வெளிச்சத்திற்கு வாங்க11

 

“வெளிச்சத்திற்கு வாங்க...”

-   11 -

 

கடலால் சூழ்ந்த இந்த உலகம் பெரியது; அதை விட சிறியது இந்த ஆசிய கண்டம்; அதை விட சிறியது நாம் வாழும் இந்தியா; அதை விட சிறியது நாம் வசிக்கும் மாநிலம்; அதை விட சிறியது நாம் இருக்கும் நகரம்; அதை விட சிறியது நாம் வாழும் ஊர்; அதை விட சிறியது நமது தெரு; அதை விட சிறியது நம்முடைய வீடு; அதை விட சிறியது நம்முடைய பிளாட்; அதை விட சிறியது நம்முடைய அறை.

 

இப்போ பாருங்கள், எத்தனை பெரிய உலகத்தில் நாம் இத்தனை சிறியவராக நாம் இருக்கிறோம் என்று.. இந்த எண்ணம் வந்து விட்டால், “எனக்கு தான் எல்லாம் தெரியும்” என்ற எண்ணம் வருமா? “நான் பெரியவன்” என்ற ஆணவம் தான் துளிர் விடுமா? ‘அகங்காரமும்’, ‘மமகாரமும்’ அடங்கினால் ஆண்டவன் அருள் அருகிலே கிட்டிவிடுமே. அது சரி அதுக்கு தான் பயிற்சியும் முயற்சியும்.

 

குளியல் அறையில் பாத் டப் (bath tub) பில் குளிப்பதற்கு பெரிய பயிற்சி தேவை இல்லை; நீச்சல் குளத்தில் நீந்த கொஞ்சம் பயிற்சி செய்து விட்டால் எத்தனை lap அடிக்க என்று இலக்கை வைத்து விடலாம், ஏரியில் நீச்சல் செய்ய கொஞ்சம் தயக்கம் இருக்க தானே செய்யும், ஆற்றில், என்றால் கேட்கவே வேண்டாம்; அதை விட கடலில் என்றால்.....

 

குழந்தையாக இருக்கும் போது பாத்ரூமில் குளிப்பதற்கே அழுவது வழக்கம். இல்லையா... அப்படி தான் சோதிட பயிற்சிக்கு படிக்கும் போது ஆரம்ப நிலையில் கொஞ்சம் சிரமமாக தான் இருக்கும். இதை தாண்டி பயிற்சியும், முயற்சியும் அமைந்து விட்டால், சோதிட களையும், கைவசப்படும். அதுவும் ஒன்றை ஒன்று தாண்டி ஒன்றை கடந்து நின்றால், அங்கேயும் நமக்கு தெரியாத தகவல்கள் சில இருக்கும். அதனால் தான் பத்து வயதிற்குள் சோதிட பயிற்சி தொடங்க வேண்டும்.

 

நம்மில் பலர் வயதான பிறகு ரிடையர்டு ஆன பிறகு தான் சோதிடம் கற்றுக் கொள்ள தொடங்குகிறார்கள். அவரவர்கள் வாழ்க்கை முறை அது என்றாலும், நாம் சோதிட பயிற்சி என்ற விதையை விதைக்கும் காலம் பத்து வயதாக தான் இருக்க வேண்டும்.

 

சில சோதிட சிந்தனைகளை உங்களுடன் பகிர்ந்து கொள்கிறேன். சரியாக உள்ளதா சொல்லுங்கள்..

 

நட்புக்கு காரகமாக சொல்லும் புதனே நவக்கிரகங்களில் வலிமையான கிரகம். அதனை விட பலம் பொருந்தியது செவ்வாய், செவ்வாயை விட சனியும், சனியை விட குருவும் பலம் பெற்றவர்கள்., குருவை விட சுக்கிரனும், சுக்கிரனை விட சந்திரனும் சந்திரனை விட சூரியனும் சூரியனை விட ராகுவும் ராகுவை விட கேதுவும்,பலம் பெற்றவர்கள்.

 

சர்ப்ப கிரகங்களுக்கு ராசி மண்டலத்தில் சொந்த ஆட்சி வீடு கிடையாது நிழலுக்கு உருவம் கிடையாது. ஆனால் எந்த உருவத்தை வைத்தாலும் அதற்கு நிழல் உண்டு என்பது போல சிந்திக்க பழகிவிட்டால், சர்ப்ப கிரகத்தின் நிலையை புரிந்து கொள்ள முடியும்.

சர்ப்ப கிரகங்கள் யாருடைய வீட்டில், மற்றும் யாருடைய நட்சத்திர சாரத்தில் இருக்கிறார்களோ அதை ஒட்டி பலன் தருவார்கள்.

