“நலம் தரும் திருத்தலம்....”

 “நலம் தரும் திருத்தலம்....”

-   08 –

“ஐம்புலன் அறிவு அவசியம் நமது அனைவருக்கும்” என்பதை நாம் அறிந்து இருப்போம். ஐம்புலன் என்பது, கண், காது, மூக்கு, வாய், தொடு உணர்தல், என இதனை “பொறி ஐந்தும் மதி மயங்கி” என அப்பர் தேவாரத்தில் குறிப்பிடுவதை நாம் அறிந்து இருப்போம்.

இந்த ஐம்புலனில் முதலில் சொல்வது கண் தான். “முகத்திரண்டு புண் உடையார்” என திருவள்ளுவரும் கண்ணின் முக்கியத்துவத்தை சொல்லி இருக்கிறார்.

கண் மருத்துவத்திற்கு என்றே தனி மருத்துவ துறை உண்டு. opthalomist  என கண் மருத்துவரை சொல்லுவாங்க.. பார்வை குறை என ஒன்று வந்து விட்டால், தாங்கிக் கொள்ளவே முடியாது. நரை திரை மூப்பு என சொல்லும் இதில் கண்ணில் உள்ள பார்வை குறை, வயதான காலத்தில் வரும் cataract, அதை பொறை என்று சொல்லுவார்கள்.

உடலில் எல்லா உறுப்பும் சிறு குழந்தை முதல் வளரும் போது, தானே வளர்ந்து விடும். ஆனால் கண்ணில் உள்ள கருவிழி வளராது. கண்களில் உள்ள ஐரிஸ் வைத்து ஒருவரின் குணத்தை கண்டு பிடித்து விட முடியும்.

கண்ணின் அமைப்பு  எத்தனை டிகிரி கோணத்தில் அமைந்து இருக்கிறது என்பதை வைத்து அவரின் குணத்தை சொல்லி விட முடியும். இதனால் தான் திருமணத்திற்கு பெண் பார்க்க போகும் போது, முக லட்சணத்தை பார்த்து அந்த பெண்ணின் குணத்தை சொல்லி விடலாம் என்பது pottupori என்ற கலை. இது சாமுத்திர்காவின் ஒரு பகுதி தான்.

இதிலும் யாருக்குமே வரக்கூடாத குளுக்கோமா என்ற கண் நோய் வந்து விட்டால் கொஞ்சம் கொஞ்சமாக பார்வை இழப்பு வந்து முற்றிலும் பார்வையை மறைத்து விடும். எத்தனை அறிவியல் முன்னேற்றம் வந்தாலும், ரெட்டினா பாதிப்புக்கு யாரும் எதுவும் செய்ய முடியாது என நம்மில் எத்தனை பேருக்கு தெரிந்து இருக்கும் என நினைக்கிறீர்கள்.

கண்ணில் உள்ள நரம்புகள் (optic nerve) புடைத்து பெரிதாகி விட்டால் (edima) அந்த தொல்லையை சொல்லி முடியாது. இதில் பிரச்சனை இருக்கும் ஆனால் தெரியாது என சொல்வது போல சொல்லிக் கொண்டே போகலாம்.

இன்றைய நாளில், ரீல் போடுவது ஸ்டோரி போடுவது என கண்களை சிமிட்டாமல், செல்போன், டேப்லெட், கம்ப்யூட்டர் டிஜிடல் டிவி என மின் திரைகளை தொடர்ந்து பார்த்துக் கொண்டு இருப்பதால், கண்கள் சோர்வடைவது கண்களில் ஈர தன்மை இல்லாமல் உலர்ந்து விடுவது என  நிறைய பிரச்சனைகளும், மருத்துவர்களின் விழிப்புணர்வும் வந்து கொண்டு இருந்தாலும் நம் மக்கள் பிரச்சனை வந்த பிறகு தான் இது பற்றி யோசிப்பார்கள்.

இது போன்ற கண்களில் உள்ள பிரச்சனைகளை தீர்ப்பதற்கு கடவுள் கருணை கண் முன்னே இருக்கிறது என்றால் ஆச்சரியமாக தானே இருக்கும். மருந்தை தரும் மருத்துவனும் மனதை திருத்தும் வள்ளி மணாளனும் ஒரு நேர் கோட்டில் நின்று துணை செய்தால், பிரச்சனை தீரும் என்பது ஒரு புறம் இருந்தாலும், பிரச்சனை வராமளிருக்க, இறை வழிபாடு செய்து இறையருள் பெறுவது சாத்தியம் தானே.

ஆம் திருவாரூர் மாவட்டத்தில் உள்ளது “எண்கண்” என்ற திருத்தலம். என்னது கண் பார்வைக்கு என தனித்தலமா என யோசிக்கும்படி அமைந்துள்ளது இந்த திருக்கோயில். இது அடிப்படையில் பிரம்மபுரீஸ்வரர் என்ற சிவத்தலம் தான். ஆனாலும், இங்கே முருகனே பிரதானம். திருச்சி மாவட்டத்தில் உள்ள வயலூர் என்ற கிராமத்தில் உள்ள ஆதிபுரீஸ்வரர் திருக்கோவிலில் வயலூர் முருகன் எப்படி பிரசித்தி பெற்றதோ அப்படி தான் இந்த எண் கண் திருக்கோயில்.

முருகன் என்றாலே அழகு என்பது தமிழ் சொல்லும் பொருள். அந்த அழகுக்கு அழகு சேர்க்கும் விதமாக அமைந்துள்ளது  எண்கண் திருக்கோவிலில் உள்ள முருகன் சிலை என்றால் கொஞ்சம் மனக் கண்ணில் பாருங்கள். முருகனே நேரில் வந்து பேசுவது போல உணர முடியும்.

