வெளிச்ச்சத்த்ற்கு வாங்க

“வெளிச்சத்திற்கு வாங்க...”

-   31 -

ஒரு நிகழ்ச்சிக்கு போயிருந்தேன். “வெளிச்சத்திற்கு வாங்க-விசு அய்யர்” என மேடையிலே அறிமுக படுத்தினார்கள்.

அய்யர் வெளிச்சத்தில் தானே இருக்கிறார்.. அவரை வெளிச்சத்திற்கு வாங்க என எங்கே அழைக்கிறீர்கள் என்று நகைச்சுவையாக சொல்லி வந்தேன்.

அடுத்த வாரம் அய்யர் என்ன சொல்ல போகிறார் என்ற ஆர்வத்தை ஏற்படுத்தி தரும், பால சோதிடத்தின் இந்த சேவை பலருக்கும் சென்று சேர்ந்து இருக்கிறது என்ற மகிழ்ச்சியான செய்தியை சொல்ல இது ஒரு உதாரணம் அவ்வளவு தான்.

பெயருக்கு பின்னால் எதற்கு அய்யா ஜாதி என கூட்டத்தில் வந்த அன்பர் ஒருவர் கேட்டார். ஜாதி முக்கியமில்லை என்பதால் தான் அதை பெயருக்கு பின்னால் போட்டு இருக்கிறோம். அதை நாங்கள் உயர்த்தி பிடிப்பதாக இருந்தால் பெயருக்கு முன்னால் அல்லவா போட்டு இருப்போம் என்று சொல்லி அவரை சமாதான படுத்தினேன்.

ஜாதி ஒழிய வேண்டும் என பேசுபவர்களும் சரி, மற்றவர்களும் சரி. “அய்யர்” என்பது ஜாதி என பலரும் நினைத்துக் கொண்டு இருக்கிறார்கள். வெளிப்படையாக சொல்ல வேண்டும் என்றால், ஒழுக்கத்தில் சிறந்தவர்களை “அய்யர்” என்று சொல்லுவார்கள். “உயர்ந்தோர்”, அல்லது “பெருமையில் சிறந்தோர்” என்று தான் உலக புகழ் பெற்ற வின்ஸ்லோ அகராதியும் சொல்கிறது.

முந்தைய நாளில் பிராமண குலத்தில் பிறந்தவர்கள் ஒழுக்கத்தில் சிறந்து இருந்ததால் பிராமண வர்கத்தில் வந்தவர்களை “அய்யர்” என சொல்லும் வழக்கம் வந்தது. அது இப்போதும் தொடர்கிறது. எனவே ஐயர் என்பது ஜாதி அல்ல “பெருமையில் சிறந்தோர்”  என புரிந்து கொள்ளுங்கள்.

என இப்படி அந்த நிகழ்ச்சியில் பேசியதும், இதற்கு ஆதாரம் என்ன? நீங்கள் எதையாவது சொல்லி வைத்து விட்டு போகிறீர்கள் என்ற சந்தேகம் எங்களுக்கு வராதா? என கூட்டத்தில் இருந்தவர்கள் கேட்க ஆதாரம் இல்லாமல் அய்யர் பேசுவாரா என சில எடுத்துக்காட்டுக்களை வைத்தேன்.

திருத் தொண்டர் தொகை என்னும், பெரியபுராணம் என்ற நூல். சைவ திருமுறைகள் பன்னிரெண்டில், பன்னிரெண்டாம் திருமுறையாக வைத்து போற்றப்படுகிறது. இதன் ஆசிரியர் சேக்கிழார்.

இந்த நூல் சைவ அடியார்கள் அறுபத்து மூவரை பற்றியது என தமிழ் அறிந்த நல் உலகம் அறியும். இதில், ஆசிரியர், பிராமண வர்கத்தில் அல்லாத ஐந்து பேரை “அய்யர்” என்றே சொல்லி அழைத்து இருப்பார்.

என்ன சாரே..! சோதிடத்திலும் வருனாசிரமமா? என்ற சத்யராஜ் பாணியில் சிலர் கேட்க வருகிறீர்கள் புரிகிறது. அது தான் இந்த வார சிந்தனையாக உங்களுடன் பகிர்ந்து கொள்ள வந்தது.

சோதிடத்தில் நவகிரகங்களில் வருணாசிரம பாகுபாடு உண்டு. வருணாசிரமம் என்பது ஜாதியை குறித்தோ அல்லது ஒரு குலத்தை குறித்தோ வந்தது அல்ல.. பிற்காலத்தில் வந்தவர்கள் அதை அப்படி மாற்றி விட்டார்கள் என்பது வேறு சிந்தனை. அதை வேறு ஒரு சமயத்தில் சிந்திக்க வைத்துக் கொள்வோம்.

ஒரு வேலையை பகுத்து செய்வது என்பதை இன்றைய நடைமுறைக்கு ஏற்ப புரிந்து கொள்ளுங்கள். இதை division of labour என்று ஆடம் ஸ்மித் கோட்பாடுகளை, பொருளாதரத்தில் நமக்கு சொல்லி தந்து இருப்பார்கள். இந்த வேலை பகுப்பு முறையை தான் அன்றைய நாளில் வர்ணங்களாக பிரித்து தந்து இருக்கிறார்கள்.  வர்ணங்கள் என்பது பிரித்து காட்டும் நிறம் என புரிந்து கொள்ளுங்கள்.

