வெளிச்சத்திற்கு வாங்க

 “வெளிச்சத்திற்கு வாங்க...”

-         -40-

-          

இப்போ சனி பெயர்ச்சி வருதாமே...!!நமக்கு எப்படி இருக்கப் போகுதோ என்று அறிந்து கொள்ளும் எண்ணம் எல்லோருக்கும் இருக்கும்.

 

ஒவ்வொரு சனி பெயர்ச்சி வரும் போதும், சிலருக்கு அஷ்டம சனியாக, சிலருக்கு அர்த்தஷ்டம சனியாக சிலருக்கு ஏழரை சனியாக, சிலருக்கு ஜென்ம சனியாக இப்படி இருக்கும்.

 

பொதுவாக சனி பெயர்ச்சி பலன் சொல்பவர்கள் ராசியை வைத்து சனியின் பார்வையை வைத்து இது போல வேறு சில காரணிகளை அவரவர் அனுபவத்திற்கு ஏற்ப சேர்த்து சொல்லுவது வழக்கம்.

 

எப்படி இருந்தாலும் நாம் பலன்களை தெரிந்து கொள்ளாமல் விடுவோமா என்ன...?

 

அதெல்லாம் சரி இந்த சனி பெயர்ச்சி எப்படி இருக்கும் சொல்லுங்க என்று கேட்பவர்கள், பால ஜோதிடம் வழங்கும் சனி பெயர்ச்சி பலன்கள் புத்தகத்தை வாங்கி தெரிந்து கொள்ளுங்கள்.

 

அஷ்டமத்து சனி என்பது ஒருவரது ராசிக்கு எட்டாவது இடத்தில் சனி வருவதுதான். இந்த சனிப்பெயர்ச்சியில் கும்பத்திற்கு வரும் சனி என்பதால் கடக ராசி அன்பர்களுக்கு இது அஷ்டம சனியாக அமைகிறது.

 

இப்போ அஷ்டம சனி ஒவ்வொரு சனி பெயர்சியிலும் ஒரு சிலருக்கு வரும் என்ற நிலையை சொல்லாமல் இவை எல்லாம் இருந்தால் அது அஷ்டம சனியை போல என்று ஒரு தமிழ் பாட்டு சொல்கிறது அதை தான் உங்களுடன் இந்த வாரம் பகிர்ந்து கொள்கிறேன்..

 

அந்த பாட்டை எழுதியவர் நம்ம பாட்டி தான்.. ஆம் ஒளவையார் அருளிய தனிப்பாட்டில் வரும் அந்த பாடலை சுவைத்து பாருங்களேன்.

 

 

காலையிலே பல்கலை நூல் பயிலாத தலை மகனும்

ஆலை எரி போன்ற அயலானும்

சால மனைக் கட்டழிக்கும் மனையாளும்

இம் மூவர் தனக்கு அஷ்டமத்து  சனி

 

எளிதாக பொருள் விளங்கும் இந்த பாடலில், சொல்ல வரும் செய்திகளை பாருங்கள், அதிகாலையில் எழுந்து அறநூல்களை படிக்காத குடும்பத்து தலைவன் என்றால் அங்கே அஷ்டமத்து சனி என்கிறார்..

 

ஒரு குடும்பத்து தலைவன் அதிகாலையில் எழுந்தால், அந்த குடும்பத்தில் உள்ளவர்களும் எழுந்திருப்பார்கள் என்ற கருத்தை சொல்ல வரும் இந்த அற வாழ்க்கையை நாம் தெரிந்து கொண்டால், அஷ்டமத்து சனிக்கான பரிகாரம் நமக்கு எளிதாக புரிந்து கொள்ள முடியும் இல்லையா..

 

ஆலை எரி போன்ற எனும் போதே நமக்கு வட சென்னை தான் நினைவில் வரும். ஆலையில் இருந்து வரும் நெருப்பு எத்தனை சூடாக இருக்குமோ அத்தனை சூடாக அண்டை வீட்டு தோழர்கள் அமைந்து விட்டால் அங்கே அஷ்டமத்து சனி என்கிறார். இன் சொல் பேச வேண்டும் அதுவே ஆரோக்கியமான நல்லுறவை பெற்று தரும் என்பதை புரிந்து கொள்ள முடிகிறது தானே.

 

‘யாவர்க்குமாம் இன்னுரை தானே” என்று திரு மூலர் சொல்வது போல அன்போடு அண்டை அயலாருடன் நட்பு கொண்டு பழகுதல் அஷ்டம சனிக்கான எளிய பரிகாரம் என்பதை புரிந்து கொள்ள முடியும் இல்லையா.

 

வரவுக்கு மீறிய செலவு செய்யும் மனையாட்டி இருந்து விட்டால் அதுவும் தனக்கு அஷ்டம சனி என்று ஒளவையார் சொல்வதை நோக்கும் போது, அஷ்டம சனி வேறு எங்கேயும் தேடி பார்க்க தேவையில்லை என்பது போல தோன்றுகிறதா...?

