வெளிச்சத்திற்கு வாங்க

 

“வெளிச்சத்திற்கு வாங்க...”

-   38 -

“பல்லை உடைப்பேன்” என்று யாராவது தப்பாக பேசிவிட்டால், கோபத்தில் இப்படி திட்டுவோம். பேசுவது நாக்கு உதை வாங்குவது பல்லா என்று மெதுவாக யோசித்து பார்த்தால், நமக்கு என்னவோ மாதிரி தான் இருக்கும்.

சும்மா பல்லை காட்டாதே என்று எதற்கு எடுத்தாலும் சிரிப்பவர்களை சொல்லுவாங்க. பார்த்து இருப்போம்.

பல் தேய்க்கும் பழக்கம் இந்தியர்களிடம் குறிப்பாக தமிழர்களிடம் அதிகம் உண்டு. தமிழ் அல்லாத வேறு சில மாநிலங்களில், வாய் நிறைய பீடாவை போட்டு குதப்பி கொண்டு, வெள்ளை நிறம் ஒரு போதும் தெரியாதபடி, சிவப்பு நிறமாகவே வைத்து இருப்பார்கள்.

அதெல்லாம் சரி, இந்த பல் எலும்பா சதையா என்று கேட்டால், யோசிக்க வேண்டிய விஷயம் தான் என சொல்ல தோன்றும். சின்ன வயதில் பால்பல் விழுவதும் மீண்டும் முளைப்பதும் குழந்தை வளர்ப்பில் ஒரு அம்சம் தான்.  வயதான பிறகு விழும் பற்கள் தான் மீண்டும் இயற்கையாக முளைப்பது இல்லை.. செயற்கையாக (முளைத்து) வாங்கி விடுகிறோம்.

இந்த பல்லை வைத்து இந்த வாரம் ஒரு சோதிட குறிப்பு சொல்ல போகிறேன்.. இது எதிர்கால பலன் சொல்ல அல்ல. அந்த பல்லுக்கு உரியவர்களின் இயல்பான குணத்தை தெரிந்து கொள்வதற்காக.

அட பல்லில் கூடவா? என யோசிக்காதீர்கள். அதனால் தான் பண்டைய நாளில் பெண் பார்க்க போகும் போது, பெண்ணை பாட சொல்லுவார்கள். வாய் அசைவில் தெரியும் பற்களை கொண்டு அந்த பெண்ணின் குண நலனை கண்டு பிடித்து விடுவார்கள்.

இன்றைய நாளில் அது எல்லாம் இல்லை தான் என்றாலும் காதல் செய்யும் போதாவது இதை தெரிந்து கொள்ள வேண்டாமா? காதல் கை கூடி கல்யாணம்னு நடந்தால் அறுபது கிலோ தாஜ்மகாலுடன் எப்படி குடித்தனம் செய்ய வேண்டும் என தெரிந்து கொள்ள வேண்டாமா? அதுக்கு தான் இந்த பல் சோதிடம்.

இதற்கு நீங்கள் செய்ய வேண்டியது எல்லாம் பல்லை அளந்து குறித்து கொள்ள வேண்டும். இது எப்படிங்க ஐயா, என கேட்காதீர்கள்.. கண்களில் பார்த்து தான். அதுக்காக ஸ்கேல் பேப்பர் என வைத்தா அளவு எடுக்க முடியும்.. (சிரிக்காதீர்கள் பல் தெரிகிறது)

சதுரம் நீள் வட்டம், செவ்வகம் முக்கோணம் என அவைகளை வகைப்படுத்திக் கொள்ளுங்கள். இந்த பற்கள் வாயை திறந்ததும் தெரியும் அந்த முதல் வரிசை பற்கள் தான் என்பதை குறித்துக் கொள்ளுங்கள்.. காரணம் எல்லா பற்களும் ஒரே மாதிரியாக ஒரே அளவினதாக இருக்காது என்பது தான் மனிதனுக்கு இயற்கை தந்த பரிசு.

அந்த முதல் வரிசை பற்களிலும் மேல் வரிசை பற்களை மட்டும் வைத்துக் கொண்டு சொல்ல வரும் குறிப்புகளை சரி பார்த்துக் கொள்ளுங்கள்.

பல் செவ்வாய் என்பதால் மேல் செவ்வாய் கீழ் செவ்வாய் என்பது போல புரிந்து கொள்ளுங்கள். கைரேகை சோதிடத்திலும் செவ்வாய் ரேகை (mars line) மேல் செவ்வாய் கீழ் செவ்வாய் என சொல்லுவார்கள். இது பயண ரேகைக்கு பக்கத்தில் இருக்கும். அந்த கைரேகை பற்றிய குறிப்புகளை இன்னொரு வாய்ப்புகளில் சிந்திக்க வைத்துக் கொள்வோம்.