மயில் மீது, அமர்ந்த கோலத்தில் இருந்து ஆறுமுகப் பெருமானாக அருள்பாலிக்கிறார். இந்த மயிலும் ஒற்றைக் காலில் முருக பெருமானை தாங்கி சுமந்தபடி சிலையை அமைத்து வடித்து இருக்கும் சிறப்பு சிற்பியின் திறமைக்கு ஒரு சான்று. இன்னும் சொல்ல வேண்டும் என்றால் கை விரல்களுக்கு இடையே உள்ள இடைவெளியை கூட தத்ரூபமாக அமைத்து இருக்கும் இந்த சிலாரூபம் நம்மை ஒரு நிமிடம் மெய் சிலிர்க்க வைத்து விடும்.

முருக பெருமானுக்கு சிறப்பை சொல்லும் கிருத்திகை, அதை ஒட்டிய விரதம் வழிபாடு எல்லாம் சொல்ல இந்த திருக்கோவிலே முதன்மை பெறுகிறது. ஷண்முக அரச்சனை பிரார்த்தனையை தொடங்கி வேல் அர்ச்சனை செய்து முடித்தால், கண் பார்வை குறைபாடு நீங்கி முழுமையாக  குணமாகும் என்பது இந்த நூற்றாண்டில் நாம் கண் கூடாக பார்க்கும் அதிசயம் இந்த என் கண் திருக்கோயில்.

பிரணவ மந்திரத்திற்கு பொருள் தெரியாமல் பிரமனை சிறை பிடித்த முருகன், பிரணவ மந்திரம், வேத ஆகமங்களை சிவனாருக்கு ஓதியது போல, நான்முக நாயகன் பிரமன் இந்த திருத்தலத்தில் தவம் இயற்றி முருகப் பெருமானிடம் மந்திர உபதேசம் பெற்று பிரணவத்தின் பொருள் உணர்ந்து, நலம் பெற்றார் என சொல்லும் ஐதீகமும் இந்த திருத்தல சிறப்பில் சொல்வது உண்டு. அதனால் தான் முருகன் தென்திசை பார்த்து அருள்பாலிக்கிறார்.

வடக்கு சுவரில் பிரம்மாவும், நடராஜருக்கு எதிரே சனி பகவானும், உள்ள இந்த திருக்கோயில் ஒரு பிரகாரத்தை மட்டும் கொண்டு கிழக்கு மற்றும் தெற்கு என இரண்டு வாசல்  கொண்ட சின்ன கோவில் தான். ஆனால் இந்த திருத்தலம் தரும் பலன்கள் அளவிட முடியாதது. க்ஷேத்ர மகாத்மியத்தில் இந்த திருத்தலம் பற்றி சொல்லப்பட்டு இருக்கிறது. அருணகிரிநாதர் அருளிய திருப்புகழ் பாட பெற்ற திருத்தலமாகும்.

சிக்கல், எட்டுக்குடி, மற்றும் எண்கண் இந்த மூன்று திருத்தல முருகன் சிலையையும் ஒரே சிற்பியின் கைவண்ணத்தில் மலர்ந்தது என்பது இன்னொரு சிறப்பு . பார்வை இழந்த சிற்பி தன் மனக் கண்ணால் வடிவமைத்த சிலை என்ற சிறப்புடன், பங்குனி மாதத்தில் சூரிய கதிர்கள் பிர்ம்பபுரீச்வரர் மீது படுகிறது என்பது இன்னொரு சிறப்பு.

சோதிடப்படி லக்கினத்திற்கு 2-12 இல் ஒளிக்கிரங்கள் இருந்தால் அவர்களுக்கு கண் நோய் வரும். லக்கினம் பாப கர்த்தாரியாக இருந்தால் அவர்களுக்கு கண் தொடர்பான பிரச்சனை உண்டு. இதில் சனி பார்வையும் சேர்ந்து விட்டால் கேட்கவே வேண்டாம் என மருத்துவ சோதிடம் சொன்னாலும், பார்வை வளம் பெற ஒரே தீர்வு எண்கண் முருகனே என்ற நம்பிக்கையுடன் வழிபாடு செய்யுங்கள்.

இன்றைய நாளில் கண்ணாடி அணிவது காண்டாக்ட் லென்ஸ் போடுவது என சர்வ சாதாரணமாகி விட்டாலும், அதிக நேரம் மின் திரையை பார்த்து கண் சோர்வு வருவது தவிர்க்க முடியாது என்பதால் ஆண்டுக்கு ஒரு முறையேனும் இந்த எண்கண் திருக்கோயிலுக்கு செல்ல வேண்டும் என உறுதி எடுத்துக் கொள்ளுங்கள். வேலை மற்றும் தொழில் நிமித்த பயணம் செய்பவர்கள் இந்த பகுதிக்கு வரும் போது, இந்த திருக்கோவில் செல்ல வேண்டும் என குறித்து வைத்துக் கொள்ளுங்கள்.

இந்த திருக்கோவில் திருவாரூரில் இருந்து 13 கிலோமீட்டர் தூரத்தில் உள்ளது பஸ் வசதிகள் உள்ளது. பகல் 11 மணிவரை திறந்து இருக்கும் இந்த திருக்கோவில், தினமும் மாலை 4 மணி முதல் இரவு 8 மணிவரை திறந்து இருக்கும்.

திருத்தல யாத்திரை செய்வோம். திருவருளை பெறுவோம்.நல்லதே நினைப்போம். நல்லதே நடக்கும்.