பிரச்சனையை தரும் பிரம்மஹத்தி ..?

 

பெரியவர்களை அவமதித்ததால் ஆசிர்வாதமா கிடைக்கும்? யாரையும் அவமதிக்க கூடாது என்று தானே தமிழ் சொல்லித் தரும் பாடம். “ஒருவரையும் பொல்லாங்கு சொல்ல வேண்டாம்” என்பது தானே ஒளவை வாக்கு.

இதை பல சமயங்களில் புரிந்து கொள்ளாமல் நம்முடைய உணர்வு கொப்பளிக்க எதையாவது சொல்லி விடுவதும் பின் அதை மறந்து விடுவதும் வாடிக்கை தான். ஆனாலும் பாதிக்கப்பட்டவர்கள் அதனை அடுத்த ஜென்மம் வரை மறக்க மாட்டார்கள்.

இப்படி ஜென்ம ஜென்மாக தொடர்வது தான் பிரமஹத்தி தோஷம். இந்த பிரமஹத்தி ஒருவரின் ஜாதகத்தில் அமைந்து விட்டால் அவர்களால் முழுமையாக எதுவும் செய்ய முடியாது. ஆண்டுக்கணக்கில் குழப்பம் நிலவும். ஏன் இது இப்படி நடக்கிறது என்று அவர்களே யோசித்து குழம்பி விடுவார்கள். இதற்க்கு காரணம் என்ன.

“செல்லிடத்து காப்பான் சினம் காப்பான் அல்லிடத்து காக்கின் என் காவாக்கால் என்” என வள்ளுவ பெருந்தகை நமக்கு சொல்லி தந்த போதும் அதை நாம் அலட்சியம் செய்து விடுகிறோம். நூல் படித்த ஆசானை அவமதிப்பு செய்தல், நூல் ஆசிரியரை விமர்சனம் செய்தல் கரு சிதைவு செய்தல், குடும்பத்தில் இணக்கமான உறவு முறை ஏற்படாதபடி நடந்து கொள்ளுதல் உட்பட அறிஞர்கள் மனம் புன்படும்படி செய்யும் அனைத்து செயல்களாலும் இந்த பிரம்மஹத்தி வரும்.

‘நான் எல்லாருக்கும் நல்லது தான் பண்றேன் ஆனால் எனக்கு கெட்ட பெயர் தான் மிச்சம்’ என்று சொல்பவர்களுக்கும் திடீர் தொழில் சரிவு ஏற்படுவதற்கும் குடும்ப ஆரோக்கிய வளர்ச்சி இல்லாமைக்கும் இந்த பிரமஹத்தி தான் நம் ஜாதகத்தில் இருந்து தன் வேலையை செய்து கொண்டிருக்கும்.

நவ கிரகங்களில் பெரிய கோள் எது? குருவும் சனியும் தான். இந்த இருவர்களும் சந்திந்த்தால்..... ஒருவரின் ஜாதகத்தில் இந்த குருவும் சனியும் பார்வையாலோ சேர்க்கையாலோ அல்லது ஏதாவது ஒரு வகையில் சம்பந்தப்பட்டு இருந்தால் இந்த பிரமஹத்தி வந்து ஒட்டிக் கொள்ளும்.

திருவிடைமருதூர் தலத்தில் பிரம்மஹத்தி வாசலில் நிற்கும்.  ஒரு வாசல் வழியாக சென்று மறு வாசல் வழி வர வேண்டும் என்று சொல்லுவார்கள்.

ஜாதக ஆய்வு செய்து பிரம்மஹத்தி இருப்பதாக சோதிடர் சொல்லி விட்டால் நிச்சயமாக பரிகாரம் செய்ய வேண்டும். கொஞ்சம் சிரமமான பரிகாரம் தான் ஆனாலும் இதனை முறைப்படி முழுமையாக செய்தால் மட்டுமே நிவர்த்தி ஏற்படும். சில குறிப்புகளை சொல்கிறேன் கவனமாக குறித்து கொள்ளுங்கள்.

