் உள்ள தண்ணீரில் உப்பு தன்மை குறைவாகவே இருக்கும் அது சருமத்திற்கு எதுவும் செய்யாது. நம்பிக்கையுடன் நீரில் முழ்கி வலம் வந்து நவக்கிரகங்களுக்கு வணக்கம் செலுத்தி இறைவழிபாடு செய்யலாம்.

பாஷாணக் கட்டு என்பது சித்தர்களுக்கு மட்டுமே சாத்தியமான ஒன்று. ஒவ்வொரு கிரகத்தின் தன்மையை கொண்டு தேவையான அளவு வெப்பமேற்றி, குளிர்வித்து, அதனதன் கதிர் வீச்சு, தன்மைக்கு ஏற்ப கட்டுபவரின் மனோநிலையை மேம்படுத்தி என்ற குறிப்புகள் போகர் நூல்களில் காணலாம். நவ பாசாணத்தினால் கட்டி உருவாக்கப்படும் தெய்வச் சிலைகள் நவக்கிரகத்தின் ஆற்றல்களைப் பெற்றுவிடுகின்றன என்று இன்றும் நம்பப்படுகிறது. அதன் பயனும் அதிகமாக இருக்கிறது என்பது அவரவர் அனுபவ உண்மை.

நவக்கிரக வழிபாட்டிற்கு என இந்தியாவிலேயே இது போன்ற அமைப்புடன், தனிச்சிறப்பு வாய்ந்த இந்த திருக்கோவில் இது மட்டுமே. தினமும் காலை ஆறு மணிமுதல் மாலை ஆறு மணி வரை திறந்தே இருக்கும். சோதிட நம்பிக்கை உள்ள அனைவரும் பிரச்சனைகள் எதுவும் இல்லை என்று சொல்லும் அன்பர்களாக இருந்தாலும் வாழ்நாளில் ஒரு முறை அவசியம் சென்று வழிபாடு செய்ய வேண்டும் என விரும்பி வேண்டுகிறோம்.

நல்லதே நினைப்போம். நல்லதே நடக்கும்.

- விசு அய்யர்