இன்றைய நாளில் அரசு அலுவலகங்கள் உட்பட கிளாஸ் 1-ஆபிசர் என தொடங்கி கிளாஸ் 4 வரை பிரித்து வைத்து இருப்பார்கள். ஒரு வேலையை இப்படி பகுக்காமல் செய்ய முடியுமா சொல்லுங்கள் பார்க்கலாம்..

 

இதனை இதனால் இவன் முடிக்கும் என்று ஆய்ந்து

அதனை அவன் கண் விடல்

என வருணாசிரமத்தை தான் வள்ளுவரும் சொல்கிறார் என்றால் நமக்கு வியப்பாக தானே இருக்கிறது.

 

இந்த வகையில் பிரித்து சொல்லப்பட்டதே வருணாசிரமம் என்பது என்ற அடிப்படையை தெரிந்து கொண்டு அடுத்த கட்டத்திற்கு போகலாம்.

சோதிடத்தில், பிராமணர் என்ற பிரிவில் வரும் கிரகங்கள் தேவ குரு வான வியாழனும், அசுர குருவான சுக்கிரனும்

க்ஷத்திரியர் என்ற பிரிவில், சூரியனும், செவ்வாயும். வைசியர் என்ற பிரிவில் சந்திரனும், புதனும்., நான்காம் வருணத்தவர் என்ற பிரிவில், சனியும், பிற மதத்தவர் என்ற பிரிவில் ராகுவும் கேதுவும் அமைத்து கொடுத்து உள்ளார்கள்.

ஒரு ஜாதகத்தை அலசும் போது, இந்த குறிப்புகளை வைத்து பலன் சொல்ல எடுத்துக் கொள்வதும், அவரவரின் இயல்பு நிலையை எடுத்து சொல்வதும் சோதிடர்களுக்கும் சோதிட ஆர்வலர்களுக்கும், தனியாக எடுத்து சொல்ல வேண்டிய அவசியம் இல்லை.

ஒழுக்கத்தில் சிறந்தவர்கள் பிராமண குலத்தை சேர்ந்தவர் என்பதால், குரு பார்க்க பாவம் போகும் என்பார்கள்.

அரசு துறைக்கு என சோதிடம் அடையாளம் காட்டும் கிரகம் சூரியனும், செவ்வாயும் க்ஷத்திரிய பிரிவில் வருவார்கள்.

அதெல்லாம் சரிங்க ஐயா, நாட்டை/அரசை ஆட்சி செய்வது யார் என்ற அடுத்த கேள்வி உங்கள் மனதில் வந்து இருக்கும். அதற்கு தமிழே பதிலும் சொல்லும். ஒவ்வையாரின் இந்த பாடலை பாருங்கள். இதன் பொருளை விக்கிபீடியாவில் தேடி சரி பார்த்துக் கொள்ளுங்கள்.

“நூல் எனிலோ கோல் சாயும், நுந்தமரேல் வெஞ்சமராம்

கோல் எனிலோ அங்கே குடி சாயும்-

நாலாவான் மந்திரியும் ஆவான் வழிக்குத் துணை ஆவான்

அந்த அரசே அரசு!”

 

ஒரு அமைச்சரவையில், முப்புரி  நூல்  அணிந்தவர் (அந்தணர்) என்றால் நீதி தவறும்.

 

உன் உறவினர் (க்ஷத்திரியர்) என்றால் கொடிய போரினை மூட்டி விடுவார்கள். சண்டை வரும்.

 

வைசியன் என்றால் மக்களுக்கு துன்பம் வரும்.

 

எனவே நான்காம் வர்ணத்திலே வருபவனே நல்ல மந்திரி என்றும், அரச நெறிக்கு உற்ற துணையாக விளங்குவான். அவனைத் துணையாகக் கொண்டதே, நல்ல அரசாகவும் இருக்கும். என்று ஒளவையார் பாடி வைத்து இருக்கிறார்.

 

இது சோதிட சிந்தனைக்கு எப்படி ஏற்புடையதாக உள்ளது என பாருங்கள். கர்மகாரகன் என்று சொல்லும் சனி தான் நம்மை நேர்படுத்தி நமது வாழ்க்கையை ஆட்சி செய்யும் கிரகம் என்பதை சோதிட அன்பர்கள் புரிந்து கொள்வார்கள்.

 

இதே சிந்தனையில், பத்ரகிரியாரும்,

சாத்திரத்தைச் சுட்டு சதுர் மறையைப் பொய்யாக்கிச்
சூத்திரத்தைக் கண்டு துயர் அழிப்பது எக்காலம்?”

என பாடுகின்றார்.

பிற சமயத்தை குறித்து காட்டும் சர்ப்ப கிரகங்களுக்கு பார்வை இல்லை என்றும் மற்ற கிரகங்களுக்குக் பார்வையை அமைத்து வைத்திருப்பதும் சோதிட சிந்தனையை நமக்கு விளக்கி காட்டுகிறது அல்லவா..?

அதனால் எந்த வருனத்தவரையும் வெறுக்காமல், அவரவர்களுக்கு உள்ள நல்ல உயர்வான குணங்களை எடுத்து பாராட்டி அன்பு காட்டி பழகுங்கள். நவகிரகங்கள் நல்லனவே செய்யும். இறை அன்பர்களுக்கு அவை நல்லனவே செய்யும்.

நல்லதே நினைப்போம். நல்லதே நடக்கும்.