இந்த சிந்தனையில், முதலில் நீள் வட்டமான ஓவல் வடிவிலான பற்களை பார்க்கலாம். முத்துப்பல் என சொல்லும் இவர்கள் படைப்பாற்றல் நிறைந்தவர்கள். அன்றைய நாட்களில் உள்ள சினிமா நடிகை முதல் இன்றைய நாட்களில் உள்ளவர்கள் வரை என ஒரு குட்டி பட்டியல் போட்டு பார்த்தால் உங்களுக்கே புரியும். சீக்கிரம் சோர்வடையும் இவர்கள் அன்புக்குரியவர்களாக இருப்பார்கள்  வசதிகள் இருந்தாலும் கனவுகளும் வேதனைகளும் கூடவே இருக்கும்.

செவ்வக வடிவ பற்கள் உடையவராக இருந்தால், பலகை மாதிரி இருக்கு என்பார்கள். இவர்கள், வாழ்க்கையில் இது சரியா...? தவறா..? அவர் ஏன் அப்படி சொன்னார்? இப்படி சொல்லி இருக்கலாமே? என்று என்பது போல  ஆய்வு செய்து முடிவு எடுக்கும் குணம் உடையவர்களாக இருப்பார்கள்.   அதனால் கற்பனை நிறைந்தவர்கள் என்று ‘சட்’ என சொல்லி விடலாம். இவர்கள் விரும்பியதை கேட்டு பெறுவார்கள். தட்டி கூட பறித்து விடுவார்கள்.  காதலும் அன்பும் இருந்தாலும், உணர்ச்சிகள் இல்லாதவர்கள் போல தான் உறவுகளில் இருப்பார்கள். என்று சொல்லி விடலாம்.

சதுரமான பற்களை உடையவர்களை அரிசி பல் காரர் என்று சொல்லுவார்கள். இவர்கள்,,கொஞ்சம் ஒழுங்கு முறையை கடைப்பிடிப்பவர்களாக இருப்பார்கள். காதல் செய்பவராக இருந்தல கூட, வீட்டில் வந்து முறையாக பெண் கேளுங்கள்.. நான் வீட்டை விட்டு அப்பா அம்மாவுக்கு தெரியாமல் வர மாட்டேன் என்று சொல்வது போல தனுக்குள் ஒரு சுய கட்டுப்பாட்டுடன் இருப்பார்கள்  

இவர்கள் அமைதியாக இருந்தாலும் ஆற்றல் மிக்கவராக இருப்பார்கள். சரியான முடிவுகளை சரியான நேரத்தில் எடுத்து மற்றவர்களின் பாராட்டை பெறும் அளவுக்கு திறமை உள்ளவர்களாக இருப்பார்கள். அதனால் தான் இவர்கள் பெரும்பாலும் அலுவலகத்தில் நிர்வாக பொறுப்பில் இருப்பார்கள். இருந்தாலும் அன்பானவர்கள், கண்டிப்பனவர்களாக இருப்பார்கள்.

கவலை இல்லாமல் வாழ நினைப்பவர்கள் அதாவது ஒரு மாதிரி ஜாலி டைப் ஆசாமிகள் தான் முக்கோண வடிவ பற்கள் உள்ளவர்கள் இன்றைய நாளை அனுபவிப்போம் வாழ்வோம். நாளை பற்றிய கவலை நமக்கு எதற்கு என்பது போன்ற எண்ணம் உள்ளவர்கள்.

சுதந்திரமாக இருக்க வேண்டும் என நினைக்கும் இவர்கள் அடித்தளம் இல்லாமல் கட்டிடம் கட்டுவது போல, பொறுப்பின்றி இருப்பவர்களாக இருப்பார்கள். சிக்னல் கிடைத்தாலும் சிக்கலும் வரும் என்பதை புரிந்து கொள்ள இவர்களுக்கு தாமதமாகும்.

செவ்வாய் காரகம் கொண்ட பற்களை கொண்டு இது போல நிறைய சொல்ல முடியும். இது தான் உணர்வுகளை வெளிப்படுத்தும் ஆளுமைக்குரிய கிரகம் என்பதால் தான் பல்லுக்கு காரகம் வகிக்கும் செவ்வாயை வைத்து பற்களின் அமைப்பை கொண்டு அவர் தம் இயல்பான ஆளுமை உணர்வுகளை சொல்லி விடலாம்.

மனித இனத்திற்கு மறைந்து வளர்ந்து மாறுபடுவது, செவ்வாய் காரகம் வகிக்கும் பற்களும் கேது காரகம் வகிக்கும் முடியும் தான்.

இந்த இரண்டில் தான் பெண்கள் மட்டுமல்ல ஆண்களும் கவனமாக இருப்பார்கள். கொஞ்சம் வெள்ளை ஆனால் கூட “டை” அடித்துக் கொள்வது, பற்களை ப்ளீச்சிங் செய்வது என இன்றைய சூழலுக்கு ஏற்ப சொல்லலாம்.

“அங்க வித்யா” என்ற சாஸ்திர முறைப்படி சோதிட சிந்தனைகளை  சேர்த்து சொன்னால் ஜாதகத்தை பார்த்து அவரது குண அமைப்புகளை சொல்லி விடலாம் என்றால் ஆச்சரியமாக தானே இருக்கும்.

சரி உங்கள் பல்லை காட்டுங்க..(ஹி.. ஹி...)

நல்லதே நினைப்போம். நல்லதே நடக்கும்.