வெளிச்சத்திற்கு வாங்க 56

வெளிச்சத்திற்கு வாங்க

-   56 –

சூரியன் காலையில் உதிப்பது கிழக்கு திசையில் என பள்ளியில் பாடம் படித்து இருப்போம். வளர்ந்த பிறகு இதனை நேரில் பார்த்து அனுபவத்திருப்போம்.

அட ஆமாங்க.. அதுக்கும் சோதிடத்திற்கும் என்ன என கேட்க போறீங்க..அதை சொல்வதற்கு தான் இந்த வார பதிவு.

கிழக்கே தொடங்கி, வலமாக வலம் வந்தால் தெற்கு அப்புறம் மேற்கு அதை தொடர்ந்து வடக்கு என கிழக்கில் முடித்தால் ஒரு பிரதட்சணம் அல்லது வலம் வருதல் என வரும். இதை தான் கோவிலில் சுற்றுவதும் சிலர் நவ கிரகங்களை சுற்றுவதுமாக இருக்கும்.

சில சமூகத்தில், நித்தய அனுஷ்டானம் செய்யும் போது, இதனை வழக்கத்தில் வைத்து இருப்பார்கள்.

“யானி கானி ச பாபானி, ஜன்மாந்தர-க்ருதானிச,

தானி தானி விநச்யந்தி, பிரதக்ஷிண பதே பதே”

என மந்தரம் சொல்லி வலம் வருதல் இன்னமும் சில சமூகத்தில் பழக்கத்தில் இருக்கிறது.

கிழக்கில் தொடங்கி தெற்கு வழியாக கிழக்கில் முடிப்பது ஒரு சுற்று என வைத்துக் கொண்டால், இந்த ஜாதக கட்டத்தில் மேஷத்தில் தொடங்கி மீனத்தில் முடியும் ராசிக்குரிய திசைகளை தெரிந்து கொள்வோமா?

மேஷத்தை கிழக்கில் இருந்து கணக்கிட்டால், மீண்டும் சிம்மம் கிழக்கில் வரும், பிறகு தனுசுவும் கிழக்கில் வரும் இதை தான் 1-5-9 என திரிகோணம் என சொல்லுவார்கள். ஆக ஒரே திசையில் அமையும் ராசிகளை கோணமாக சொல்வார்கள் என்பதை புரிந்து கொள்ளுங்கள்.

இதை வேறு விதமாக வைத்து சிந்திக்க எடுத்துக் கொண்டால், நான்கு கோணம் சேர்ந்தது ஒரு சதுரம் இங்கே 1-5-9, 2-6-10, 3-7-11,4-8-12 என நான்கு கோணத்தை முறையே அறம், பொருள், இன்பம், வீடு என வகைப்படுத்திக் கொள்ளலாம்.

கால புருஷ தத்துவப்படி மேஷம் சிம்மம் தனுசு கிழக்கு திசையிலும், ரிஷபம் கன்னி, மகரம் தெற்கு திசையிலும், மிதுனம், துலாம், கும்பம் மேற்கு திசையிலும், கடகம், விருச்சிகம் மீனம் வடக்கு திசையிலும் அமையும்.

பூமி உருண்டையா?  தட்டையானதா? என்ற வாதத்திற்குக் போகாமல், பூமி உருண்டையாக இருந்தால் நாம் ஏன் வீடுகளை சதுரமாக/செவ்வகமாக கட்டுகிறோம் என்று என வாதம் செய்யாமல், இதை அப்படியே வீட்டிற்கு பொருத்தி பார்த்தால் கோணமும் கேந்திரமும் கிடைக்கும்

இந்த அமைப்பில் ஒரு திசையில் இருந்து இன்னொரு திசைக்கு போகும் போது, இரண்டிற்கும் இடைப்பட்ட திசை வருமே உதாரணமாக தென்கிழக்கு, வடமேற்கு என அதை வைத்து சிந்தித்து பார்த்தால் நமக்கு புதிய சிந்தனை கிடைக்கும்.

கிழக்கு திசைக்குரிய ராசி மேஷத்தில் இருந்து தெற்கு திசையை தொடும் ராசி கடகம் தெற்கில் அதில் இருந்து மேற்கு திசையை தொடும் ராசி துலாம் அங்கிருந்து வடக்கு திசையை தொடும் ராசி மகரம்(1-4-7-10). இதை தான் கேந்திர ஸ்தானங்கள் என்று சோதிடத்தில் சொல்கிறோம்.

