வெளிச்சத்திற்கு வாங்க 30

 

“வெளிச்சத்திற்கு வாங்க...”

-   30 -

கால சர்ப்ப தோஷமா? அல்லது யோகமா? என பட்டி மண்டபம் நடத்தினால், எந்த கட்சி ஜெயிக்கும் என கற்பனையாக யோசித்தால், சிந்திக்க செய்திகள் நிறையவே வரும்.

சர்ப்ப தோஷம் என்றாலே பயமும் வரும், எந்த மதத்தினராக இருந்தாலும், பரிகாரமும் செய்தே ஆக வேண்டும் என்பதை சொல்லாமலே நீங்கள் அறிவீர்கள்.  

சாதாரணமாக ஒரு முக்கிய நிகழ்வு பற்றி பேசும் போது, சர்ப்பம் கண் முன்னே தோன்றி விட்டால் அந்த செயலை நிறுத்தி விடுவது தான் கிராம புறங்களில் இன்னமும் வழக்கம். சர்ப்பம் என்றால் அத்தனை சிக்கலா என்று கேட்பதை விட்டுவிட்டு, சொல்ல கூடிய தகவல்களை/குறிப்புகளை எடுத்துக் கொள்ளுங்கள்.

பொதுவாக ராகுவுக்கும் கேதுவுக்கும் நடுவே மற்ற கிரகங்கள் இருந்தால் அது கால சர்ப்ப தோஷம் என்று சொல்லுவார்கள். இது மட்டுமே கால சர்ப்ப தோஷம் இல்லை என்றாலும் இது போல மற்ற குறிப்பிட்ட இடங்களில் சர்ப்ப கிரகங்கள் இருந்தாலும் சர்ப்ப தோஷம் என சொல்லுவார்கள். இதில் சர்ப்ப சாபம் வேறு என சொல்ல தொடங்கினால் கொஞ்சம் பயமாக தான் இருக்கும்.

உதாரணமாக சொல்ல வேண்டுமானால், குடும்ப ஸ்தானத்தில் கேது இருந்தால், அவர்களால் குடும்பம் நடத்த முடியாது. வாய்ப்பு கிடைப்பவர்கள் ஜாதகத்தை வைத்து ஆய்வு செய்து பார்த்துக் கொள்ளலாம். இது போல சர்ப்ப கிரகங்கள் இருக்குமிடம், இணைவு பெற்ற கிரகம் என வைத்து சொல்லி விட முடியும்.

சரிங்க ஐயா சர்ப்ப தோஷம் என்றால் பரிகாரம் செய்து தான் ஆக வேண்டுமா? இல்லை என்றால் என்ன ஆகும் என சிலர் கேட்க நினைக்கலாம். அதை சொல்வதற்கு தான் இந்த வார பதிவு.

கால சர்ப்ப தோஷம் என்றாலும் யோகம் என்றாலும் சர்ப்ப ஷாந்தி செய்தே ஆக வேண்டும். அதில் எந்த வகை தோஷம் என தெரிந்து கொண்டு அதை முறையாக செய்வது தான் சிறப்பு. சர்ப்ப கிரகங்கள் பன்னிரண்டு கட்டத்தில் எந்த இடத்தில் அமைந்து உள்ளதோ அதை ஒட்டி அதன் தோஷ விவரம் சொல்லும் முறையும் உண்டு..

அதற்கு ஏற்றார் போல திருத்தலங்களை தேர்வு செய்து அனுபவம் பெற்ற சோதிடர்கள் ஆலோசனை தருவார்கள். பொதுவாக அனைவரும் அறிந்த திருத்தலம் காளஹத்தி என்றாலும் சர்ப்ப கிரக நிலை மற்றும் அவை அமைந்த இடத்திற்கு ஏற்ப வழிபாட்டு தலங்கள் அமையும் என்பதையும் நாம் தெரிந்து கொள்ள வேண்டும். எல்லா இடத்திலும் ஒரே மாதிரி தானே இறைவழிபாடு இதற்கு ஏன் இப்படி திருத்தலங்களை தேர்வு செய்கிறார்கள் என்பது குறித்து இன்னொரு வாய்ப்பில் சிந்திப்போம்.

இது போல தோஷ பரிகார நிவர்த்தி செய்யவில்லை என்றால் வாழ்க்கையில் வளமை இருக்கிறதோ இல்லையோ ஒரு வெறுமை இருக்கும் என்பதை அவரவர் அனுபவத்தில் புரிந்து கொள்ள முடியும். சரி பரிகாரம் செய்து விட்டால் சரியாகி விடுமா என்று கேட்க வரும் அடுத்த கேள்விக்கு பதில் அதை பிரசன்னம் போட்டு பார்த்து தெரிந்து கொள்ளலாம். அதனால் தான் அனுபவம் பெற்ற சோதிடர்கள் குறித்து சொல்லும் நாளில் பரிகார ஷாந்தி பூஜை செய்ய வேண்டும் என்பதை தெரிந்து கொள்வது அவசியம்.