 

திரிகோணம் அல்லது முதல் கோணம் என்று சொல்லும் 1-5-9 ம் இடங்கள் இவற்றின் அதிபதிகள் திசை இளம் வயதில் வருவது பொதுவாக நல்லது.. எல்லோருக்கும் இப்படி அமைந்து விடுமா என்பது தான் மில்லியன் டாலர் கேள்வி. கோனாதிபதிகள் எப்போதும் நன்மைகளையே செய்வார்கள்.

 

இதே போல, கேந்திர அதிபதி, நட்சத்திற்கு அதிபதி , ராசிக்கு அதிபதி, லக்கினத்திற்கு அதிபதி, பாதகாதிபதி, மாரகாதிபதி என்று அந்தெந்த துறைக்கு உரிய தலைவர்களை அடையாளம் கண்டு கொள்ள வேண்டும். அரசு நிர்வாகத்தில் அந்த துறை நிர்வாகத்தின் அமைச்சர் போல, என்று புரிதலுக்காக வைத்துக் கொள்ளுங்கள்.

 

எந்த ஜாதகத்திற்கும் கொடுப்பினை என்பது மாறாது; அது திசை புத்தி காலங்களில் தான் கிடைக்க வேண்டிய பலன்கள் கிடைக்கும். அதனால் தான் யோகமான ஜாதகர் கூட சிரம பட வேண்டிய சூழலில் இருப்பார்கள் என்பதை அனுபவத்தில் பார்த்து இருக்கலாம்.

 

பொதுவாகவே லக்னாதிபதியும், ராசியதிபதியும் நண்பர்களாக அமைந்த ஜாதகர் மகிழ்ச்சியுடன் இன்பமாக வாழ்வார். லக்னாதிபதி முதல் பாதி வாழ்க்கையின் முதல் இன்னிங்க்ஸ் என்றும்,  ராசியதிபதி இரண்டாம் பாதி வாழ்க்கையின் இரண்டாம் இன்னிங்க்ஸ் என்றும் புரிதலுக்காக வைத்துக் கொள்ளுங்கள்.

 

இப்போ பாருங்கள், ஒரு ஜாதகத்தில், லக்னாதிபதி பலமாகவும்  ராசியதிபதி பலமில்ல்லாமலும் அமைந்து விட்டால், ஓகோ என தொடங்கிய வாழ்க்கை அச்சோ என்று பின்பகுதியில் வந்து நிற்கும். வாழ்ந்து கெட்டவர்கள் என்று கிராமத்து பக்கத்தில் சொல்லுவார்கள்.

இதுவே ராசியதிபதி பலம் பொருந்தியும், லக்னாதிபதி பலம் இழந்தும் அமைந்து விட்டால், முதல் பாதியில் எதுவும் கிடைக்காது, அது கல்வியோ அல்லது பொருளாதார மேம்பாடோ இப்படி எதுவும் கிடைக்காது. தோல்வி மேல் தோல்வி தொட்டதெல்லாம் நஷ்டம் என இருக்கும்.

ஆனால் பின் பகுதியில் பணம் புகழ் வந்து கொட்டும் தர்ம சிந்தனை மேலோங்கும் வள்ளல் பட்டம் கூட வந்துவிடும். “அப்படி இருந்த அவரா ..இவர்” என்று சொல்லும்படி இருக்கும்.

சரிங்க ஜி, லக்னாதிபதியும் பலமாக அமைந்து, ராசியாதிபதியும் பலமாக அமைந்து விட்டால், என்று கேட்க நினைக்கறீர்கள் புரிகிறது. அவர்களுக்கு பிறப்பு முதல் இறப்பு வரை கஷ்டம் இல்லாத நிலைமை என்று அமைந்து விடும்.

லக்னாதிபதி நீசமாகி, ராசியதிபதியும்  நீசமாகிவிட்டால், வேண்டாமுங்க இப்படி யோசித்து பார்க்கவே கஷ்டமாக தான் இருக்கு.  இவர்களுக்கு கடவுள் நினைத்தால் மட்டுமே வாழ்க்கை என்று ஒன்று இருக்கும்.

இந்த கிரகம் இப்படி அமைய வேண்டும் என்பது இறைவன் கொடுத்த வரும். கிரகங்களுக்கு ஆண்டவன் போடும் சட்டம். இதை திருவருள் ஒன்றினால் மட்டுமே நேர் செய்ய முடியும். பல முறை சொன்னது போல நவ கிரகங்கள் ஆண்டவனின் ஆணையை ஏற்று நடத்தும் executive officers அவ்வளவு தான். அவர்களை வைத்து நமக்கு என்ன பலன் தர போகிறார்கள் என்று தெரிந்து கொள்ளலாமே தவிர அவர்களால் பலனை மாற்றி தர முடியாது. முடியவே முடியாது.

இறைவன் அருள் பெற்றால் எதுவும் சாத்தியமாகும். அதற்க்கான பயிற்சியும் முயற்சியும் தான் தேவை. மீண்டும் அடுத்த வாரம் சந்திப்போம். நம்பிக்கையுடன் இருங்கள். நல்லதே நடக்கும்.!