இந்த அமைப்பிலே தான் வாழும் வீடானது வாஸ்துவிற்குள் வைத்து சிந்திக்க தந்து இருக்கிறார்கள். diagnal என்று சொல்லக் கூடிய இரண்டு மூலைகளை குறித்துக்கொண்டு ஒரு வீட்டையே வலம் வந்து விடலாம்.

மனையின் அமைப்பு, வாசல் வைக்கும் திசை, சன்னல் அமைக்கும் முறை, வாசக்கால் மற்றும் சன்னலின் அளவுகள் அதன் டிசைன்கள், இதன் உட்புற சுவரின் பெயின்ட் நிறம் வெளிப்புற சுவரின் பெயின்ட் நிறம், சன்னலின் நிறம், கதவின் நிறம் தரையின் நிறம், சீலிங் நிறம், wash basin நிறம் குழாயின் அமைப்பு என ஒரு பெரிய பட்டியலே போகும்.

வீட்டை கட்டிப் பார்; கல்யாணம் பண்ணி பார் என்று சொல்லுவார்கள். அந்த வரிசையில் வாஸ்து சாஸ்திரத்தை தொட்டுப்பார் என்று சொல்ல வேண்டும். அதனால் தான் வாஸ்து விற்பனர்கள் கட்டணங்களை சில லட்சங்களை வாங்குகிறார்கள் என்பதை மனம் உவந்து ஏற்றுக் கொள்ள வேண்டும்.

இதே சிந்தனையை திருக்குறளில் வைத்து சிந்தித்தால், ஆச்சரியமாக இருக்கும். திருக்குறள் இந்த வாஸ்து கட்டமைப்பில் தான் அமைந்து இருக்கிறது. முதலில் வரும் பாயிரவியலில் நான்கு அதிகாரங்கள் உண்டு. இதில் முதல் அதிகாரம் கடவுள் வாழ்த்து கிழக்கு திசையையும், அடுத்து வரும் வான் சிறப்பு  மேற்கு திசைக்குரிய அதி தெய்வமான மழை தரக்கூடிய வருணனையும், அதை அடுத்து வரும் நீத்தார் பெருமை, தென் திசையை குறிக்கும் கடவுளையும், அறன் வலியுறுத்தல் வடக்கு திசைக்குரிய அதி தெய்வமான குபேர கடவுளையும் குறித்து அமைந்துள்ளது என்றால் வியப்பாக உள்ளது அல்லவா.

சரி. இந்த வாஸ்து சாஸ்திரத்தை இந்த வாரம் சிந்திக்க எடுத்துக் கொள்வோம்.

தென் கிழக்கு திசையில் தான் சமையல் அறை இருக்க வேண்டும் என வாஸ்து சாஸ்திரம் சொல்லும். ஏன் என்றால், கிழக்கு பகுதி சூடாக இருப்பதையும், தென் பகுதியில் இருந்து வீசும் காற்று, இதமாக இருக்கும் எனபதாலும் இந்த பகுதியில் அடுப்பு அமைந்தால் மிதமான வெப்பத்தில் ஆரோக்கியமான உணவு கிடைக்கும் என்பதால் என்றால் பகுத்தறிவாதிகள் கூட வாஸ்து சாஸ்திரத்தை மறுப்பு சொல்லாமல் ஏற்றுக் கொள்வார்கள் இல்லையா.

இப்போ எங்கே சார் விறகு அடுப்பு வைத்து சமையல் செய்யறாங்க.. எல்லாம் கேஸ் தான் அதுவும் இப்போ கேஸ் சிலிண்டர் விற்கிற விலையில் எல்லோரும் இண்டக்சன், ஓவன் இன்னும் சிலர் சோலார் அடுப்பு என மாறிக்கிட்டே இருக்காங்க என்று சொல்றீங்க புரிகிறது. அதற்கான சோதிட சிந்தனைகளை இன்னொரு வாய்ப்பில் சிந்திக்க வைத்துக் கொள்வோம்.

இந்த அக்னி மூலைக்கு, நேர் எதிர்புறம் வட மேற்கில் தான் கழிவறை வர வேண்டும் என சொல்லுவார்கள். இதனை வாயு மூலை என சொல்லுவாங்க. இப்படி diagnal ஆக இருந்தால் plumbing செலவு எங்கோ போயிடுமே என்று யோசிக்காதீர்கள் அதன் வழி முறைகளை குடும்ப தலைவரின் ஜாதக படி ஆய்ந்து சொல்வது தான் அனுபவம் வாய்ந்த விற்பனர்களின் ஆசிகள்.