உங்களுக்கு குறிப்பாக ஒரு செய்தி சொல்ல போகிறேன். குறித்து கொள்ளுங்கள். எந்த ஒரு செயலை செய்யும் போதும் அது தண்ணீரில் போட்டு எடுத்தால் சுத்தமாகும் அல்லது மாற்றம் அடையும் என்பதை நாம் எதார்த்தமாகவே புரிந்து கொள்ள முடியும். உதாரணமாக, பருப்பை தண்ணீரில் ஊற வைத்தால் அது முளை விட்டு வந்து விடும். இது போல காய்கறிகளை பழங்களை நீரில் கழுவி எடுத்தால் அது சுத்தமாகும்.

எதையாவது மறந்தால் தண்ணீர் குடித்தால் நினைவுக்கு வரும் என்பது நாம் அனுபவத்தில் புரிந்து இருக்கலாம். கோபமாக இருந்தால் கொஞ்சம் குளிர்ந்த நீர் அருந்தினால் கோபம் குறையும் என்பதை எத்தனை பேர் தெரிந்து வைத்து இருப்போம் சொல்லுங்கள். வீட்டுக்கு வந்தவருக்கு முதலில் குடிக்க தண்ணீர் குடிக்க கொடுப்பதும், அவர் மனநிலையில் மாற்றம் ஏற்பட்டு அமைதி நிலவட்டும் என்பதால் தானே.

சங்கீத சாதகம் செய்பவர்கள் கூட நீரில் இருந்து கொண்டு சாதகம் செய்வதால் குரல் வலிமை ஏற்படும் என்று சொல்லுவார்கள். வறட்சியினால் பூமி வறண்டு போனால், நந்தியை தண்ணீரில் இருக்கும்படி செய்து மழை வேண்டி திருமுறை பதிகம் பாடுவார்கள்.

வேதம் புதிது என்ற படத்தில், ஆத்திகனாக இருந்த அந்த படத்தின் ஹீரோ, மனம் மாறி இருக்கும் போது, தான் பயன்படுத்திய ஆயுதங்களை தாமிரபரணியில் போடுவது போல இயக்குனர் படம் எடுத்து இருப்பார் நினைவில் இருக்கிறதா?

அது போல நவக்கிரங்கள் தண்ணீரில் இருந்தால்.... சொல்ல வரும் விஷயம் புரிகிறது என்று நீங்கள் சொல்வது காதில் விழுகிறது.

ஸ்ரீராமர், இலங்கைக்கு செல்லும் முன் உப்பு விநாயகரை வணங்கி நவகிரகங்களை நீரில் பிரதிஷ்டை செய்ததாக சொல்லப்படும் திருத்தலம் தான் இராமநாதபுரம் மாவட்டத்தில் உள்ள தேவி பட்டினம்.

சிறு துறைமுகமாக விளங்கிய இந்த இடத்தில், கரையில் இருந்து சுமார் 40 மீட்டர் தொலைவில், கடலுக்குள் அமைந்த இந்த திருக்கோயில் தான் நவபாஷான கோவில்.

இங்கே நவ கிரகங்கள் தண்ணீரிலேயே இருப்பதால், கெடுதலான கிரக பலன்கள் மாறி விடும் என இன்றும் நம்ப படுகிறது. இங்கே சென்று வரும், ஒவ்வொருவரும் இதை அனுபவத்தில் உணரலாம்.

சர்ப்ப தோஷம் மட்டுமல்ல எந்த தோஷம் உள்ளவர்களும் சரி, அது போல எதுவும் இல்லாதவர்களாக இருந்தாலும் சரி, வாழ்நாளில் ஒரு முறையேனும் இராமநாதபுரத்தில் இருந்து சுமார் 15 கிலோமீட்டர் தூரத்தில் உள்ள தேவி பட்டினம் என்ற இந்த திருத்தலத்திற்கு சென்று வழிபாடு செய்து ஷாந்தி பரிகாரம் செய்து கொள்வது அவசியம் என்பதை தெரிந்து கொள்ளுங்கள்.

எல்லாம் வியாபாரமாகி போச்சு சார். காசுக்காக அவரவர்கள் என்று சொல்லும் அந்த வழக்கமான பேச்சை கொஞ்சம் ஓரமாக வைத்து விட்டு, நீரில் போட்டு எடுத்தால் அதன் தன்மை மாறும் என்ற அடிப்படை அறிவியலை புரிந்து கொண்டு, ஒரு முறை சென்று வாருங்கள். மாற்றம் நிச்சயம் ஏற்படும் என்பதை உங்கள் உணர்வுகளால் புரிந்து கொள்ள முடியும்.

எப்போது போக வேண்டும். என்ன செய்ய வேண்டும் என்பதை உங்களுக்கு நம்பிக்கையான சோதிடரை ஆலோசித்து செல்லுங்கள். உங்கள் ஜாதகப்படி சர்ப்ப கிரக நிலை கொண்டு அவர் உங்களுக்கு விளக்கி சொல்லுவார். சிலருக்கு பரிகாரம் செய்யவே முடியாத நிலை இருக்கும் அதையும் உங்கள் சோதிடர் அடையாளம் காட்டி தருவார். மனம் தளராமல், நம்பிக்கையுடன் இருங்கள்.  

நல்லதே நினைப்போம். நல்லதே நடக்கும்.