சித்திர பவுர்ணமி அன்று முறைப்படி விரதம் இருந்து பூஜைகள் செய்து அதன் பின் வசதியான ஒரு நாளில் திருவையாறு அருகில் உள்ள திருக்கண்டியூர் திருத்தலத்தலத்தில் அருள் பாலிக்கும் மங்கள நாயகி உடனுறை பிரம்ம சிகண்டீச்வரரரை வணங்கி வழிபாடு செய்ய வேண்டும். இந்த திருத்தலத்தில் மூலவர் சந்நிதியில் இரு புறமும் விநாயகரும் முருகனும் இருப்பதற்கு பதில் இரு புறமும் முருகனே இருந்து அருள் பாலிக்கும் அற்புதமான திருத்தலம் இது. இங்கு முருகன், கையில் ஜபமாலையுடன் ஞான ஆசிரியராய் வழிபாடு செய்பவரின் தோஷ நிவர்தி செய்வதற்காகவே காத்திருப்பார்.

இத்துடன் முடியவில்லை. இதை தொடர்ந்து வரும் மாசி மாத தீர்த்த யாத்திரை செய்து அதன் பிறகு தான் திருவிடைமருதூர் மகாலிங்கத்தை தரிசனம் செய்து தோஷ நிவர்த்தி ஏற்படுத்திக் கொள்ள வேண்டும். நிறைவாக 12 ஆண்டுக்கு ஒரு முறை வரும் மகாமகத்தில் தீர்த்தமாடல் வேண்டும்.

‘அப்பா இவ்வளவு பெரிய விஷயமா?’ என்று யோசித்து மலைக்க வேண்டாம். அவ்வப்போது வாய்ப்பு கிடைக்கும் போது இயன்றதை செய்யுங்கள். அதனால் தான் மாசிமாதத்திலும் மகாமகத்திலும் இந்த தோஷம் இல்லாதவர்கள் கூட தீர்த்த யாத்திரையும் புண்ணிய தீர்த்தத்தில் நீராடுதலும் செய்வார்கள்.

இந்த வருடம் மே மாதம் 10 ந்தேதி சித்ரா புவுர்ணமி வருகிறது. அதை கருத்தில் கொண்டு இந்த தோஷம் இருப்பவர்கள் தோஷ நிவர்த்திக்காக சங்கல்ப்பம் செய்து முயற்சிகள் மேற் கொள்ளலாம்.

இத்தனை நாள் இப்படியே இருந்து விட்டேனே.. இனி ஏதாவது செய்ய வேண்டும் என நினைக்கிறேன் என்ன செய்வது என ஏங்குபவர்கள், வசதி இருப்பவர்களாக இருந்தால் திருக்கோயில் கும்பாபிஷேகத்தில் உங்கள் பங்களிப்பை கொடுங்கள். அதுவரை காத்திருக்க வேண்டுமா என நினைப்பவர்கள் சோதிடம் படித்த நூலாசானுக்கு உங்களால் முடிந்ததை தந்து நல்லாசி பெறுங்கள். அவ்வளவு வசதி இல்லையே என்பவர்கள் அப்பர் சுவாமிகள் பாடிய

எய்தானை, புரம் மூன்றும் இமைக்கும் போதில்;

       இரு விசும்பில் வருபுனலைத் திரு ஆர் சென்னிப்

பெய்தானை; பிறப்பு இலியை; அறத்தில் நில்லாப்
         ‘பிரமன்’ தன் சிரம் ஒன்றைக் கரம் ஒன்றினால்
கொய்தானை; கூத்து ஆட வல்லான் தன்னை;
            குறி இலாக் கொடியேனை அடியேன் ஆகச்
செய்தானை; திரு நாகேச்சுரத்து உளானை;
               சேராதார் நன்நெறிக்கண் சேராதாரே.

என்ற திருத்தாண்டகத்தை தினமும் படனம் செய்யுங்கள். இன்றைய வாழ்க்கை சூழலுக்கு ஏற்ப படிக்க நேரம் அல்லது வாய்ப்பு இல்லாதவர்கள் ஆடியோவில் கேளுங்கள்.

இறை வழிபாடு உங்கள் வாழ்க்கையை சீர்படுத்தும். விதியை மதியால் வெல்ல முடியாது. ஆனால் இறைவன் திருவருளால் வெல்ல முடியும்.அன்று முதல் இன்று வரை இதற்க்கு பல சான்றுகள் இருக்கிறது.

நம்பிக்கையோடு இருங்கள். உங்கள் வாழ்க்கையின் வெற்றி இறைவன் திருவருளால் மாற்றி அமைக்கப்படும். சொல்லப்படும் பரிகாரங்களை நம்பிக்கையோடு செய்து பலன் பெறுங்கள் பயன் பெறுங்கள்.

நல்லது சொல்லி உள்ளது நல்லதே நடக்கும். நல்வாழ்த்துக்கள்.