இதே போல அலுவலகத்திற்கும் வாஸ்து முறை கொள்கைகள் உண்டு. விவசாய பண்ணை நிலத்திற்கும் சில முறைகள் உண்டு. இது ஒரு பெரிய கடல், அதனை தனியாக சொல்ல ஒரு தனி தொடரே தொடங்க வேண்டும் அதை சோதிடத்துடன் சேர்த்து சொல்லும் போது இன்னும் சுவையாக இருக்கும்.

வட கிழக்கு பகுதியினை ஈசான மூலை என்று சொல்லுவார்கள். இது அதிக பாரம் இல்லாமலும் இறையருள் பெறுவதற்கும் வைத்துக் கொள்ள வேண்டும் என சொல்லுவார்கள்.

இதன் எதிர் திசை தென்மேற்கு இது அதிக பாரம் உடையதாகவும் water tank- தண்ணீர் தொட்டி அமைக்க வேண்டும் என்றும் சொல்லுவார்கள். இப்படி நான்கு மூலைகளையும் எட்டு திசைகளையும் வடிவமைத்து தருவதில், ஒரு architect செய்யும் வரைபடத்தை போல சோதிட சிந்தனைகளை வைத்து வாஸ்து வடிவமைப்பு செய்வதும் மிகவும் அவசியமானது என்பதை புரிந்து கொள்ளுங்கள்.

ஐயா நங்கள் வாடகை வீட்டில் இருக்கிறோமே நாங்களும் வாஸ்து பார்க்க வேண்டுமா என்று உங்களுக்கு கேட்க தோன்றுகிறதா? நூறு சதவீதம் பார்க்க தேவையில்லை என்றாலும் சில குறிப்பிட்ட விஷயங்களை அவசியம் பார்த்து தான் ஆக வேண்டும் அதனால் தான் வாடகைக்கு வீடு பார்க்கும் போது, சில அடிப்படை வாஸ்து முறைகள் உள்ளதா என்று பார்த்து வர வேண்டும்.

அப்படி பார்கவில்லை என்றால், அதற்குரிய பலன்களை ஏற்றுக் கொள்ள தயாராக வேண்டும். அல்லது தெரியாமல் இந்த வீட்டுக்கு வந்து விட்டோம் என்று வேறு வீட்டுக்கு காலி செய்து கொண்டு போக வேண்டும்.

உதாரணமாக சொல்ல வேண்டு என்றால், லக்கினத்திற்கு இரண்டாம் வீட்டில் சர்ப்ப கிரகங்கள் இருந்தால் ஒரு சந்து போல நீளமாக போன பிறகு அவர்கள் வீட்டு நுழைவாயில் இருக்கும். இது அடுக்கு மாடி, வாடகை அல்லது சொந்த வீடு என எப்படி இருந்தாலும் இப்படி தான் இருக்கும். உங்கள் அனுபவத்தில் அல்லது உங்கள் ஜாத்தகத்தில் வைத்து சிந்தித்து பாருங்கள்.

இது போல ஜாதக அமைப்பை வைத்துக் கொண்டு வாஸ்து குறிப்புகளை சேர்த்துக் கொண்டு, பலம் பொருந்திய கிரகம் நலம் தரும் கிரகம் என நேர் செய்து ஆலோசனை சொல்வதால் தான் வாஸ்து ஆலோசனைக்கு சில லட்சங்கள் அவர்கள் உழைப்புக்கு கட்டணமாக வாங்குகிறார்கள் என்பதை புரிந்து கொள்ளுங்கள்.

தெரியாமல் வீட்டை கட்டி அல்லது வாங்கி விட்டோம். வீட்டை இடிக்கனுமா அல்லது விற்கணுமா என்று கேட்காதீர்கள். அதற்கான வழி முறைகள் உங்கள் ஜாதகத்தில் இருக்கும் அதை வைத்துக் கொண்டு சரி செய்ய வாய்ப்புகளும் உண்டு..

எங்கே பிரச்சனைகள் இருக்கிறதோ அங்கே தீர்வும் இருக்கிறது என்பதை புரிந்து கொள்ளுங்கள். பூட்டு தயாரிக்கும் போதே சாவியும் சேர்த்தே தான் தயார் செய்வார்கள். அனுபவம் இல்லாத சிலர் தான், பூட்டுக்குரிய சாவியை விட்டு விட்டு வேறு சாவியை வைத்துக் கொண்டு பூட்டு திறக்கவில்லை என அழுது கொண்டு இருப்பார்கள்.

“தட்டுங்கள் திறக்கப்படும்” என்றால் பூட்டிய கதவை தட்டினால் அது திறக்கப்படுமா? என சிந்தித்து பார்த்தால் சொல்ல வருவது உங்களுக்கு புரியும்.

நல்லதே நினைப்போம். நல்லதே நடக்கும்.