 

வாரம் தோறும் பியூட்டி பார்லர் போகும் பெண்கள், பீரோவில் அடுக்கி வைத்த ஆடைகளை ஒதுக்கி விட்டு, தேவையிலாமல் ஆடைகளை வாங்கி குவிக்கும் இல்லத்தரசி, வீட்டில் திண் பண்டங்களை செய்ய சோம்பல் பட்டு, பாக்கெட்டில் அடைத்து வைத்த ஆரோக்கியமில்லாத திண்பண்டங்களை வாங்கி திண்பதுடன், தன் பிள்ளைகளுக்கும் தந்து பணத்தை விரயமாக்கும் மனையாட்டி என ஒரு குட்டி பட்டியலை போட்டு காட்டாமல், சுருக்கமாக வரவுக்கு மீறிய செலவு செய்யும் மனையாட்டி என்று குறித்து சொல்லி இந்த மூவரில் மூன்றுமோ ஏதாவது ஒன்று ஒருவருக்கு அமைந்து விட்டால் கூட, அது அவருக்கு அஷ்டம சனி என்று சொல்லுகிறார் ஒளவையார்.

 

அது சரி அஷ்டம சனி என்றால் அத்தனை துன்பமா என்று கேட்க வருகிறீர்கள் புரிகிறது. ஏழரை சனியை விட அஷ்டம சனியை கூடுதலாக கவனத்துடன் இருக்க வேண்டும் என்பது தான் குறிப்பு. ஏன் இப்படி என்றால், சனி ராசிக்கு எட்டாம் இடத்தில், வரும் போது, சனியின் பார்வை, 10ம் இடம்,  2ம் இடம் மற்றும் 5ம் இடத்தில் விழுகிறது.

 

அதனால் 10ம் இடமான தொழில் ஸ்தானத்தை பாதிக்கும்.   2ம் இடமான குடும்பத்தை பாதிக்கும். 5ம் இடமான பூர்வ புண்ணிய பலன்களை பாதிக்கும்.

 

ஒரு மனுஷனுக்கு நிம்மதியை தருவதே இந்த மூன்று தானே.. அந்த மூன்றிலும் பாதிப்பு என்றால் எப்படி என கேட்க வருகிறீர்கள் புரிகிறது. அதனால் தான் அஷ்டம சனி என்றால் அலட்சியம் காட்ட கூடாது என்று எச்சரிக்கையாக சொல்கிறோம்.

 

இத்தனை பிரச்சனைகளை அஷ்டம சனி தரும் என்றாலும் ஒரு சிலருக்கு அஷ்டம சனி நன்மை தரும் சூழலும் உண்டு.

 

ஓருவர் ஜாதகத்தில் ராசி அல்லது இலக்கின கேந்திரத்தில் ஆட்சி உச்சம் பெற்றோ லக்ன யோகராகி அவர் திசை நடைபெறும் காலங்களில் அஷ்டமத்து சனி வந்தால் ஜாதகருக்கு பூமியாலும் மனையாலும் வாகனத்தாலும் யோகம் அமையும். ஆனாலும் மன சஞ்சலம் இருக்கும்.

 

ஓருவர் ஜாதகத்தில் தனாதிபதி லாபாதிபதி திசை நடந்து ஆட்சி உச்சம் நல்ல இடங்களில் இருந்து சனிக்கு நட்பு கிரகமாக இருந்தால் அஷ்டமத்து சனிநடந்தாலும் அரசியல் முலமாகவும் வெளிநாட்டு தொடர்பாலும் யோகத்தை அடைய வாய்ப்பு உண்டு. இருந்தாலும் உடல் நலன் பாதிப்பு ஏற்படும்.

 

இவர்களுக்கு பரிகாரமாக நாம் சொல்வது உணவும் ஒழுக்கமும் தான். முடிந்த வரை அதிகாலையில் எழுந்திருக்க பழகுங்கள்.. வாரத்திற்கு இரண்டு முறை, எட்டு மணி நேரமாவது மௌன விரதம் கடைப்பிடியுங்கள்.

 

வாய்ப்பு கிடைப்பவர்கள் சனிக்கிழமை தோறும், வெள்ளை எள்ளை தேவைக்கு ஏற்ப வறுத்து பொடித்து (மொத்தமாக பொடித்து வைத்துக் கொள்ள கூடாது) சாதத்தில் கலந்து உப்பு சேர்க்காமல் சாப்பிடலாம். சுவை விரும்பி என்றால், கொஞ்சம் வெல்லம் சேர்த்துக் கொள்ளலாம்.

 

பஞ்ச முக ஆஞ்சநேயர், பஞ்ச முக கணபதி போன்ற பஞ்ச முக மூர்த்திகளை வழிபாடு செய்யுங்கள்

 

தமிழ் படிக்கும் ஆர்வம் உள்ளவர்கள் திருஞானசம்பந்தர் அருளிய பச்சை பதிகத்தை தினமும் நாள் தவறாமல், படனம் செய்யுங்கள், அல்லது ஆடியோவில் கேளுங்கள்.

 

உங்கள் இருப்பிடத்திற்கு அருகில் உள்ள வன்னி மரத்தை வலம் வந்து வழிபாடு செய்யுங்கள்.

 

இவை எதுவுமே செய்ய முடியாது என்றால் சனி பிரதோஷத்தன்று  திருமுறை படனம் செய்து சிவ வழிபாடு செய்யுங்கள்.

 

நல்லதே நினைப்போம். நல்லதே நடக்கும்.